上圖為Mamutik島餵魚毛時攝
承接上文.. 岩岩玩完遊船河
二月十二日 (外面天陰有點涼意, 會落雨嗎? 今日要去浮潛同玩水上活動呢! 天爺爺~ 千萬不要落雨唷~ 我要好天氣!)
Day three
0830起床,怎麼落地玻璃窗滿是水氣,下雨嗎?不要呀!
0900酒店自助早餐,今日有唔同款色喎.食到半路,落雨呀~~沒事沒事的,現在落總比出去時落來得好,不要杞人憂天.
1000出發坐的士去Wisma Merdeka買我地同Nemo的午餐-麵包(RM2.2一大包).
(如果早d去同酒店serve講底可以坐酒店巴士去,整點出發,但要提前book定,好多人搭)
買好野向北行去碼頭,大約行左10-15分鐘啦!有傾有講好快到左!
1030踏入碼頭就有個一頭set到好行的後生仔兜生意,唔係太知佢講乜(主要係因為我d英文太屎),跟住佢入左碼頭右手邊第一間店,比左RM232就出發.
(兩個島RM33+環保費RM10+救生衣/浮潛用品RM15=RM58/人,如果跟團就要約RM120/人,自己搵慳成半)
我地同船仲有幾個日本遊客,有個小豆丁可能得3-4歲,好kawaii呢!
1100到左Sapi島,呢個係最大的島,而且遊客好多,d水上活動仲好貴添,香蕉船呀降落傘都好貴,可能旺季佢地唔肯平,唉~唯有一陣去第二個島時問下啦!
每人交入島費RM10.
歌個哥哥仔放低我地就坐底左,佢話我地d行囊可以就咁放係度唔怕喎~
有d擔心!不過信佢啦!唔通我地留底個唔出去咩?!
可能朝早落過雨,d水唔算好清,魚都唔係太多,見唔到Nemo呀!不過都有其它熱帶魚.玩左陣就上水,抹抹下身唔見晒佢地,原來小蓮走左去玩巨蜥,一家四口好大條呀,有成米到米半!又要驚又要影,真係服左佢.
1300出發去第二個島,Manukan島,呢個島相對較細所以無咁多遊客,臘晒頭的哥哥個頭唔再臘啦!佢同我地一齊落水玩.一路執d藍色海星呀,紅色海參,星型海螺,一d唔知名的貝殼,佢玩得好開心,當然我地都玩得好開心好開心.
一路用麵包餵魚,佢地就一路跟住我地游,執住麵包的手仲比魚咬,哈哈~好玩呀!唔覺唔覺玩到1440啦.要上水準備走人.
1510出發去Sapi接埋d日本人,途中船夫玩快艇,開得好快好拋,爽! 中途同個搭順風船的當地人傾計,傾傾下就講到出海釣魚,佢話歌度可以釣到好多魚而且都可以食,咁問下問下臘起頭的哥哥話可以包船出海釣魚,包埋魚杆同魚餌可以玩到下晝1700,中途可以上島玩浮潛呀玩其它野都得.
問過價錢RM200/船,最多10人(旅行團要約RM120/人呢!).
話晒上次去刁曼玩唔到釣魚,今次有機會釣魚呢,而且同團的團友也很想釣魚呢!一於決定明天去釣魚啦.即刻比底RM50做訂金,大家講信用架嘛,斷估唔會呃我地既.(本來預定會去玩激流,算啦!坐車來回要成9個鐘,放棄佢啦!)
係我地好開心講緊釣魚的時候,船家停低左隻船.
下~咩話,比人地偷晒d油,宜家無油返去,我地點算呀,唔通要好似湯漢斯咁流落荒島?!
臘頭哥哥仲打趣話游水返去喎,唔怕鯊魚咩?!好彩船家話佢細佬黎緊救我地,等左大約十分鐘倒,船家細佬黎到.太好啦,有救了!
1545返到碼頭,坐的士回酒店RM20,返房沖個靚涼先,順道開水玩泡泡浴<--當然唔係我浸啦!我負責開水喳.
1730酒店出發去海皇城RM10,朋友介紹加上網介推介:
點左1)酥炸軟殼蟹 **** RM8/隻x4(真係軟殼架,幾香酥細嫩,必試推介!平!)
2)奶油老虎蝦 **** 細RM18/隻x4(好大陣時時食芝士味,雖然佢係細size,不過仲大隻過澳門街巿買的大蝦,必試推介!)
3)薑蔥蒸象拔蚌仔 **** RM30/Kg(好鮮甜呀,底下的粉絲索晒d汁,好味!不過略嫌細隻左d)
4)白灼東風螺 *** RM30/Kg(好有東風螺味呀,不過就貴左d)
5)馬拉盞炒馬鈴薯菜 *** RM8(抱住試新野的態度,食落幾好味喎!)
