01-02-07
今個月係保記安老服務推廣月，除咗尋日有個活動以外，今日開始到二月尾，晌唔同地方都會有保記嘅福袋義賣。今日輪到少明上場，晌屯門市中心義賣。
話說兩個星期前，主任收到e-mail要我哋中心揀地點，主任見到屯門市中心，就二話不說填咗少明個名上去：「你住屯門嘛，諗住方便你去。」但係主任……個義賣要有義工架，仲要係五個……星期四晌屯門，邊有義工有空呀……？
終於好不容易搵到兩個義工：小琳妹子同輝爺……好啦，三個人都好啦，食完早餐就搭車出發。晌車上面我同輝爺講我篇新小說嘅idea，講開美沙酮，我話查咗好耐字典都搵唔到美沙酮嘅英文串法，最後要勞動中心嘅護士同我去問人先搵到，跟住企晌我哋前面嘅警察哥哥突然出聲：「methadone，metha~done。」可能我個樣幾疑惑，所以警察哥哥解釋：「嗱好易記架咋，你記住啲食美沙酮嘅人會約埋晌美沙酮中心，跟住一人一杯美沙酮，咁咪met had one囉。」哦~~唔該警察哥哥~~但係我好奇怪個警察哥哥點解會突然搭訕……
去到都係十點九(義賣十一點開始)，但係人影都冇個，於是我哋就企埋一邊等……之後坐埋一邊等……等咗半個鐘，人又冇電話又冇，覺得唔多妥於是我打電話俾負責嘅籌募部同事，點知係冇~~人~~聽~~
又繼續等，此時有個管理處嘅人行埋嚟，話要搬走我哋坐緊嘅凳，仲問我哋係唔係保記義工，移凳就係為咗set場俾我咗。佢仲講咗句：「係呀，預四格階磚俾你哋架咋！」我諗「四格階磚」係佢哋管理處嘅術語，如果唔係用「四格階磚」嚟義賣都幾難……不過成績一定會好好，凈係睇住我咗三個人，好似耍雜技咁逼埋晌「四格階磚」義賣都抵啦……(上圖為「四格階磚」)
等到十一點半，終於有個黎先生打電話俾我啦，話架車遲咗到，所以佢哋上貨都遲咗，而家仲黎緊……結果十一點九黎先生出現，佢就梗係sorry sorry啦，我哋一於好少理，馬上開始做野。檯set好晒、三車物資都到咗，我哋先至發覺：咦？個福袋呢？黎先生說：「哎呀梗係急得滯拎漏咗啦，你等等我即刻叫人拎嚟……」轉身打電話：「喂~~今日屯門拎漏咗福袋呀，你叫葵涌架車去總局，再車入嚟屯門啦！」嘩！葵涌→總局(銅鑼灣)→屯門，有排等囉……
呢個時後有一個帶有鄉音嘅師奶行埋嚟問：「啲嘢點賣呀？」我哋答係慈善義賣，$38一set，點知佢話：「嘩~~駛唔駛咁貴呀？啲麵十零蚊包，糖、薯片、栗子呢啲咪又係幾蚊，樓下百佳都有啦！」我哋都話係義賣囉……跟住佢仲要問：「啲麵係唔係油炸架？」「啲麵有冇第二隻味呀？」「嘢飲係得呢隻冇得揀啦？」小喇叭~~當我真係擺檔咁……最後藐藐個嘴走咗去……
到咗一點lunch hour，最多人行嚟行去，但係我哋都係sell唔到，因為冇福袋裝住啲物資，不過好彩都有啲人嚟捐錢，個錢箱先叫有啲嘢……無耐黎先生話貨van到，就落咗去車站等。我哋三個磨拳擦掌諗住做嘢，點知黎先生上到嚟面帶歉意咁話：「唔好意思呀，同事又拎錯咗，佢車咗箱帽入嚟，因為箱福袋同帽個盒上面都係寫『紅色』，所以搞錯咗，我叫咗佢返總局再拎架啦！」今次仲甘，屯門→總局(銅鑼灣)→屯門，又要兩個鐘啦……
卒之搞到三點，福袋終於送到(幾驚今次拎錯紅色背心)，可以正式齊物資開始義賣，但係人流已經……唉……咁啱隔離坐咗個婆婆，我就叫佢幫手，開頭佢以為我叫佢買，佢係咁話無錢，我向佢解釋叫佢拎住個福袋叫人買，於是佢坐咗埋嚟叫人買。吖呢招有效喎，真係多咗人嚟睇，點知婆婆好快話驚冇面就走咗去，又靜返……
總計今日三點賣到六點，總共賣咗八個福袋(其中三個係我哋三個買返)，但係錢就有好多，因為黎先生先後尷尷尬尬咁放咗$240入去個箱到……連主任都話今次都算係經典……
我終於明白點解每年「星光熠熠耀保良」嘅善款數字會越嚟越低……
文章定位：
