17-02-07
之前我話過我想寫一篇同藥物有關嘅小說，於是問咗中心護士Shirley一啲關於藥物嘅名稱，Shirley見我咁問梗係好奇怪，於是我將我嘅構想講俾佢聽，佢好唔信我會寫小說@@於是我今日前幾日帶咗幾篇舊文俾佢睇，佢睇完之後話：「真係你寫嘅？以前你都好積極人生吖！點解而家變成咁架？」我突然覺得俾佢「叮」醒咗，於是我今日拎返篇我最滿意嘅幸福論出嚟睇，竟然覺得好似睇緊其他人寫嘅文章咁……
「……但無可否認，追求幸福，是許多人的終生功課。可是不少人窮畢生精力都未能找到他們心目中的幸福：他們有的不知什麼是幸福；有的不知怎樣才能得到幸福；更多的是『身在福中不知福』……」
「……要令自己幸福，一點也不難。幸福總會有出現的條件，只是人們能不能做到……」
「……條件之一，是要自愛。……自愛的另一重意義，是要愛自己，亦即是要珍惜自己擁有的一切。要做到這樣，便不可有太多奢求。……」
「……除了自愛，學會善待自己，也是令自己幸福的竅門……」
「……客觀一點省識自己的內心，將自己最真實的一面表現出來，既可令自己活得更稱心滿意，也可吸引知音，何樂而不為……要學會和自己相處，第二個要訣是認識自己……不為外間的風雨所影響，令自己活得更快樂。令自己快樂，便是幸福的開始……」
「忘記，也是令自己幸福的一種方法。忘記過往不快的事，而記著那讓自己感到快樂的事……把放大鏡置於快樂的事上，時刻提醒自己也是快樂的，是幸福的……」
於是，我開始去諗，自己係唔係真係過得咁唔開心？
其實我擁有嘅幸福同幸運真係好多：工作方面，我受到上司嘅重用、同事嘅重視，我唔再係晌中心可有可無嘅角色，反而佢哋覺得，好多事都要我去處理，雖然我未必第一時間處理，但係佢哋都會俾時間我、相信我會解決。彼此關係上，我同其他同事都做到「工作時工作，遊戲時遊戲」，絕對唔會因為平日「玩過火」而影晌工作，亦唔會因為沉迷工作令寫字樓變得死氣沉沉。我晌呢個崗位留咁耐，主要都係因為──我有一群好拍擋。
家庭方面，可能外人覺得我哋係一個破碎家庭，不過我覺得，一個「破碎」但感情好嘅家庭，比一個「完整」但無溝通嘅家庭，過得更加舒適。有時我都會諗，以前果個人晌度嘅時候，成家人都會好沉默、冇咩溝通；而家少咗呢個人，大家講嘅反而多咗。可能好似明媽話齋，呢個人只係嚟還返上一世嘅因，還完大家就緣盡啦，所以要分開啦。既然明媽都睇開咗，我呢個做仔嘅，只係諗以後點樣令明媽嘅生活過得安定就夠啦！
我亦有一班好知己。古人云「人生得一知己死而無憾」，我敢誇口，我嘅知己唔止一個：輝爺啦、小盈啦、阿強、肥堃、小明妹子、小玉妹子、小強妹子、小戀……等等等等，雖然我哋見面唔多，不過每次見面嘅時間，都係過得好愉快同令人回味。唔知到咗大家都退休嘅年紀，我哋仲會唔會聚埋一齊食飯、唱K、BBQ呢？
「只看自己有的，不看自己沒有的」，本著呢個信念，我覺得，自己真係變得開心咗。原來，幸福就係咁陲手可得。
文章定位：
