13-10-05
尋晚癲0左一輪，今日都係要返工。一早起身個人仲好似唔係好夠訓咁，但係都會去check check e-mail，睇0下個拍賣場有冇人出價、有冇人留言提問。點知今朝一check e-mail，就見到有新郵件。
「Yahoo! 拍賣刊登費 11 月 1 日 實施」
睇到呢個標題個心已經涼0左一截，yahoo以三大理由支持其收費政策：一)減低競爭、二)質素上升、三)成交遞增。以下係yahoo0既信0既內容：「以日本及台灣的 Yahoo! 拍賣為例，徵收刊登費有助減少被濫用拍賣服務的賣家故意重複上載拍賣品對認真賣家的影響，減低無謂競爭。欠缺市場競爭力如定價不合理、描述及照片不清晰、無市場需求的產品亦會減少，買家在瀏覽時更容易找到所需的拍賣品，令優質拍賣品的出售率大大提高。」
我自己都有上過台灣0既yahoo拍賣，發覺香港同及台灣0既情況好唔同，同一件貨品，晌台北同台南訂價都已經好唔同，計埋運費可能會相差一大截，所以先要上yahoo拍賣，希望可以搵到d平0既貨；香港大多數都係見面交收，就算係平都唔平得好多，尤其係市面有0既貨，就更加賣唔出。
其次台灣0既賣家，好多都係自己開鋪頭，在晌網上面賣0野，交易場0既費用根本就係佢0地0既成本之一；香港0既賣家好多都係之前買0左0野，放0左晌屋企一輪發覺自己唔係太需要，先至賣返出0黎公諸同好，做到「己所不欲廉價益人」，例如係一d舊CD、舊雜誌、模型、玩具咁，賣返出0黎就已經要蝕，只係好過dum落垃圾筒，如果要收錢分分鐘賣0既錢都唔夠cover拍賣場個收費，因為唔係登一次就賣到0架嘛，登得三五七次，拍賣費就貴過件貨0架啦。
「定價不合理」同「無市場需求」呢兩樣0野，就仲更不知所謂。上面講過晌yahoo拍賣場賣0野0既人，大多係想幫屋企冇用0既0野搵個好歸宿，對於定價係一無所知，合唔合理亦係見仁見智，可能賣家覺得佢賣0既電話好少用好新淨，定價高d，但係買家覺得型號舊，又係二手，咁高價又唔係好合理；至於有冇市場需求，如果我知道得咁清楚，我就可以走去開鋪頭啦，「市場需求」呢樣0野有好多大企業0既消售策略部都會估錯，何況係我0地d小市民呢？
最慘0既一樣0野係，yahoo根本就未有辦法保障惡意落標0既買家，睇0下賣家0既記錄，差唔多個個賣家都有俾人惡意劣評，方法係搵d有即買價0既落標，跟住即時劣評人0地，仲要晌意見欄寫「吹咩哈哈」，呢d惡意破壞0既人以前對賣家冇咩影響，因為其他人唔會因為有個咁0既劣評而唔放心交易；但日後拍賣要收費就大見事，因為賣家要再次俾錢，去賣呢件俾人惡意整蠱0既貨，對賣家係雙重唔公平。
其實一句講晒，yahoo見香港個拍賣場受歡迎，就想0黎刮一筆。yahoo好多0野都已經變晒，全部由免費轉晒要收錢，例如佢d games，而家連拍賣都要，睇0黎遲d上yahoo search 0野同用e-mail都要收錢0架啦！
文章定位：
