打從上年12月開始蘊釀旅行之念,可惜一直找不到合適的地點.上海太貴也太冷,海南島景點又太散,台灣經已去了三次,日本實在太貴負擔不起.
(請原諒豬入息低微).
終於係上個月朋友介紹下,選定左東馬的沙巴作為今次旅行目的地.
陽光海灘,水清沙幼,伴著椰林樹影... 正!!
由今個月起澳門有直航沙巴州,方便又抵(來回連機場稅雜項約HK 1000/人).如果有心自由行的話,建議自己上網book機票同埋酒店.
以今次五日四夜行程黎講,跟團加埋雜費要HK 3800/人,但係上網book約HK 3000/人(同一酒店同一班機),慳埋的錢夠係歌邊玩浮潛同釣魚呶.
閒話少說,介紹下今次的行程啦!
五日四夜沙巴州哥打京那峇魯(Kota Kinabalu)行程駛費大約(團費HK 3800+飲食玩樂HK 1500=Total HK 5300,其中500係買比自己的禮物),有興趣知旅程經歷就睇埋落去啦!
二月十日 追逐陽光 (離開寒冷的澳門, 投向沙巴溫暖的懷抱, 沙巴~ 我來也!!)
Day one
1400澳門屋企出發,1415到達機場.
我地一行四人(小榮+小文+小蓮+小豬)坐1635班機,有成兩個鐘頭時間,梗係食番個M記啦~例牌黎架嘛!
1615準時登機,1635準時起飛,今次個機師唔錯呀,算係平穩咁升降.AirAsia唔包飛機餐,所以要自備少量零食同飲料啦~當然係偷偷地咁食.
由於係向西南飛,所以怕晒就唔好坐係右邊的機位.
有太陽伯伯照住,完全唔敢開窗睇景.不過六點鐘左右太陽西下的時候可以睇到無敵勁正的日落,要唔要為左睇夕陽餘暉而無得睇海景就自己選擇啦!
(個人推介係回程先至睇海景,話晒機上睇日落無乜幾多次架)
1930到達Kota Kinabalu機場,沙巴新機場黎架,因為太新,所以無換錢的地方.
(險~好彩係澳門換定d!匯率HK 100=RM 44.4)
2000過晒關認領埋行李,咦~成團得六個人呀,真係袖珍囉!
出閘口匯合導遊EdmondChan去食個土風舞晚宴.車程十分鐘到左食飯的地方,睇左十分鐘表演就無啦...
(乜表演係1800-2030,咁都算落行程度,唉~搵笨)
晚飯好中式呀,甜酸雞/炒蝦/炒飯/菜湯...唔記得咁多啦,成檯得六個人食,第一餐就浪費食物,真唔要得!
2200到左酒店Sutera Harbour Resort & Spa(Magellan Wing)絲綢海峽度假大酒店(密哲倫翼),機場到酒店大約十五分鐘車程,酒店到巿區又十零分鐘車程,唔算遠,不過比起其它巿區酒店佢係算偏僻d.
(十零分鐘對澳門人黎講等同澳門到離島)
呢四晚都係住同一酒店,唔駛搬黎搬去方便好多,酒店係沙巴的當地五星,唔係國際五星,所以客房服務會慢少少(導遊係咁講,但試過叫都好快,而且滿面笑容).
我地兩間房係連住同埋通架,所以好方便夜晚開P.放低晒行李睇真D,原來個廁所有個大窗開向房度,咦~今晚有野睇!嘻嘻~~如果係玻璃窗仲正!
(咪亂諗野呀,我意思係可以邊沖涼邊睇電視,咪心邪~)
襯同房沖涼,同隔離房未沖得涼的行下酒店周圍熟熟環境,泳池/小沙灘/私人碼頭/俱樂部.
嘩~同場加映萬里無雲的星空,點解係澳門未見過咁多的星星ge~唔通d星星只係專屬歌度?!係時候返房啦!
沖個靚涼訓個好覺,一洗僕僕風塵!明天首先去shopping!
Total用左:RM 0
二月十一日 (一覺醒來, 陽光好刺眼唷~ 這是夢景嗎? 外面是藍天白雲呢! 今早行程去sunday market, 下午跟團去紅樹林+螢火蟲)
Day two
0745起身梳洗,咁早起身為乜?咪就係為左酒店配套的五個私人泳池囉!睇黎一日一個都玩唔晒架啦.
0800點解個泳池無人遊水ge~唔通太早?本著敵不動我不動的教條,都係晒晒太陽吹吹海風就算啦!
0845酒店連埋自助早餐,梗要食飽d先出去shopping.早餐有好多款食物,奄列/印度薄餅/咖哩雞/香料牛肉/多士/炸薯仔/炒飯麵/好多款的面包西餅/果汁牛奶生果盤/營養穀類食物...實在太多太多選擇,記都記唔晒.
1000食飽飽係時候出發,目的地Sunday Market,坐的士大約十分鐘(RM10,的士無錶架,純粹睇路程收費RM10-15),呢個Market只開星期日朝早,過左一點就無乜野行架啦!好似祐漢街巿呀,只不過係地攤版.
有好多生果買呀~ 細版榴槤,正~好香呀!
