春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

 

    天地無情。日本大地動所造成的災難佮悲慘的情景，相信逐家透過電視畫面佮網路的強力放送，攏看甲一清二楚、現拄現。你看彼超級地動所引起的大海漲，毋那人掠厝拆、雞仔鳥仔死甲無半隻，伊袂輸滾蛟龍仝款，佇一目睨仔的時間內，以秋風掃落葉的屈勢，將一棟一棟的樓仔厝、一台一台的自動車，攏掃甲倒籬顛斗，真正佮濟濟災難電影所展現的人間地獄宛然親像。

    這個時陣，眾人議論紛紛，四界風聲謗影，喊講是毋是規個世界欲行到盡磅矣。若無，哪會2011年才開春無偌久，規個地球逐角勢，若毋是雄狂做大水，就是地牛大翻身，這踏（tah）救災猶未煞，彼跡閣來鬥一擔。遮呢捷（tsiap⁸）發生的天災地變，害災民驚心忍（lun²）命，毋知明仔載欲按怎？

    事實上，天災地變是千百年來長久存在的自然生態，以各種歷史文獻的記載來看，自古以來濟濟天災地變造成屍橫遍野，甚至改朝換代的大變遷。台灣的文獻記載，離現此時290冬前的1721年，這陣的台南外海捌發生一擺大海漲，造成就近的人民死傷、財產損失不計其數，加上當時台灣知府王珍以下的清國官員，因為酷刑、痟（siau²）貪早就造成民不聊生的濟濟悲劇，落尾，引起鴨母王朱一貴掣（tshua⁷）頭的大革命，差一屑（sut）仔就共（ka⁷）清國政府摒盤。

    這回大地動，是日本有史以來規模上界大的地動，死傷的人數綴（tue³）時間的逼近一直咧增加。雖然，日本因為地動特別濟的緣故，造就怹（in）的救災能力佇世界排頭一嵌，不而過，遮呢慘重的災難，絕對毋是一個國家的喟（khui³）力有才調排解的。這個坎站，是咱人類跨越國界，發揮無私愛心的時陣。特別是咱台灣人，愛會記得1999年九二一大地動的時，日本的救難團隊佇第一時間就拚來台灣鬥相仝。所以，咱逐家該當有錢捐錢、有力出力，助贊日本人民量早恢復正常的生活。千萬毋通親像一寡無天良的支那人，佇網路頂懸烏白留話，咒詛日本人應該死好。我相信咱台灣人是一個有情、有義、有良知的民族。