好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

我推薦Y看的連續劇，起先伊若無佮意（kah-ì，喜歡），會講，「咱兩人的路數無仝。」

後來，無咧客氣，對我欣賞的劇情抑是演員的表現無贊成，竟然講，「按呢就予你呵咾甲觸舌？予你佩服、感動？你實在毋是普通的天真無牙啊！」

二三十年的朋友，伊早就講我袂曉看人，好騙：事實也證明伊毋是全然冤枉我。我的反應較鈍，有時人膨風的話，甚至畫山畫水，我也聽甲耳仔覆覆（趴趴），足欣羨，足欽佩；可能愛過一段時間，才會「雄雄」覺悟。毋過，這陣因為看劇，伊按呢講，我就不服。看戲的感受無仝，真正常；人有感性、理性，對戲的體會和判斷自然有精差。

過後，想著予伊講我「天真無牙」，忽然間想著「牙」原本的字按怎寫？當初，綴（tuè，跟）朋友按呢講，感覺真心適；無喙齒的囡仔，用來形容天真，足合，足古錐。講幾若年，竟然袂記得伊原始正確的字。這个詞是uì（從）華語來的，敢本來是『天真無涯』？無涯表示無限、無界線，講會通；毋過，想來想去，猶是感覺毋對。

暗時，後生轉來，我問伊『天真無牙』的牙是佗（tó，哪）一字？伊講無聽過這个成語，「一般攏講『天真無邪』。」

著啊，當初朋友刁故意有邊讀邊，共「邪」念做「牙」；講幾若年，講了紲喙（順口），我竟然袂記得伊本來的字。

敢若人講的「白白布予你染甲烏」，一字「邪」予阮講甲連耳仔都無去、失去伊應該有的面目啊。

《聯合報》副刋2021.01.28