不如改名做月記吧!一個月一次寫晒，哈哈~~
3.7.07,星期二. 「苦力」
放假後的第一天，就要一早起身入屯門，做我第二次的「回歸苦力」!去屯門九巴廠隔鄰的一棟工業大廈取第二批「慶」回歸禮物。今次同上次一樣，要出動大貨車，同樣要同埋基民一齊去，雖然批貨比上次易搬o的，但亦足以搬到我們傻，因為天氣炎熱嘛!今晚做到成八點九先收工，十幾個鐘呀，再加上上晝的體力勞動，真的倦死人呀!
4.7.07,星期三.
美國國慶日，放工後應該去過街，因為簽簿記錄是七點便走人。
5.7.07,星期四. 「職員會」
今日一早起身七點半便返到中心開工，因為很多o野要在老細放大假前清，重複，是老細放大假，唔係我!自己放大假就話清o野，現在是老細放大假喎!各位打工仔明o架啦!連埋開職員會開到九點幾，一個對有突啦!好倦好辛苦哦!
6.7.07,星期五
今朝同樣早起，七點便返到中心開工，一樣是趕o野呀，連埋開夜做看更，又係十幾個鐘呀!倦死人啦!
7.7.07,星期六. 「表演」
「七．七盧溝橋事變」七十週年，不知多少香港人記得七十年前的今天是我國正式展開對日全面抗戰的日子呢?......大眾成日話要愛國，七．一慶回歸又係搞愛國，但有多少人認真去看歷史，認真看看國家從前發生了什麼事。大陸共黨常常說自己的軍隊怎樣那樣的抗日，在對日戰爭中如何神勇如何取得成果、勝利，但只要認真細讀歷史，便知道新四軍、土八路和一群中共游擊隊，抗日時所扮演的角色。我不是說他們沒有「貢獻」，只是國人應該清楚，當時的國民政府、當時的政府軍--國民革命軍在正面戰場，何奮勇轉戰全國各地，所羲生的、所付出的、所消耗的，最後為國家帶來勝利，是不能磨滅的...續後中共所做的一切不談了，我只想國人真正認識歷史，知道歷史的真常，搞懂什麼是愛國，不要麻木的亂愛一通。
今日是短週呀!但同樣要開工，帶太極班的部份學員到屯門表演，又係什麼慶回歸活動。表演得短短的五分鐘，但車程一來一回卻用上三個鐘，唉~~~帶完隊，去了沙田食o野逛街後才回家去。
8.7.07,星期日. 「入伙酒」
今日又係入屯門呀!因為要搬o野入細佬間新屋，順便同舅父佢地飲茶，帶舅父上新屋坐坐，然後夜o的再出番尖沙咀同寶尼一家人食入伙酒。
就此，我有很多心事，尤幸有阿Mon、Miss、Madam清楚我、了解我、明白我，但這一切我害怕給一些知，怕他們覺得我無用，尤其...我最在乎，縱使我什麼也想讓妳知，但總害怕妳覺得我無用無出色......算了，我要學懂堅強和努力，希望有朝一日是我帶給妳幸福的...藏進盒子裡。
9.7.07,星期一. 「一人一劇場--人生片段」
今日又係一早起身七點幾返工，老細最後一天向中心了，所以有什麼都盡量今日趕，結果趕到差不多七點才走人。原本基民約了他的朋友七點在旺角集合，食o的o野後先坐小巴過土瓜灣的，結果我們要在旺角會合了他的朋友，然後坐的士過土瓜灣，好趕忙的食個老麥包，再會合阿珊和他倆的另外兩個朋友先，緊緊八點準時上到表演場地，欣賞一人一劇場表演。我都係第一次睇一人一劇場這種話劇表演，雖然個人連日工作好倦，但演員精彩的演出，以及三位觀眾的故事的部份片短，使我勾起一些往事回憶，觸動到我的心靈，本來已經疲倦的我，大腦仍能給這些牽動，可想而知如果我是有能量兼在狀態!哼~實行喊都有份呀!完場前司儀問在座觀眾會為今晚的表演起一個什麼名稱，我說我會叫他「人生片段」，因為在不同的故事裡，不同的人和事，也可找到自己過往的一些片段。
11.7.07,星期三. 「五常法」
五常法呀!又係死人五常法啦!今朝九點要入到元朗上五常法綠帶訓練課程呀!我知道五常法是好的，但我討厭應用在人手不足、資源不多的社服單位上!如果我工作的是大企業、是做生產的，有收入、講盈利的，我一定舉腳支持，因為大企業可以有足夠資金和聘用人手，為五常提供專門的支援，其他員工可以在五常法下十分有效率的工作。如果社服單位也有充足的資源人手提供五常支援，同工定可在優良環境下工作，提升服務質素和效率。但可惜是已在人手不多的情況下，已經要處理原有的煩重工作，現在再要加上要花時間在這一項「非對人的工作」，對於以人本為工作產出的社服行業，如果是沒有充足資源支援，實在不宜推行五常法。但是管理的管不了這些，這是好的便要推行，你們做到o既就即係可以做得到，沒理由不推行...哼~我只有冷笑與苦笑。
12.7.07,星期四. 「五常法加班(開會)」
今晚又係五常，因為昨天上了課，所以今晚原定做執o野的，結果變成了先開會傾，結果一傾就傾到成九點幾，不過我覺得這一傾對整個工程絕對有幫助。開完會，大家去了德記食飯，好味好味!
