五日節e 午時水？＠星光.月光.日頭光

2003-06-05 11:10:11| 人氣280| 回應0 | 上一篇 | 下一篇

五日節e 午時水？

推薦 0 收藏 0 轉貼0 訂閱站台

細漢e時，五日節充滿過節e氣氛，媽媽會oan-na 縛粽oan-na 講屈原投江e 故事。講煞，阮會亂媽媽擱講年年聽be 倦e白蛇傳--白素真kap 許仙kap 青蛇e 故事，尤其是狀元囝哭倒雷峰塔彼段，媽媽講著特別精彩，敢是濟濟查某人ti 男女無平等e 年代，攏有hong 關ti 雷峰塔e 心情？

《民俗台灣》記載：自五月初一起，就先到水邊「迎水神」。初五正中晝，敲響鑼鼓，扛龍舟到岸邊，沿途民眾燒香禮拜。俗語講：「五月五，龍船鼓，滿街路」表示歡迎，叫作「接龍船」。賽過龍，初十「送水神」，並且舉行「謝江」e 儀式。

五日節食粽、划龍船e 來源，大家攏知影。農曆五月五日彼工，詩人屈原投江自殺，眾人驚魚仔ka 詩人拆食落腹，縛粽擲落江水餵魚，擱划船ti尋屈原e 肉身。所以五日節擱號作「詩人節」。

讀大學e 時陣，有1 年五日節，老師叫阮去台中參加紀念屈原所辦e 古典詩詞比賽，阮竟然得著1塊「漱玉清真」e 獎牌，擱 chah 1台電風轉去，想起來嘛趣味趣味。

為著趕走災厄，五日節彼工，家家戶戶攏掛菖蒲kap 艾草ti 門口，擱有「鍾馗」e 畫像，大人飲「雄黃酒」傳說有避邪、求吉祥e 作用。囡仔身上掛外形活潑多變化e 香包，仝款攏是為著避邪，保平安。會記智讀國校仔e時，阮擱bat ti 正中晝時仔，ka 雞蛋用hou 徛起來，聽講按呢表示來年會好運。這寡風俗大漢了後，攏罕nih 擱 toe teh 行。

這幾年，beh 食粽外口隨時攏有通賣，加上媽媽年紀卡大，就無擱家己縛粽。坐ti 媽媽身軀邊聽故事，嘛變作1個美麗e 記智。

「午時水」擱卡免講，故鄉e 古井，早著攏廢掉無咧用a ！午時水就是五日節中午打起來e 井水。聽講午時水用來泡茶特別香，甚至有治病e 功效。俗語講：「午時洗目睭，明kah 若烏鶖」擱講「午時水飲1嘴，較好補藥吃三年」。

今年五日節彼工，阮駛車ui三峽順大豹溪入去山裡，沿路經過佛山，看著真濟人teh 承水、載水，m 是井水，是甘甜e 山泉水。阮卡早bat 聽朋友講過佛山e 山泉水，水質真讚。ti 水道水摻氯消毒摻卡濟e 今仔日，阮扑算beh 幾桶仔水轉來去飲。

意外ti 五日節中午水轉來去，m 知敢算是另外1種e 午時水？

2003.06.04

我要檢舉

台長： A-chiak