還不如放肆 成熟是開始覺得生活的次序和下場越來越清晰可見，可能性越來越少。 擅長負責任地思考的墮落中年，現在只想拼死守衛常識。

224愛的鼓勵 0訂閱站台

『我一直都以為我同何寶榮好唔同, 點知原來寂寞起上黎果陣, 個個都係一樣。』 - 黎耀輝



可能因為大導演, 可能因為美指剪接同攝影, 亦可能因為最靚仔嘅兩個香港人, 總之同性戀靚咗。
多謝王家衛俾我見識到哥哥同埋梁朝偉嘅粗口。其實我覺得無粗口嘅戲好難完全投入, 你諗下有乜理由大粒佬韓琛喺差館嬲到掃飯盒, 又或者少林隊俾魔鬼隊踢到斷腳, 都可以無一粒粗口? 不過亦因為咁傳神, <春光乍洩>被列為三級。
梁朝偉最流俐。

近排興睇埋片尾字幕, 原來絕對有收鑊: 先係發現 <春光乍> 係王家衛第一部有音樂資料補充嘅戲, 其次就係主角黎耀輝 (梁朝偉) 同何寶榮 (張國榮) 原來真有其人, 仲要兩位都係杜可風副手, 助理攝影。



『果朝我睇電視至發覺, 原來香港同阿根廷喺地球嘅兩邊。唔知倒轉咗嘅香港會係點嘅呢?』 - 黎耀輝

『份工除咗人工高之外, 時間亦都好啱我。夜晚開工日抖瞓覺, 我開始跟返香港嘅時間。』 - 黎耀輝



終於發現一個理由去解釋點解鐘意王家衛嘅戲。我哋好多時睇戲都會一路睇一路估, 愈緊張愈投入, 然後就會有好多『我都估到啦』或者『嘩出人意表呀』。但王家衛嘅戲唔同, 眾主角都無明確嘅目標同路向 (從來唔洗報仇亦唔洗爭勝) , 因為根本主角都同我哋一樣, 對人生好迷失, 所以我哋就係睇主角點樣過日辰, 點樣失戀點樣繼續一日一日咁做人, 過一 D 其實起伏唔大嘅日子。 <春光乍洩> 一樣, 就算係同性戀就算遠到喺阿根廷, 所為嘅都係自由, 所煩嘅都係感情事。



『我終於都黎到瀑布。突然之間我諗起何寶榮, 我覺得好難過, 因為我覺得喺瀑布下面應該係有兩個人。』 - 黎耀輝



對戲入面嘅非戲劇組主角 - 瀑布又愛又恨: 鐘意佢夠宏偉, 作為電影嘅尋覓之處絕對 make sense (唔似得 <戀之風景> 果幾條樹枝) ; 但單係影住瀑布嘅菲林夾埋差唔多成 5 分鐘, 呢 D 係咪參展嘅條件呢? 第五十屆康城影展最佳導演 - 王家衛 ( <春光乍洩> )。
黎耀輝話佢承認何寶榮果句口頭禪『不如我哋由頭黎過』對佢係好有殺傷力, 但最後喺目的地上面, 只有一個影; 而佢返香港前喺台灣過咗一晚, 為嘅係小張 (張震) , 唔係何寶榮。



『走果陣我囉咗佢張相, 因為我唔知幾時先可以再見到佢, 但我可以好肯定, 如果我想見到佢, 起碼我知道應該去邊度搵佢。』 - 黎耀輝






(p.s. 英文 listening 唔得靈光, 當晚凌晨睇住直播睇住蘇菲亞哥普拉上台聽住佢講得獎感受, 最後都要靠睇中文新聞先知道王家衛大名響遍堂堂 Oscar 。)