哈！「觀月橋畔」格主大人白目天王，許老爹的頭疼時間又到了！
這是個人刊登於台語文學雜誌的第二十篇稿子，堪稱有紀念意義，畢竟文章內容是個人求學時代的故事之一。
其實台語文或說閩南語文，要從電腦中key出字來，坦白說是相當困難的。國語讀那麼久了，雖然台語方言說得很溜，但是寫字作文章是不一樣的。
字key不出來怎辦？沒關係咱的編輯老爺很利害學問又好，在編輯時會幫忙key出來的，當然主要條件是咱自己文稿要寫得好嘛，哈！生日剛過就容在下得意一下吧！
這台語文章看不懂沒關係！其實這咱在之前就寫過國語文的文稿，翻成臺語文實在有點辛苦，若真的看不懂就敬請欣賞舊文「射飛鏢」和「迺夜市」吧！（101.01.13）
佮意踅夜市無？
其實，夜市會當當作國泰民安的指標來看，唯有國泰民安百姓才有閒會當踅夜市，敢毋是咧？
相對的是夜市的商家、攤販正當咧在拚經濟，抑踅夜市的「顧客」真正予拍拚的對像。
夜市的物件、點心、喙吃物，物件講貴無貴，但是欲食好食嘛想欲食巧，人講：「食奇巧」真正是安呢。
少年時陣佇夜市吃過炒露螺，彼是法國白露螺猶未引進台灣進前，後來五星級餐廳或者是飯店引進台灣了後，卻毋是咱這款升斗小民食會著的物件，夜市的炒螺肉拄好填貼了這个遺憾。
啉過蛇湯無？啉蛇湯沒啥大不了！但是有彼个膽量坐咧攤位邊等彼碗湯，膽量才有夠在！規攤位處處攏是蛇籠仔，籠仔內面五花十色大細條的蛇是趖來趖去。
頭家長勾仔伸入去搝（giu）出一條一米外長的長蛇，掛咧旁邊的勾仔頂，小刀仔佇蛇頷頸刣一空，紲咧閣愈驚人！
店頭家那支喙拄咧蛇頷頸的空喙出力吹一下，雙手一搝！這利害！規領蛇皮就安呢活活剝落來！
無偌久！一碗蛇湯就捀到你的面前矣！
彼咧時代，夜市內上定看見的當然是食的物件，毋過上顯目的卻是潘（phun）桶佮洗碗盆，彼時陣可能水資源較豐富吧？洗碗盆的水淅哩嘩啦流規暝嘛無沒人管，邊仔的潘桶胡蠅虼蠽（ka-tsuah）亂亂飛，鳥鼠是軁（nng）來軁去，逐家嘛是食甲真快樂。
大學時代上愛射飛鏢。大三的時陣，佮幾位好鬥陣的學姊、學妹合租了一棟公寓，客廳的壁頂掛了一塊鏢靶，下晡下課轉來是逐家哈茶開講以外上好的娛樂之一。
嘛是因為逐工攏底「練」每一个攏有「小李飛刀」的「神乎奇技」。
後來，鏢愈來愈濟，因為每一个人攏是「高手」或者是「高高手」，因此，隨人收合家己手勢以及重量的鏢。
嘛因為按呢，比賽漸漸變成相輸，輸的人著請逐家到忠孝路夜市吃麵線糊。
台中忠孝路夜市的麵線糊真出名，聽人傳說店擔後壁面一排店面就是賣這麵線糊，一碗一碗如此這般（舌+斗）（khat）來的。
當時，民國七十一年吧？一碗麵線糊40箍，會當「舌+斗」出這一排店面，可見生理好甲啥物程度。
讀研究所了後，一群鏢客就四散去矣。
有一个拜六的下晡六點外，樓跤是吵甲赫赫叫，會當講是人聲鼎沸，只是無閒咧手裡的報告也無去注意發生了啥物代誌。
袂堪得吵鬧的學妹出去陽臺探頭看一下，竟然大聲喝（huah）：「哪會按呢？學長緊來看啦！」
啥？敢講是火燒厝嗎？
探頭一看，這？規條合作街是燈火通明，相挨相（甲+夾）（kheh）。這？大里的流動夜市竟然徙（sua）對遮（tsia）來矣！
袂堪得學妹一再煽動，放下手中的報告兩个人輕裝簡便，走落樓跤軁（nng）入去踅夜市的人群中。
「你嘛來？」「你嘛是來矣！」
佇合作街租厝的同學真正濟，四界攏拄著熟似的人，連助教嘛佇遮出現。哈！系上的千年助教原來下班後就是這款模樣啊！淺拖、短褲，喙閣咬一枝薰（hun）．．．果然佇夜市內面，人人攏現出原形輕鬆自在呀！
「學長！射飛鏢呢！我出錢你來射，射彼个尪仔予我。」
10箍銀六支鏢，彼个尪仔愛射破五粒汽球，一包長壽薰愛六鏢全著（tioh）。
「好啦！毋過我先射一包薰！」
紲落來10箍家己出錢，總算予學妹彼支翹上半天懸的喙恢復了正常。
第二个禮拜六，夜市猶未開市竟然來了一群學弟學妹。按怎？欲泡茶無？來啦！真久無泡茶開講兼話唬爛（lan）矣，就來泡茶啦！
「毋是啦！等一下欲『請』學長做伙踅夜市啦．．」學妹的話語敢若是「包藏禍心」、「不懷好意」喔。
來到夜市，七八个人衝到飛鏢擔（tann）前，一人六支鏢全交來我手中，這聲好矣。
查某的直喊：「我愛彼个尪仔，彼个．．．著．．．就是彼个。」查埔較保守，講：「予我一包長壽的就好！」
按呢？我是算啥啊？
鏢射完，逐家歡頭喜面。嘛是學妹有良心，伊講：「學長我請你食麵線糊！」
「這好喔！來去忠孝路夜市吧！」
「無啦！遮就有，看！才二十箍就一大碗啊！」
「喔！恁是土匪抑還是強盜啊！」
「嘻嘻嘻，下禮拜閣再來好無？」拄著這種司奶（sai-nai）的學妹只好投降。
刊載於「海翁台語文學雜誌」第121期（2012.01），p.64。
文章定位：
