好きになっちゃて～～（取自木村某廣告對白）
上星期五晚，睇到報紙至知，佢地決定２０週年之後至會再一齊表演。所以呢三年內，香港呢場就係佢地最後一次海外表演喇～
超級後悔點解唔一早買飛。於是展開瘋狂尋人活動，不過，俾朋友逐一擊沈‥‥就連細佬都蝦我，啋我都傻～～（＋口＋）
不過，天父往往在我最失落既時候就會賜我奇蹟，我第一個邀約既朋友於下午５點鐘佢訓醒既時候，先至見到我既留言及追魂ｃａｌｌ，於是差唔多求佢咁濟問佢去唔去，佢竟然話：咩黎架？唔識呀﹗不過你想去睇既話，我陪你去啦～！
於是上網搵有冇人讓飛，因為平好多麻。當時離開場時間只剩兩個多小時，結果，梗係冇啦，玩咩？時間一分一秒地流走，已經超過６點喇。不過基於終於有人陪我去既關係，所以用番最原始既方法，打電話俾原價訂飛。亦都又係基於終於有人陪我去既關係，我俾得大份Ｄ…
朋友仔住我附近，於是我訂好飛後，拿拿聲叫佢換衫，再一齊坐的去青衣城食野，順利於７：３０坐到機鐵入去—亞洲博覽會。
好多人呀～～好多騎呢人添呀～好多唔同國籍既人呀～好多賓賓添呀～簡直去左一個嘉年華會，我都入場前買左一隻新大碟，因為有送埋ＰＯＳＴＥＲ同個ＦＩＬＥ套，影得好鬼正。
入場前搜袋，我建議大家放條毛巾同埋大荷包落個袋度，因為Ｄ人唔會伸隻手入去搜相機，而我就成功左喇。上面三張都係我影既。
入到去我個位，好近好近呀，因為我個位雖然係樓上位，但係個距離就係第一區區尾，仲好過坐下面，因為下面冇級，實俾Ｄ死人頭遮住。因為我８：１０左右至入到場，所以差唔多８：３０就熄燈喇。
ＹＥＡＨ！！！～～～～～
基本上兩小時冇停過係咁唱唱唱，冇換衫，唱幾首就有講野時間，但竟然一句日文都冇講過，每人全程都係講成段廣東話，仲超級好笑。佢地每講一句，我地都大叫，因為真係算講得好好，冇字幕既情形下都聽得到佢地想講咩：
ＨＹＤＥ：大家好，終於黎到香港Ｘ３（因為講得唔係好順，所以佢自己係咁ＲＥＰＥＡＴ）。雖然中國發生地震，但係希望你地今晚可以開心番Ｄ。無問題？無問題？無問題～～～？
ＫＥＮ：我一上飛機，就食左飛機餐。之後去到酒店，又開始肚餓，於是食左三文治（呢個時間有張相影住佢擘大口想咬三文治）。之後去食晚飯，（影住酒樓一圍空檯，ＫＥＮ張開手坐），條魚好好食，但係佢成日望住我（影住個魚頭擘大口啤住鏡頭），隻雞都好好食，但係佢又望住我（影住個炸子雞頭擘大口啤住鏡頭），你地唔好望住我啦～（影住兩個頭係咁啤住鏡頭，一共三張相，越影越近）哎呀，離左題添。都係講番演唱會喇，………（之後講極都講唔正，於是發脾四掟貓紙扮走人）
全場已經笑到抖唔到氣，我隔離同後面既阿燦都問我ＫＥＮ講咩野，好彩而家都仲記得，真係笑死人喇。
ＴＥＴＳＵ：你地有冇人想要我隻香蕉呀？（大家唔好心邪，原來佢每次表演都會拎條～～生果香蕉出黎，表演香蕉彈結他同飛蕉）
ＹＵＫＩＨＩＲＯ：（唔記得，最短，好似講左三句就算）
ＨＹＤＥ：我尋日食左皮蛋，我決定以後都唔食（哇哈哈…）。
我本身唔係好識唱佢地既歌，但係佢地Ｄ歌真係好正，果然係日本樂壇班霸。而且日本樂壇班霸竟然為左ＨＫ係咁講廣東話，又唔講行貨野，真係好難得。
我聽番細佬講佢地去上海台灣都冇講咁多國語，而且有一首歌，其他三個人仲輪流ＳＯＬＯ，ＨＹＤＥ仲幫隊友伴奏彈結他添，呢樣好似其他場都冇咁做。太感動喇～～
之後第一次入晒去，大家叫左一陣ＥＮＣＯＲＥ之後好似掛住玩人浪，都冇理到佢地。今次人浪好好玩，因為係由台前，一直浪到去最後上山位。順利玩完大家都狂拍手叫囂。有一次好似玩到大家都累就中間斷左，結果係最尾Ｄ人自動玩番上台前，勁正！之後睇番Ｄ人講，原來飛落海阿東都有一齊玩人浪，後來至知佢係坐第八行，我嘗試過搵過下面都見佢唔到，冇計，太遠人太多喇。
（呢張都係我影既，我覺得最好都係呢張，無計，個台係咁震，影出黎既相好多都睇唔到。）
當我地仍然沉迷玩緊人浪時，４子都無啦啦走出台，我諗佢地都估唔到ＨＫ原來唔興叫ＥＮＣＯＲＥ。哈哈！之後我地坐看台既，全部都好大力踩個台，彭彭聲，幾驚會踩爛。
之後唱多幾首就走喇，冇再ＥＮＣＯＲＥ。Ｄ人話當時其實如果大家一齊再叫ＥＮＣＯＲＥ既話，佢地會出黎架，只不過太多人走去買紀念品所以隔左兩分鐘之後都開咪宣佈完場喇。而阿東都已經臨ＬＡＳＴ首歌完前走左喇。
之後排隊買紀念品，逼到抖唔到氣添。我ＦＤ佢攝下攝下，俾佢早先過我買到兩件ＴＥＥ，好彩佢讓多一件俾我，哈哈，好彩細碼著得到。真係好鬼正呀，因為係寫明係ＨＯＮＧ ＫＯＮＧ，又有海馬標誌，唔知仲以為係海洋公園既出品添。
今次真係好貴，不過真係畢生難忘，燈光又正，紀念品又正，歌曲又正。同埋成場企，你係搵唔到時間可以坐低聽歌，實在太ＨＩＧＨ喇。真係咩都抵番晒～～～
唯一失望就係：
文章定位：
