＊野蠻千金的小秘密 女人獨有的天真和溫柔的天分要留給真愛你的人

1,032愛的鼓勵 0訂閱站台

         近來地球諸事不順！奶粉有三聚氰胺，又三鹿、又蒙牛伊利。隻隻牌子驗，就差不多隻隻都驗到。嬰兒一時間搞到斷水斷糧，有沒有錢都被逼買外國貴奶粉，甚至有家長表示要效法古代找奶媽。最無奈的是奶媽原來都不夠安全，因為政府又同你講，奶類製品有問題外，不食零食不等於你能幸免。因為豬牛羊有，連菜都有！問你死未！現時醫院日日驗腎，人人自危。原來不只嬰兒斷水斷糧，成人都玩「食物慌」！

 

金融海嘯席捲全球，搞得人心惶惶，人人自危。雷曼一日爆煲，全球就日日都咁大煲！「打工仔」怕飯碗不保；老板怕倒閉破產；投資者怕永不翻身；政府最怕官逼民反，現時大家就好比熱鍋中的螞蟻無力反抗「一鑊熟」，只有三條路：「等佢爆煲」、「驚佢爆煲」同「睇住佢爆煲」。

 

日日頭版話你知對香港的影響多大，將可能要面對經濟衰退。但最大單的還是雷曼迷你債券事件，擾攘足足一星期有多。

 

本人當然明白箇中嚴重性，大拿拿不見了數百萬，換著是我也會欲哭無淚。然而，閣下有沒有想過投資本來就有風險，就算你買的是國家債券，仍然有一定風險，投資產品的風險只有程度上的差別，沒有投資是100%安全的。

 

香港人一向都有人云亦云的心態，見人地補習，自己又要補習；見人地排隊，自己又要一齊排；聽人地話邊隻股票升，自己又一齊買。証監會一直強調「投資要三思 問清楚好啲」有不明白的就問証監會，不夠清楚就不要冒險，買了就要自己承擔風險。指引十分清晰。

 

只是不停投訴銀行只想賺佣，証監會監管不足，又可不反省自己不按本子投資呢？你們有沒有想過雷曼未爆煲前，沒有人知道雷曼會爆煲。大家都知次按大鑊，但邊個估到咁大鑊呢？大家都依然固我的大手投資，買股買樓。直到雷曼爆煲後，大家都仍然以為自己發緊惡夢而已。點都叫Wall Street第三大投資銀行，又點會一夜間玩完呢？點知上帝就係咁安排。到股市不停插水，格老溫馨提示話你知「地球將面臨百年難得一見的金融大災難」，大家先識如夢初醒，驀然回首、回頭是岸。與其話政府錯、銀行錯，又何不反省自己貪婪之罪呢？

 

試想想，呀Ann大減價時買一套名貴晚裝去晚宴，諗著幾次又可以出售予人。點知返到屋企發現晚裝唔襯佢style，質地又差，仲有甩線，俾成萬蚊買了一件猶如花園街的貨，唔適合佢著，又賣唔出去。呀Ann去退貨，人地唔退，佢就話名店黑心，投訴個職責係sale人的salesperson沒有良心，但人地明明就寫著「減價貨品，恕不退換」。然後，佢又去消委會嘈。看到這裏，你一定說：「小姐！誰叫你不check清楚，試清楚呢？」呀Ann同你講：「誰知道名牌有問題？不是人人都有fashion sense的！我當然相信個salesperson！」好，消委會俾呀Ann煩了好一段日子，最後要求名店回收套晚裝，名店話：「件衫剪左牌，又過了時，最多只可用七折回收。」呀Ann又繼續嘈：「唔得！要退全數！」你會唔會覺得呀Ann好荒謬？

 

兩件事性質係一樣。苦主每日不停投訴，政府因為人數多、金額大，最後唯有打同情牌，要求銀行回購，成件事已經變得有點荒謬。如果投資失利就要銀行承擔，每日咁多人蝕錢，難怪銀行會倒閉。最荒謬的是苦主仲要政府包底。成件事根本就是「輸打贏要」。

 

當然，銀行方面是否存有欺瞞成份，是否反映政策漏洞，監管不足，仍需要著手調查。本人的目的不是要落井下石，而是希望苦主何不冷靜下來，吸取教訓。下次睇清楚、問清楚、諗清楚。

 

今日睇到一個報導：冰島銀行危機逼使一個伊朗富豪在二十四小時內損失了十億英鎊，但他依然非常達觀，看透得失。他的一位朋友說︰「雖然三、四年間的努力化為烏有，但我保證他會捲土重來，不要忘記，他現在仍是比六年前富有。」香港人的精神是不屈不朽不服輸，苦主要撐起來，你們還有未來機會，因為生活仍然在繼續。