春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

4.真情Antony

　　「台灣予我真濟，我予台灣真少。」這是佇台灣教英語的英國人Antony，踮遊覽車頂的真情流露。

　　今仔日綴賴清德服務處團隊去屏東林邊災區服務。透早6點thóng，1陣各地來的志工早就tshûan便便等咧上車。面頭前行過1位標準西洋面模仔、漢草粗勇的外國先生，逐家目睭隨金起來。偎近探問，伊是1位ùi英國來台灣教英語的老師。自古以來，外國人來台灣徛居對這塊土地付出真情的人滿四界，我想，Antony mā無例外；若無，伊何必苦跤穿靴管、手捾kah大包細包參眾人去災區做志工。

　　來到目的地林邊，才見識著啥物叫做路糊糜仔的威力。Morakot已經過10外工矣，沿路攏iáu閣是厚tut-tut的路糊糜仔；規路攏有逐所在來的、無仝團體的志工朋友，眾人跤穿靴管、手gia̍h沙thio，無畏下港的日頭無情的苦毒，m̄-nā大粒汗細粒汗流無歇，規身軀看會著的所在、頂頂下下攏bak路糊糜仔，若親像災民咧。

　　Tsiânn感心，遮的志工朋友毋驚路糊糜仔bak kah規身軀、mā毋驚in所產生的臭味，逐家合齊，一桶閣一桶，你接予我、我接予伊，接出一幅林邊的真情人間圖。

　　「台灣予我真濟，我予台灣真少。」這是ùi英國人Antony的喙裡所吐露出來的真情。咱該當予伊熱烈的phok-á聲，ah若遐的kan-nā會曉huah口號、對台灣無半點疼心的kioh-siàu，恁敢知見笑？

 

──2009.8.20寫佇流目屎的土地