14.7.07,星期六. ”東大門”
今日收工林小姐約了去東大門食韓國燒，因為想食多o的o野，所以我搵埋我阿媽同我阿妹去食，食完還去了老麥坐低試了林小姐的「拿破崙」蛋糕，但...大家明啦，後來回家老爸才知是什麼原因弄成這樣...好硬呀!
15.7.07,星期日. ”聚舊”
今晚相約了Sally同Oli.到齡記打邊爐聚舊，因為她從新加坡回港一個月呢!唔講都唔知原來Oli過了新加坡生活差不多一年。今次見她大個女o左、成熟o左，少了從前的一點稚氣，因為人畢竟是會長大的嘛!食完飯，行o左陣上了我最愛的Snoopy Cafe，食注甜品飲注o野傾計，傾到差不多成點幾先走人，真的好高興。不過經這一別，可能又要等一年再從聚了。
16.7.07,星期一. ”國之重寶與哈利波特”
是日放假，下午一個人出尖沙咀想話睇「清明上河圖」，但去到先知每日名額有限，網上預售亦早已沽清，唯有每日三百個的walkin位，但要未開門就去排隊買，咁簡單講即係無得睇，那只好欣賞其餘十五件國寶啦!不知是不是近年港人的文化素質真的提升o左，繼我上次發現公共圖書館平日都超多人外，原來連藝術館平日都一樣咁多人，不單上河圖睇唔到，就連要睇晒其餘十五件展品，件件都要排隊睇兼用上一小時有多，真的厲害!這一睇使我沒時間去商務找開電腦班的書外，還差點連睇哈利都要遲到。
今晚是韓莉燕約睇哈利波特的，但點知她因為做物理治療的關係，變了超級大遲到那個。我和陳生張生都準時去到，但點知骰仔來電她仍在沙田等做物理治療，她要遲o的到，那麼我知好放低著飛比門口職員，待她自己入場，但可惜的是她向套戲完場前45分鐘先趕到...唉~睇多次或等出碟啦骰仔!
睇完戲，去陳生介紹向朗豪food court的唔記得咩o野名食牛牛，味道都不錯的呢!
17.7.07,星期二. ”又係五常執執執(一)”
又係討厭的五常法，我都唔記得做過幾多有關佢o既o野了，今晚又o黎執，尤幸有一班原意落手做的好同事，大家嘻嘻哈哈開心的做，做到夜夜都唔怕!
今晚連阿敏老公仔阿健都o黎埋幫手，大家簡單的上二樓食過飯後繼續做，辛苦都無所謂。
18.7.07,星期三. ”新手機S500i”
今晚陪林小姐出旺角取她早兩日訂的新手機S500i，她訂的時候我都想訂的了，因我阿妹比我個部N73近日成日當機，但見未有現貨，所以還是考慮o下先，但沒想到隔了兩日就話有貨了，於陪佢取的時候見到真的心郁郁，於是決定買，但點知很有原則的衛信堅持要將批機留比訂o左機的客人，那我知好去試問第二間，結果給我在領先遇到最後一部黃色，故我二話不說話要!我都未試過買部手機咁快作決定，平時總是要研究比對一餐先得，可能係因為部機的外型和顏色真的好吸引掛!
