今次見番佢，冇上次咁緊張，好似只係見番個老朋友咁樣。正確嚟講應該係見番個 1 年零兩個月冇見既舊朋友。完全冇諗嗰方面既嘢，我覺得好似放低咗個重擔咁。雖然我今次去都有打扮過，不過只係戴咗新買頂 CAP 帽咋，連化妝都費事。可能已經覺得唔需要啦﹗我知以上講既嘢好廢話，我唔知點講俾大家聽嗰種所謂豁達感。我諗我已經去到呢個化境喇﹗快 D 恭喜我啦﹗
今次唱歌我唔再坐喺同一個位，差唔多我係周圍坐，滿場飛，而佢都係坐梗一度。
不過我覺得佢同我一樣，今次比上次都係自然咗好多。原本我唔知得番 4 個人佢都會出嚟架，係我出去之後 Rita 話俾我知佢哋要等埋 CP 至出得嚟咋，所以我都有啲意外，仲又係玩到尾至走。我唱日文歌時，佢又係講嗰句：『妳亂唱都冇所謂，我哋都冇人知妳唱錯。哈哈﹗』得喇﹗同一句唔駛講兩次既﹗我都好彩冇衰俾佢睇。嘻嘻﹗
今次特登叫 Rita 唔好叫細佬出去，係因為佢一定會拎住個咪唔肯放手，試過兩次都係咁，而且上次事件，我知道 CP 佢唔係好鍾意當其他人（尤其係 Rita）唱歌走音時，細佬就會望住我。所以上次佢唱咗兩三首之後唔肯再唱，可能係怕細佬會笑佢啦﹗結果今次冇咗細佬喺度真係好好多，唔止 CP，我哋大家都可以盡情唱，走音都冇人笑。不過阿婆好慘，好似俾 Rita 食住咁，成日俾佢窒住，難得阿婆又唔發嬲，笑笑口咁繼續唱。好﹗下次問吓 CP 佢哋既嘢。橫掂舊公司都傳我同 CP、Rita 同阿婆啦，算係當同 CP 佢有個新話題囉。
其實之前一日（星期三）我有打過電話俾佢﹗因為我見到返咗張 Quotation Fax，係老闆要買 Symantec License，咁我咪靜靜雞攞咗去，打電話俾 CP 問佢價錢有冇唔同囉﹗佢都好意外點解我會做埋呢樣（問 License 價），結果佢報既價同張 Quotation 一樣。但由頭到尾我冇講俾佢知我老闆已經同人哋拎咗 Quot.，又冇講佢知人哋俾咩價，因為我知佢唔鍾意為咗攞到張單要佢平一兩蚊咁 Cheap。既然一樣我都冇同老闆講我問過舊公司既事，就咁俾番張 Fax 俾佢算數喇。今次當係俾佢知雖然我俾人兜咗出嚟，但我仲會幫佢哋，冇忘本囉。
有一樣題外話，唔知係咪諗得太多，星期三瞓覺發夢我竟然夢到：…
CP 同阿 Wing 拍拖﹗﹗﹗
我仲同佢哋兩個去唱 K，中途俾阿 Wing 拉咗出去。我想問阿 Wing 佢哋點樣喺一齊時，突然自己紮醒咗…
聽日媽咪去攞新屋鎖匙喇﹗我最衰要返工睇唔到新屋。呢樣要遲啲至報告喇﹗
文章定位：
