今次真係不得不讚TG,email呢個故事俾我等我有得update,好啦,你地慢慢欣賞啦
TG黑仔事件薄七之唔知醒o既後遺症
一月廿八日﹐真係超黑仔呀
首先今朝鬧鐘響o既時候
我叫個鬧鐘唔好嘈
佢之後真係唔嘈
搞到我就快要上堂先起身
你知我最起碼都要三十五分鐘先返到學校o架啦
我都預o左遲o架啦
點知返到佢學校o既時候
我發覺一個人都無
我出返去大堂都問office
佢竟然話我知個老師病o左
class cancelled
真係頂得佢太少
因為我第一堂上籃球
我知道cancel o左之後咪去打陣波囉
打完之後
跟著出返車準備上下一堂
諗住仲有個半鐘時間
食少少野之後仲可以讀下書
因為我出門口o個陣無時間食野
打完波之後就更加餓
當我搵搵下下一堂o既書o個陣。。。
我有一個驚人o既發現﹐
他媽的。。。我唔記得帶今天第三堂o既功課。
我望一望個鐘﹐仲有個半鐘﹐
希望趕得切上下一堂啦。
就飛車返去﹐
返溫哥華途中我已經好後悔﹐
不斷咁問自己點解要打籃球﹐
仲要打o左咁Q耐。。。
返到屋企﹐我竟然仲可以好滋油咁沖個快涼﹐仲換埋衫。
沖完沖之後﹐我落去廳搵返我份功課。
因為我今朝有拎落樓﹐我記得係匆忙中留低o左。
去到廳又唔見﹐廚房又唔見。
當時我先開始急﹐即刻衝出去車房睇﹐
再睇下有無跌o左響去車房條路。
都係搵唔到﹐我開始對我o既記性有D懷疑﹐
我決定再衝上房搵﹐係我o個堆衫搵﹐
搵完無﹐我仲傻到去埋廁所搵。
原來我急起上o黎係完全唔理性咁諗o野。
結果當然都係搵唔到﹐我再落廚房搵。
點知。。。真係o係廚房﹐
我係裝水o既時候擺o左響水機上邊。
而部水機係響個暗角﹐所以之前睇唔到。
又或者。。。真係鬼暗眼。
我又要再次好急咁返學﹐
我又好後悔點解我要沖涼﹐仲刷埋牙。(講笑o者﹐我無刷牙)
開車返學途中﹐我一邊驚俾差人捉﹐一邊超速駕駛。
當時諗﹐今日都算黑仔﹐好有可能俾人捉。
所以之後都開返慢少少(不過依然有超速﹐哈哈哈哈)﹐
返到學校我已經遲o左十分鐘﹐
不過個老師好好人﹐無怪我。
我落堂之後同佢講返我點返遲到﹐
希望佢唔會扣我分啦﹐不過佢要扣都無計啦。
跟住我帶埋我今早帶返學校o既包去cafe食﹐
因為之前仲未有野落肚。
去到cafe﹐我發現另一個驚人發現。
之前我返屋企羅功課o既時候﹐
我未沖涼換衫o既﹗﹖
我留o左手提同錢包響今朝著o個條褲度。
我感覺慶幸o既係我有帶包食﹐
如果唔係﹐我諗我唔可以o係度同你講呢番說話。
不過手提同錢包我都唔理啦﹐
我諗唔到有乜理由再返去羅。
因為再返去﹐我驚我唔單止遲埋第三堂﹐
更加有可能又唔知漏o左乜。(極有可能漏返D功課﹐哈哈哈哈哈)
p.s.明天是情人節,送張小圖俾大家
文章定位：