買左二個榴槤*****(RM14,d核好薄好細粒,好甘甜,香味濃郁),
青皮芒果***(RM5,二個中size,似泰國青芒),
紅毛丹**(RM1.2,十粒倒啦,一般水準),
桔仔水****(RM1,清清地幾好飲).
1230行到好累,係時候搵食,沿途向北行大概三個街區,係大雅(Daya)酒店樓下的Little Italy食個意大利午餐. Hawaii pizza ****/ 寬條麵***/ 海鮮湯****/ 蘑菇湯***/ 飲品兩客 一共食左RM85,Pizza係最抵同最好味,必食推介.
1310食飽飽,去左對面的Wisma Merdeka行陣街街,順道係相鋪買左部水底相機(27張)RM39,商場入面有兩間找換店,如果唔夠錢駛可以係呢度換. 逛完就返酒店,1320返到酒店RM10.
1445約左導遊係大堂等,下午行程係旅行社安排的紅樹林遊船河+螢火蟲,對旅行社的行程唔抱太大期望,集齊人出發先去朱古力店(咪即係導遊賺我地錢的時候),Beryl’s牌,佢d朱古力一般般啦~ 不過都買左熱情果/菠蘿/咖啡味(75g-120g),平均RM20蚊一盒.一d都唔平!
大約1730到左紅樹林附近一間屋,落車飲個下午茶,有少少茶點,東甩*(好多油)/炸不知名的野*(好多番炸的油)/黃薑飯**(幾好味,少少辣),一邊近賞湖景一邊嘆茶,吹著微鹹海風,跟三兩知己談天,寫意人生呀!
還在沉醉於湖景已然起行出發,全船9個遊客(多左歌3個係其它plan)著整齊邋遢的救生衣.
(無錯呀,係邋遢呀,不過我地都好整齊咁著住,開頭都唔覺自己污糟,但係遇見日本團的閃閃發光救生衣之後,歌時先知我地有幾邋遢,日本人真愛門面功夫,我地唔同呢~ 大而化之),
我地個船夫好厲害呀~ 佢可以好遠就見到有長鼻猴,無錯係長鼻猴唔係長臂猴,佢地個鼻長到掂倒個下巴,開頭以為佢生腫瘤,後尾見隻隻都係咁先知佢個樣係生成咁,d長鼻猴一家家住得好分散,最多一次見到9隻,有大有細仲有手抱添!
係搵長鼻猴的同時,仲俾我地見到彩虹.
彩虹~ 好耐無見呀!有無掛住我呢?!嘻嘻~
而由於時間的關係,已然日落西山,向著東方而行,背後就是落日的紅霞,晚霞餘輝中我地一船疾馳返屋仔碼頭,準備晚飯後再出發睇螢火蟲,晚飯就係系下午茶的地方,有咖哩雞/辣蟹/炒菜/香料肉/湯米粉,算係家常便飯中規中矩咁啦.
食飽飽係時候出發睇螢火蟲,大約1850出發,原船沿河流而行,不出3分鐘,就看到河兩岸的樹上,滿佈點點聖誕樹的燈光.
導遊話: 呢d就係螢火蟲!下~ 唔係掛?!成棵樹都係螢火蟲?!我以為只會見到十零廿隻喳,點解可以成棵樹都係架?加加埋成千隻係一棵樹度,而且唔止一棵樹係幾十棵樣.係咪你地搵人裝d燈泡係度喳?昆遊客呀?
好可怕呀!咁多隻螢火蟲係度發光. 不過,真係好靚好靚呀!如果今日係二月十四就好啦!如果隔離歌個係你就好啦!哈哈~ 有人無得睇!
抬頭望向天空,嘩~ 好美的一幅星河圖!你諗下,澳門的夜空只有三兩顆星星,而呢度一抬頭,夜空中滿是星斗,獵戶座/雙子座/白羊座,閃耀晶亮的星星,讓我想起張哥哥的’明星’,唉~ 一代巨星殞落,為何選擇這條路呢?!題外話別過不提.
如果你有機會去玩的話,事先上網去天文館download一張當月的星空圖,最少係女朋友面前扮下有學識丫!嘻嘻~
在星空下看著螢火蟲,真的很浪漫,不過周圍好多蚊同埋黑壓壓一片,記得事前噴多d蚊怕水啦!
睇完咁靚的景之後,係時候返船屋碼頭,導遊話門口有間小賣部,有榴槤雪條賣,右邊的櫃係正牌左邊係翻版,認住TALUWANG牌啦!(RM1.5/條)我食左榴槤味,幾好味架,小蓮一路都唔俾我坐近佢呢.哭~~
2230返到酒店大堂,好累呀,不過又好肚餓!導遊話出面得d食海鮮的大排檔開,so 無出到去.留返係酒店食朝早買的榴槤.最衰小蓮唔鍾意食啦!攪到食榴槤好似做賊咁~ 返房又要刷牙漱口,好似人地係出面偷食要抹嘴一樣!
聽朝唔跟團去神山啦!聽講路程長又唔係咁好睇,中國有好多大山好過佢.而且網友話包的士去只需RM350-400/車,平過跟導遊,不過唔包食!
洗個白白好好休息,明天有重點行程唷~
Total用左:RM172.2
(由於有字數限制,所以要分成兩篇登出黎.唔好意呀,我好少寫到咁多字架,一時之間唔知點刪d字好,所以要麻煩各位啦!)
--上圖為酒店陽台景觀
文章定位：
