以平日計，第一次可以成為全屋人最早起身o既一個，可能係我有得同個莊去camp太興奮喇！太好啦！
今日，雖然黃雨……不過去得多陽光普照o既camp，去下陰天o既，都唔錯丫！仲唔曬添。
今日，雖然舊曆七月十四……不過Andy唔講我o地都唔知，百無禁忌啦。
媽咪梗係反對啦，我梗係照去啦，哈哈。
好開心咁同o爹o的媽咪食完「早餐」，我就出發喇。時間o岩o岩好，意粉都俾返張SD咭我，我覺得好順利啊，意料之外地開心。
超級大雨同大風，好似打風咁，不其然有o的擔心，但係都照出發。
大家都遲到，我都叫準時啦！第一次o係ifc 食麥記，受到VIP o既招待！哈。
Henry偷拍o左Victor同小悠拖手o既movie，雖然呢個行為有o的低能，不過真係好好睇！哈哈哈。全靠我o地幫手將喜事公開啦，呵呵！
快船去梅窩，拋到想嘔。
好大好大雨，行一程路去渡假屋，由頭濕到落腳，個背囊由外濕到內，最搞笑係最後我發現杠schedule浸到入面寫o的字冇晒，仲有我個辛辛苦苦畫o既timetable！都唔知好嬲定好笑！嘻嘻。已經好聰明著短褲同涼鞋，一樣濕透，但係好好o架喇。
之後o既活動簡要：
驚嚇：Victor拎菜刀
揸灘：冇出去買o野食，玩UNO
暴力：Tracy與Mandy七級豬之爭，人性真面目
辛勞：洗碗碟蔬菜
豐富：打邊爐！
不捨：Echo同Kimmi要走先
爆笑：睇《情迷索瑪利》，一套爛片，咸咸地，不過真係笑到肚痛，有幾個位直情睇到大嗌！
放心：黃雨警告、雷暴警告取消；七月十四冇事發生，只係凌晨時分有隻貓唔知點樣入o左屋，蹲o係台底而冇人發現。
冇睇奧運閉幕，一齊傾計玩投票，好享受。十六日不經不覺已經過去，奧運又完o左，好快喎。
最開心係大家覺得我最大方，不過其他地方依家同我想像中有好大出入。究竟係大家唔夠了解我，定係我自己唔了解/表現自己？
「兩日」加埋好多card games……第一次八個人用兩套牌磡大D，好搞笑！
頹廢：天光玩killer
七點幾，Andy同Henry要走先，我o地就開始大覺訓，訓到十點幾，都有三個幾鐘o架！訓得好好呀！大家都好似訓足一晚咁精神！
幸運地冇落雨，好彩，感謝。
臨走，上天台映相。最後，再去沙灘執貝殼同映相。
食埋個豐富lunch, 就搭慢船走啦，好舒服o既一程船，得返四個女仔，傾得好開心好暢快。哈哈。
呢個camp我真係好投入，因為真係由上莊望到今時今日。不過失落位係原來身邊好多莊員已經o係我不經不覺間熟o左，我好似excluded o左。我都知道冇去乘風航同廣西扶貧都令我同大家生疏o左，唉，兩個我都好想去，可惜field lab.撞期……天意！不過field lab.呢個期係值得o既，我都鍾意summer上，冇辦法啦。世界上冇完美嘛。只要我真心，我有信心將來可以同大家再熟絡多o的o既！
近期莊聚頻密，請緊貼Rotaract相簿：
http://community.webshots.com/user/ccrotaract04
我個人相簿：
http://community.webshots.com/user/WinGirlish1
激氣：o係中環等車o既時候有個男人行埋o黎問車路，轉個頭佢竟然問我拎電話號碼！我完全諗唔出一個理由我要俾個電話佢，於是耍走o左佢。既然佢唔怕用頹藉口問我，我都唔頹答返佢啦，我話電話冇電。哎，我似唔似咁無知啊？！幾怕佢跟我上車啊，好彩佢知難而退，哈哈。
晚，眼訓……不過為o左Fanny，加上想見耐冇見o既招招，糖水聚。
今個summer第六個camp，原來仲未必係今個暑假最後一個，不過仍然期待。^^
１１月２０日 總有天使, (悄悄話)