我今日無乜狀態，打文章點到即止，講唔到乜野出黎(雖然平時都無乜野講到)
而且，書面語確實唔夠廣東話精彩，廣東話我可以同你講夠十萬字世界天文地理，書面語寫一百字我最多講到你知我今日放左個屁。
對唔住，我講野真係好「俗」，因為我個人本身都好鬼「俗」，咁又點能夠要求我講到D「清流」講o既野出黎呢？
希望你地唔好睇到我個人咁鬼垃圾，講埋D野更加垃圾而憫起上黎，真係老實講句，正所謂「爛泥扶唔上柄」，唔好要求咁多，我每天但求搵啖飯食下o者。
講開又講，琴晚講電話講到凌晨四點真係非常高興。我覺得呢次通話係我呢幾個月黎最開心o既一次，原因在我真係講到好多心底話俾一個我信任o既人聽。其實我係神經質來的，任何野我都鐘意同人分享，而好不幸地，愈同我熟o既人就愈打得多次電話俾佢，最後好多人都嚇到唔敢聽我電話。
又離左題，言歸正傳，當你發現食檸檬，俾女仔拒絕原來唔係一件好鬼難堪o既事時，人生確實都唔係好差o者。鐘意一個人，當暸解左佢o既性格，價值觀，思想，(當然要睇埋佢有唔有錢)同你夾得黎，不妨去馬，如果又要驚乜驚物，咁你就不如返屋企訓覺算，做人要有「吉士」(guts)，無guts就不如去食屎。
可是，係香港呢個地方，你要知道你遇到的人，好多都唔係好人。所以，你如果真係拍一次拖之後就共諧連理，真係要講句恭喜！因為，你好好彩，條友無呃你錢呃你感情呃你盒麥精，已經難過中六合彩。重要佢專一六年七年捨身贖命(即係脫離父母管治)同你結婚，堅貞不二，咁樣你話你唔係好命水，邊個信？
又又離左題，我只係想講，遇左個好男仔或好女仔，就唔好放過，唔好殺錯(拿！呢句就抵死！前面個句係想講「不可放過」，後面個句係想講「不要殺錯人」，最後廣東話「唔好」兩個字就混淆左，問你吹漲未！)否則，你有一時三刻o既後悔，就係你戇居！正如上年你唔炒股票，只係羡慕人地賺錢，係你戇居；今年你先走去跟人炒股票，俾人串你做左大閘蟹，都係你戇居！所以，見到好o既，而自己又係單身的情況下，示愛啦！(我好似重覆左三次)
最後，我都多謝琴晚俾我煩左四個鐘o既人，我只係想解決四分鐘可以解決到o既野，但又特登拖長到四個鐘，我真係幾賤格！(我想講：因為傾左四個鐘電話，我今日做乜都唔夠力。訓完又訓，連食飯拎隻叉都拎唔起。最吹漲係，晏晝屋企爆水喉，我被阿媽強徵左落樓下「挽水」，挽左四桶呀大佬！我屋企係唐樓黎，行左六層，走左兩轉，我而家真係身壞絕世武功，可以單手打爆張三豐呀！[平時我講到自己好似好嚮往原始森林咁，拿！呢D咪叫現世報！]最後我挽完之後，心裡咒罵千遍，然後撻左落張床到，氣若浮絲咁訓！唉！我真係未試過攰到郁都郁唔到架，我自信心無曬，感覺自己好鬼老呀，陰功！)而你話我只愛台灣音樂文化，對香港政壇，樂壇，男人，女人，屋企人都唔滿意，我都有諗過，結論係：嗯！嗯！嗯！(係咪好敷衍？) 其實我真係有檢討架，我都覺得自己有少少唔岩架，例如台灣歌詞用國語填，寫出黎o既味道同香港歌詞用廣東話填差別很大，所以我有時都應該以廣東話角度欣賞下香港歌詞架！係咪？(我認真講架！唔好以為我敷衍緊呀!)
拿！我都話我用廣東話口沒遮爛架啦，而家話無狀態又打左成篇口水出黎，唉！真係自己都被自己吹漲...
文章定位：
