好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

   講倒轉來，讀我的冊有困難也無要緊；一个朋友講伊足認真讀，毋過，

一半篇讀著有較忝，竟然睏去。這嘛真好，這个時代，睏袂去的人真濟，

讀我的台文總是比食愛睏藥仔較健康。

‧《落西北雨的下晡》序‧

見若去彼間燒雞店買雞腿，我攏會順紲買一包筍乾；筍乾是用雞湯滷的，好食。  

筍乾的缺點是「長拖拖」；應當是筍乾一條一條剺*落來煮，無切；逐遍筍乾囥入去深盤內底，我著用鉸刀橫的、直的亂亂剪。後生講：「長拖拖？毋捌聽過這款講法。」我講：「我學阿媽講的。」

阮大家看我穿長裙，講：「穿長拖拖的裙，毋驚跋跋倒。」伊的講法和阮後頭厝的無仝，阮講「躼躼長」。躼，音lò。躼跤的*若貧惰，人就講鬥句：「跤躼手躼，骨力食， 貧惰做。」

不過，形容筍乾抑是長裙「長拖拖」比「躼躼長」較有畫面，敢若長到拖塗跤矣。

我講某乜人掠做家己偌本等，「其實嘛如此如此爾爾。」

朋友問我彼是啥意思？我講差不多是「譀譀*，普普仔」，可比：「講伊偌巧、偌精光，我看嘛普普仔爾爾。」

不過，講「如此如此」較活潑。咦，和英語的so so 仝款意思啊。

朋友約出去食飯，我講無愛，「今仔日，人無清彩。」伊講你是欲偌精彩？我講意思是精神無好啦，就是華語的『無精打彩』。

生活當中，總是會出現一寡較「奇巧」的台語。

這本《落西北雨的下晡》，和我第一本台文冊《驚驚袂著等》仝款，題材攏是日常生活。看畫展膨風講家己也會曉畫；和朋友討論連續劇；媽媽愛看歌仔戲，講古予阮聽；食泡麵的滋味；共台語講了足好的少年店員買柴砧；戇戇仔教拍電話來詐騙的查某人治感冒的祕方；世界瘟疫流行，覕佇厝內「關自在」；和同學佇公園做伙講古，看粟鳥仔那食白飯那踅踅念；佇群組分享煮麻竹筍的食譜；有歲的人「展」家己的病歷；和病友互相參考按怎對付坐骨神經疼等等。

寫台語較厚工，一个詞/一句話無確定，著愛查辭典，和朋友、姊妹討論，問專家。毋過，也因為用較濟工夫，寫出來的文字比華文的較實櫼*。而且，真濟積佇頭殼內底的台語，會忽然間浮出來；幾十年毋捌聽過的話，也雄雄走來我的指頭仔頂頭；予我我體會著「母」語的神奇。日常所思所想，若用台語表達，也較溫暖、心適。有這種感覺，除了彼是我少年時的語言，也因為大部份是阮媽媽和阮大家講的。

所以，寫短文，我就慣勢用台文，才閣有這本台文冊。

這本和三年前出版的《驚驚袂著等》有一个無相仝的所在，第一本的註解綴佇字詞後面；第二本，採納多數朋友和面友的建議，徙到逐頁的下面。按呢，內文較清氣，搜揣也袂困難。

逐頁標出來的註解真濟重複，可比遮爾（這麼）、遐爾（那麼）、囥（放）、揣（找）、佇（在）、佮意（喜歡）、蹛（住）、順紲（順便）、兜（家）、綴（跟）、紲落去（接下來）、覕（ 躲）等等。

若是學會曉遮的基本用詞，讀我的台文就無困難。這兩年，台文作品的出版有較興，予我有一个樂觀的期待：有一日，毋免附加註解，逐家攏會當輕輕鬆鬆讀台語文，佮讀華文仝款。

講倒轉來，讀我的冊有困難也無要緊；一个朋友講伊足認真讀，毋過，一半篇讀著有較忝*，竟然睏去。這嘛真好，這个時代，睏袂去的人真濟，讀我的台文總是比食愛睏藥仔較健康。

 

剺（lì ）：撕

躼跤的（lò-kha--ê）：高個子

譀譀（hàm-hàm）： 虛幻

實櫼（tsa̍t-tsinn）：紮實

忝（thiám ）：疲累