6)白飯 ** RM1/個x4(個飯實在太細個啦!)
總共埋單用左RM185.平均每人HKD120.抵食啦!
1850的士RM10送小蓮返房推油按摩(導遊d朋友上門按摩,約200/1.5小時),我地一行三人又再坐的士(RM9)出門逛街搵食.
首先去Wisma Merdeka買聽日的午餐,梗係麵包啦!(白麵包+朱古力包+蛋糕=RM6.4)買完包就沿TunFuadStephens Rd.向南行,去到Central Market就買左椰汁糕RM1同榴槤約RM15,仲有d炸細條春卷做手信,之後向東南行搵PostOffice,去到CityPark附近買左新記的肉骨茶****約RM10(幾入味呀,d豬腸同豬肚好好味).
途經超級巿場就買左d水RM16.6,之後滿載而歸坐的士時司機話食榴槤好補,好似話唔好食蛇(唔記得佢講乜啦!)RM10.
返到酒店又要偷偷地食榴槤,不過今次係系酒店個袖珍沙灘,坐係沙灘椅望住個星空,邊聽住海浪聲邊食榴槤,海風吹埋黎好舒服呀!可能酒店比較光,星星少過尋晚坐船見歌d.
等到我地食晒榴槤,小蓮就黎到啦!一齊坐係度欣賞呢個咁靚的夜晚,望下個鐘,呢一刻就係我地共同擁有的回憶!(好似王家衛d戲).
今晚睡得好甜~~
Total用左:RM172.2+602=RM774.2
二月十三日 (少少陰天, 不過無尋日咁烏雲密佈. 呢d天氣係垂釣的好時機!)
Day Four
0830起身,執齊晒d眼耳口鼻就出去食自助早餐,今日目標係偷運蘋果同雞蛋,中國人嘛~睇開d啦!
0930酒店大堂集齊一行6人,坐的士去碼頭RM15,搵返尋日臘頭的哥哥仔,咦~今日無臘頭喎!入去交環保費RM10x4=40,出發啦~魚呀!等我唷!
10分鐘就去到第一垂釣點,嘩~團友好似有魚上釣咁喎,虛驚虛驚!玩左廿零分鐘,見無魚就走去第二個點.
嘩~一黎團友就釣到魚啦!船家都釣到呢!我地4個就...唉!
不過皇天不負有心人,係臘頭哥哥幫忙下我都釣到一條啦!
玩下玩下十二點幾啦.係時候上岸食中午,船家帶左我地去尋日無去過的Mamutik島,呢個島比較細,但係就好多魚毛仔,唔記得帶尋日的入島飛,於是每人比左RM10入島.
船家同臘頭哥哥去左游水,我地就坐係個亭度食晏,嘩~團友仲狼過我地,拿了很多麵包呢!
嘆完全自助的午餐就行下島同影下相,島上都有雪條賣,價錢都係RM1.5/條,今日試紅豆味啦!費事比人迫令離船十尺.
影完相走左去碼頭仔度餵魚,好多魚毛呀!餵下餵下見到Nemo呀!好靚呀!玩左陣係時候上路,出海再續釣魚緣!魚~~我來了,快d上釣啦!
點解人地d魚咁易上釣,我歌d釣整都唔上黎ge,淨係食晒我d魚餌,咁聰明架,我要蠢魚呀!
終於,去到四點零的時候,我地先後都釣到魚呀,有紅衫丫,碼頭魚,河豚,石斑呢,仲有條不知名的怪魚,係臘頭哥哥釣到.似乎釣魚都幾玩,不過好晒,要做足防晒先好去釣魚呀.
1700回航啦.今日唔怕無油了,準備充足!到左碼頭臘頭哥哥裝晒d魚比我地,叫佢拿d返去都唔制,俾埋d尾數RM150就要分手啦.
byebye啦船家,byebye啦臘頭哥哥,有緣再見啦!我想,應該緣盡於此了!
坐的士返酒店RM15,途經Wisma Merdeka放低之前浮潛影的相去曬,等陣食飽飯可以去拿.返房第一件事係洗乾淨d鹹鹹濕濕的感覺.
小文同小榮去左睇日落,我就係房度邊吹冷氣邊睇落日.最後一個馬拉日落!
1845約左團友一齊去食飯,順道將d魚整黎食.的士去海皇城RM10,
問過廚房話有5條魚蒸(***蒸得老左d,但係好甜好好味),其它8條用黎煮湯(**都唔識煲湯,落多左魚露,好鹹),加工費RM80
辣椒蟹 *** RM38/Kg(比澳門平,唔怕好辣,幾好味)
豉椒炒蜆 *** RM20/Kg(幾好味丫,同澳門一樣,見殼唔見肉)
蒜泥蒸扇貝 *** RM30/Kg(都OK丫)
炒豆苗 ** RM12(略嫌炒得老左少少)
桔仔冰 *** RM3/杯(好似小泉居的酸梅柑桔水咁,生津解喝!).
