原本尋日遞信，連信都整好晒，入埋信封，諗住返去就俾佢啦﹗點知佢兩公婆一直都未見人影。其實全公司都知我會尋日辭職，所以佢哋都笑話：可能知道妳會唔做，就特登唔返，唔駛收妳封信囉﹗哈哈﹗結果上晝大家好自由地傾計，我仲成日走去睇師傅學裝錶添﹗
食 Lunch 之後，先至見老頂間房著咗燈，但係因為趕緊 D 手尾，唔得閒理佢。到差唔多 5:00 時，萬事俱備喇，點知聽到佢把聲超無氣兼冇精神，大 C 話佢兩個好似成晚無瞓咁，今日又著到成身黑；老闆娘平時都唔飲咖啡，今日都叫人沖咗杯俾佢飲。我哋兩個諗唔知係咪老頂個老母有事，搞到兩個都咁既樣。我就諗諗下呢個時間遞信會唔會激死佢呢﹖大 C 都覺得不如下個禮拜先會好 D。咁於是，封信就擺喺個櫃度先喇﹗
6:00 走去佐敦食中日料理，不過間嘢好貴，而且好少日本嘢食。於是我哋都係叫中餐，一羹三餸，包甜品紫米糕加西瓜，四人每人 $112，OK 啦，都幾好食。之後同朋友兩個（另外兩個之後返學）一直傾見工技巧，佢教我英文，我教佢普通話，咁就 12 點至返到屋企喇。咁我將來 Interview 英文就唔駛咁驚喇，因為我都係衰喺英文度咋﹗陰公﹗不過佢同我講，如果辭職既話，Last Day 點都要返埋星期一先，以免佢賴帳，計少一日星期日，橫掂最後一日返去佢都唔會俾嘢妳做，都係坐喺度啫，穩陣起見如果下個禮拜遞信既話，12 號遞啦﹗唔…咁又係，都唔爭在，好過俾佢捉字蝨。OK﹗意見接納﹗一於 12 號（咦﹖阿媽新曆生日正日）再一次辭職啦﹗
文章定位：
