唔止我爸爸，連同事都曾經懷疑我係唔係真正休息，股票戶口一股不留……
-------------------------------------------------------------------------
兩星期前對2800盈富基金定o既目標價HK$30.1，已經連續2日都出現過；後市我始終覺得Risk Management為上，寧願錯失賺錢機會，都唔好增加自己蝕錢o既機會。
爸爸覺得銀行定期得4厘以下利息太低，基金唔保証賺1倍唔免認購費贖回費唔買，寧願炒股票。
我就覺得銀行做低風險資金避風塘唔錯，所以我都有6份細額港元1個月定期，息率為2.199%、2.45%、2.5%、2.55%、2.75%同3.05%，以增加休息期間o既淨利息收入；亦o係大新開多個i-account戶口，享受較高Saving Rate。
買2809領先商品ETF做分散投資風險都唔錯，因為ETF免認購費，直接追蹤Reuters/Jefferies CRB Index Future (CR-Y.NYB) ，可以較低o既入場費（50單位1手）、較方便快捷o既方式分享商品價格上落帶o黎o既機遇。
o係豐明o既日均成本法買入紐元，依家受惠於紐元維持息率不變言論而抽升，暫時回報逾1.9%；雖然日元短期上升機會較大，但仍然相信澳元紐元能以其維持高息能力而不會過大幅度下滑。
-------------------------------------------------------------------------
1893中材招股，阿蚊都決定進行第一次IPO。
雖然公司為水泥終合一體化生產公司 [有齊上中下游] ，但由於其水泥設備生產業務佔營業額超過68%，所以對業績影響甚大。雖然o係中國o既市場佔有率高達90%，但上游業務o既特點，在於行業下游大旺不等於上游大旺：因為下游公司可能已有足夠設備生產水泥，未必需要買新生產設備；亦要視乎下游公司對Market o既expectations，如果預期行業週期見頂，就更加無公司買新生產設備。
例如522 ASM太平洋同243 品質國際旗下o係Nasdaq上市公司ASAT樂依文（ASTT），都係半導體設備生產公司 [上游]，981 中芯就係中國最大o既半導體生產公司 [下游] ；不過面對過去幾年半導體行業大低迷，命運各有不同：ASAT樂依文同中芯不斷連年經營虧損，股價下滑；ASM太平洋就大賺特賺，連年派高息。
唔否認，我對上游公司o既分析能力，可以話除o左石油公司以外，我都不予致評。
中材同時係全球五大玻璃纖維生產商之一，有利分散風險；唯債務過份集中於短期債務，如果國家經濟逆轉，客戶無法找數，就對公司Cash Flow有嚴重影響。
-------------------------------------------------------------------------
瑞銀建議吸納2隻本港中小型銀行股，我會覺得只可以超短線炒1轉。
本港中小型銀行股，其盈利仍然主要集中於淨利息收入，尤以樓宇按揭為主。
按揭之收入，在於估價費（如有）+火險之非利息收入（如有）+以長息借出樓宇按揭貸款後，不斷以短息（1至3個月）於銀行同業間借回，賺取息差。
依家o既按揭息率約4%，但銀行同業拆息1至3個月均高於3.8%，仲有幾多利錢剩？早兩個月更加試過按揭息率為約4.5%，但銀行同業拆息1至3個月均高於4.8%，仲有錢賺？
唯有向街客著手吧~活期息平均低於2%，有較高利錢；不過中小型銀行o既Saving銀碼唔大，唔夠支持，要由定期搶錢。不過1至3個月定期息去到3.77%，銀行對街客成本約0.25%至0.5%，仲有幾多利錢剩？
不過，定期高息有可能係到年底，銀行要多o既Cash做靚年結盤數。
如果銀行班Financial Seller，努力跑數狂Sell基金保險，或者份非利息收入足以支持業務增長。
我個人意見係：唔好掂，除非PE過低（低於10倍）。
文章定位：