埋單總共用左RM282,平均每人HKD120有找,好抵食!
點解個地好似搖下搖下咁ge,點解好似坐係船的感覺,唔通...我地暈地浪?!
食飽飽同團友各自搵好下場,我地4個坐的士(RM10)去Wisma Merdeka拿相RM13.45,嘩~好清呀,比期望的還要好.
沿路向南行經過一d Market逛左陣,都係SundayMarket多野買兼夾平.行左陣無野買就打道坐的士回酒店RM10.
2030咁早返到酒店無野做,一於去玩下酒店的設施,係大堂問左d姐姐,結果選擇去打保齡,每人一局兩條line,入面部電腦有d似蛋蛋的ling場,一局都玩左成大半個鐘,埋單約RM80.
返房沖個涼就訓,我地副UNO都未玩過呀!
Total用左:RM172.2+602+585.45=RM1359.65
二月十四日 (情人節! 好似無乜情人節氣氛咁ge~)
Day Five
0730起床,梳洗完畢準時0800起程,唔係趕搭機呀,而係我同小蓮去買郵票,的士司機帶左我地去一個好偏僻的村莊,本來諗住會有好多郵票丫,點知佢得零售的一張張郵票,不過都幾靚.
之後再趕去巿區的郵局繼續掃貨,雖然係巿區,但都唔及澳門中區的郵局咁多郵票,06年冊仲未有,睇左04/05年的郵冊,都係選左04年的,睇落多d色彩比較活潑.買完郵票都0930.
坐的士返酒店放低d郵票就趕去食早餐,最後一個沙巴早餐食得好趕呀,有d食而不知其味的感覺.
1030準時係大堂集合,回程出發啦!
首先去手信店買野啦!買左好多雪糕唷,包左一大箱!出發出發,沙巴!有緣的話再見啦!宜家網絡好方便,機票都係網上訂架.去到checkin時航空姐姐話新機場無冷氣,d急凍的野唔可以托運喎,要手拎上機.都幾重下!
1312登機啦!新機場即係新機場,登機安排好混亂.不過都算安全咁上到機,出面d天氣好熱,焗融我地,行去飛機途中見到d存倉行李好隨便咁放係一邊,唔怪得急凍的唔存得倉啦~ 原來係放係太陽下曝曬.
1315上到飛機,咦~空姐唔比我地箱行李放係座位度,話要放係機尾喎.無幾耐走左個哥哥入黎話唔放得係機尾,要拆開入袋放係樓上行李櫃度,好啦~你話拆咪拆囉.我地幾個夾手夾腳咁放係自己背囊呀,行李袋度.放好晒啦~又走左個老少少的哥哥入黎,話唔可以拆開放係度,咁樣唔密封,要我地入落箱.喂~你玩我地呀,個箱都放唔到係樓上行李櫃.你想點先,你講晒啦!又係你地叫我拆箱,拆左又唔比放,家下玩我地呀!
係咁攪左成十分鐘而仍然爭持不下,結果,我地放棄左所有雪糕.
好衰架~導遊又唔出聲話d野唔寄得倉,又唔講有登機限制,只係叫我地買,一d都唔負責任架.下次都唔跟”康泰”去玩.
個機場又係,都唔知邊個講的野先算數,一個話得一個又話唔得,聽得邊個講呀!
如果你地去玩,記得入雪糕的盒要度下大細,放唔到係樓上的櫃隨時唔比你件行李登機.
唉~少少掃興啦!除左呢樣其它都ok既.
不過沙巴之旅就無刁曼咁好玩,但係就有少少的手信買倒啦~自己衡量值唔值得玩啦!
咁多日公數Total用左RM1359.65,平均每人HKD840.好抵呀!我自己團費加埋駛費總共用左HKD5300,如果唔買郵票的話就5000有找.算係抵玩之旅,只不過歌度太細同比較落後,無乜手信買到返黎!
1750安全抵達澳門機場.
Mission Complete!!
總括五日四夜的行程,因為住係城巿外圍,所以算係有半渡假Feel,如果住Hyatt呢d巿區酒店,就好似住係幾年前的黑沙環咁,不過係有酒店的黑沙環.
好難講鍾唔鍾意呢度,只係覺得佢如果發展多幾年,應該好玩過宜家,不過就會比現在貴,貴了就不值得!
有時間的話不要在長假期去,咁樣價錢呀~玩樂資源方面會好d,起碼水上活動可以講價丫~
對我黎講呢度係只會玩一次的地方,無乜特別值得再玩的野,如無意外唔會再去!
多謝各位咁耐心睇完我的遊記!如果對上述資料有疑問,可以回覆留言比我,我會不定期咁返黎睇.(忙的時候通常一個月兩次,得閒就一個禮拜一次.)
謝謝!
文章定位：
