當我去到診所，見到醫生時，佢再查看多次x-ray片，跟住就話：
「今次我會同你剝右下面隻智慧齒…」
「吓？醫生，係左下邊果隻智慧齒流血喎，要剝既都應該係呢隻…唔係呢隻緊急ｄ咩？」
「右下邊果隻緊急ｄ，上次我都話呢隻要剝。」
「但…右下邊果隻唔痛喎，加上都生左出黎，而左下邊果隻流左成四個星期血喎…」
「剝邊隻先都無問題，反正兩隻都要剝，咁今次就剝左邊先啦，下次至剝右邊。」
「…」
「右邊果隻真係要剝？」
「佢遲早發炎」
「…」
傾掂之後，醫生就幫我打左麻醉針（起碼三支），出奇地唔痛，跟住坐多一陣，等麻醉藥力發作後，就開始啦，由於我太驚既原故，全程都合起雙眼，年紀越大就越拍事，哈哈，過程中，醫生又拉，又扯，又按，又鑽，又推．．．攪到我個口又攰，成棚牙都痛，中途醫生話剝左啦，依家聯針，我就會幻想會點聯呢？再過多一陣，就完成啦，不過醫生都無俾返隻牙我睇，唔知碎成點呢？話一星期後返去拆線。唔計麻醉，只需４５分鐘，塞埋棉花，但當我攞藥之際，就感到口內好腥，照一照鏡，發現牙齒滲滿血，護士話係咁，叫我吞晒ｄ血佢，不斷咬實棉花同吞血就得，我咪好無奈咁離開診所。
跟住我去左家姐屋企休息吓，諗住有咩事既話都可以即刻返診所，因為我家姐屋企喺診所附近。我吞左成個鐘頭血，都未止血，又唔知正唔正常，咁我咪諗住換吓棉花，一攞棉花出黎，ｄ血係咁湧，攪到我隻手都染有血，洗手盤都有兩滴血，咁流法，我諗唔正常嘛！家組咪打電話問診所囉，我用分機聽，家姐話我仲未止到血，點知個護士話見到我攪個傷口黎，又話可能我放棉花放得唔好，聽到佢咁講，我同家姐都呆一呆，點解佢會咁講？又叫我等多一個鐘，唔止血先再聯絡佢地…
6:25pm，護士再call我問情況，我咪話個口仲好腥，仲有血流，跟住佢就話：
「如果過多一陣，都仲有血，你可以去旺角分店，因為醫生喺6:45pm就要走…」
「我依家都係診所附近，不如我返黎俾醫生睇呀。」
「你仲未返屋企呀？你仲係診所附近？仲周圍走？」
「…」
呢個護士都無解既，我係邊又關佢事？最後我都返左去診所，醫生整多陣，再俾左ｄ紗布我，情況至好ｄ，直至星期六早，仲有滲血，到下午五點許，左右才止血，唉，諗番都咪話唔驚，定係我太怕事呢？
星期六開始塊臉就腫起來了，幸好星期一我攞左病假，星期二返工，同事們都睇到仲有微腫。
點都好啦，總算攪掂左一隻，因為我仲要剝牙呀，就係多生齒啦，好煩啊！究竟好唔好搵返呢間呢？算吧啦，等我完全康復後才諗啦！
文章定位：