買完機，又係去我的飯堂「活壽司」，不知何故今晚成八九點去都咁多人，要等好耐先有位入呢!
19.7.07,星期四. ”又係五常執執執(二)”
今晚又係執啦!不過今晚我提議畫下底線，指明做到八點就走人，因為一來唔想住得完的同事夜走，二來大家近日咁做都倦了，再係做咁夜大家都會捱唔注呢!所以今晚做到八點幾便關門走人了!
21.7.07,星期六. ”清明上河圖? & 不孤單的書展”
星期六，短週，部署好一早起身，七點幾出到尖咀排隊買飛入場睇清明上河圖，因為宋代張擇端的真品展覽至明天咋，但可惜的是排到十點鐘，o的飛賣晒了，如果要睇明天是最後機會，眼見持全年通行証的隊比齋排的隊短，於是決定即時申請番張，明天再早o的黎排過。但萬萬都想唔到，想話入太空館有冷氣涼，兼估佢人少好快搞點，但結果亦用上一個鐘有多先排到做我的證，雖然又係等兼搞到我食唔到「早餐」(因所有地方11點後無早餐賣的了)，但這兒是即時取證，比藝術中心要等兩個鍾後返去取好。因為我今天計劃行程，是去完尖沙咀後，便坐船過海去灣仔書展的。結果搞到十一點幾成十二，我隨便的在星光行食碗麵，便坐添丁小輪過灣仔(我最愛坐船的)。
過到灣展，照例場外買o左飛先入場，(今年這樣做我是絕對明智的，因為後來沒有約定的陳生，即場買飛要用上半小時打蛇餅才能夠進場呢!)，入到去，發現一樣咁多人，又話地方大o左無咁迫，咪又係差唔多。行o左無耐，陳生就打o黎問我是否在書展，他正在上o黎呢!我們七子的約會已經變得隨機和不用遇早約的，很自然大家就在附近，一個電話緊有個向左緊。結果原本一個人行的書展，多了陳先生，亦因為多了陳生，行耐o左，結果等埋晚點入場的張生、發仔和阿花，最後一行五人一齊行，行畢，再加上我「鬼馬」地預約的骰仔一起去食飯，最終一人活動變成了六人呢!不過人齊六個的時候已經是晚上九點幾啦!我由上午六點幾出發，除了是中午向星光行坐低食碗麵坐過外，直到現在才有得坐，雙腿真的超級勁倦呀!
今年書展，我好叻呀!只買了九本書，十本都無，不過我今年亦是第一次出動了手拖行李箱，真的舒服好多，不過唔知點解人人都拉車，係我這架常常撞到人，不過我想是箱的關係，因為這個行李箱是我問張先生借的，哈哈~!
22.7.07,星期日. ”隨緣”
昨晚去完書展食埋飯，返到沙田已經又夜又倦，所以我和張先生都揀坐的的返穗禾，就在這短短的車程上，給我聽到信相是佛教的故事，聽完這故事，我決定了今朝起唔到身去睇清明上河圖唔緊要，一齊隨緣便可，因為上天或許有所安排，去北平睇、去別的地方睇也唔定，一定有衪的原因o既!
由於昨天真的消耗了不才能源，所以今天沒有安排什麼，晚上只是同家人去黃家沙食飯便是，沒有什麼呢!
23.7.07,星期一. 「旗桿」
只記得放工專登出旺角買伸縮旗桿，明天睇波用。有三面旗，所以買了三枝，good，希望帶到入場啦!
24.7.07,星期二. 「利物浦(1)」
Easy Livierpool!!等到啦!等到啦!等到利物浦再一次訪港啦!今日少有地四點半準時收工，然後回家沖個涼帶齊裝備，急步的往大球場進發。有什麼裝備?(以下全是利物浦的)最基本主場球衣一件、最新版鴨咀帽、頸巾四條、三面旗、最新單臂袋、方型毛巾，還有場場陪伴我們，連上次防港都有同埋一齊去睇的利物雀!最早到場的係細佬，因他在灣仔返工，跟注到我，然後細妹，最後係細佬個friend ”J臣”，他從大陸趕返o黎香港，最初驚趕唔切，不過好彩頭場未踢完他便到步，咁即係趕到睇我o地場波啦!
今年和往年一樣，大球場變o左Anfield咁，雖然我們坐的區域不是球迷區，但我們四個坐埋一齊已經是一個超級球迷區了，納喊高叫少不了，還有我三面隊旗飄揚，再加上三個入球，簡直令我們和全場球迷興奮呀!這熱鬧高漲的氣氛不單只場內，在離開大球場時，在孔聖堂中學門外，有一群樸記的鬼佬球迷正與數名勢孤力弱的球迷鬥唱歌，我同細佬見竟無其他行物浦球迷幫「口」，我和細佬便即高唱會歌，頓時減弱了那班樸鬼的氣焰，哈哈~~真的好開心好有氣氛呀!當去到地鐵，在車箱內又遇上一群外國球迷，其中一人問我們今晚踢成點，我同細佬當然叫好啦!但點知問我們的外席人士問完，他回應我們他是支持南華的，真係笑死我o地!點都好，今晚過得真係好開心，期待快o的到星期五晚。
25.7.07,星期三. 「又係五常法」
又係五常，又要入元朗，唉......努力啦!!
26.7.07,星期四. 「假期」
做o左o的咩呢?一定有出旺角，還有去銀行，但詳細真的記唔起。
27.7.07,星期五. 「利物浦(2)」
今晚專登推了看更工作，目的只有一個，當然係去睇利物浦啦!由於今晚是決賽，是重頭戲，大球真的變了Anfield，鋪天蓋地都是紅，會歌、口號唱不、叫不停，搖旗納喊的人比上場多好多，球迷亦比早幾日有組織好多，如果唔係隔離左右大部份是香港人，我真的以為自己向Anfield。
今日細佬妹都請了假，惟我有班在身請唔到，所以照樣四半準時收工回家取行李出發，但由於多了我的好妹妹「一齊」出發，所以今次比上次還遲了出門口，自然去到比上次晏了，不過頭場對我們唔重要，無所謂啦!去到球場，先是買點吃得，然後食飽飽等睇我o地場波，但開波前發生了一件唔「老黎」的事，就是有人向我隔離倒瀉o左汽水，害我弄污其中一面旗之餘，結果還弄至和波收場要踢12碼，最後還......如果不是這賽果，今晚的氣氛會是更熱鬧和推向另一高風，但可惜...不過今晚始終是一個奇妙的晚上。
散場時在南華會門外，再遇上我相信是一位業餘攝影師，他在球場內已經影了我一次，沒想到場外再給他捕捉到，今次我在他的攝影機前高叫了EASY LIVIERPOOL和高唱會歌You’ll never walk alone....
今晚細佬的老友建議了大家儲錢親身去Anfield去睇主場賽事，yeah!
28.7.07,星期六. 「UCC」
今日收工同Janice和魚魚陪林小姐買新衫返新工，還有去了UCC食飯。好倦，因為昨晚睇波用了不少精力。
29.7.07,星期日. 「變型金鋼」
今晚我們七子(少了阿青)相約去寧記打邊爐，臨時加插了食完飯去睇變型金鋼，真的非常好睇，雖然坐第四行睇得好辛苦，但一樣咁正!睇完還去了石磨坊食甜點，好味!
臨入場前，向扑死你買了兩件新衫，難得有我SIZE呀!
30.7.07,星期一. 「買新衫」
由於昨晚買了兩件好合身，於是放工再去沙田店買多兩件，無意中發現Simpson T都有我的碼，於是買多兩件。亦由於以上動作，所以我回到家掉了一批舊衫。
31.7.07,星期二. 「國之重寶(2)」
今日帶隊去睇國之重寶，總算有幸睇到明朝仇英版本的「清明上河圖」，雖然觀賞時間真的好短，但都是親眼看見，已經好好了，希望遲o的有機會可以親眼睇到張擇端的真跡啦!其實今次帶隊還有收獲，就是睇到「骷髏幻戲圖頁」和「步輦圖卷」，不過真的是工作關係，只能有時間睇到上述三副，真的要睇睇11號前有無時間搵日再睇埋餘下未睇的。
號外:近日有位「小朋友」到訪夢星雲，引起了本人和各方好友的關注，究竟小朋友是誰?遇到什麼唔開心的事呢?
我是真心的想幫到他，但同時和大家一樣想知他是誰，奇怪地我不少好友都想知道他是誰，「小朋友」，究竟你是何許人也?
文章定位：
26.7.08 "出發啦!出發啦!準備出發啦!, (chausze)