俾人催我打日記～搞到我要連夜趕工～最終我都係而家先搞掂~哈哈
講返呢十幾日做過乜先～都幾多野搞～仲好多野值得恭喜呢！
２號～夜晚同魚麗婷去左游水～差ｄ嚇死左我～因為我要係大池游～但魚同麗婷都唔係咁識～點知魚就好勇咁自己游～我個陣仲係坐係泳池邊～見佢游到差唔多中間最深個度～我見到佢好唔掂～因為佢唔識得上水面度透氣～見佢上黎又沈返落水～嚇到我即刻游過去救佢～好彩救佢個陣佢都未有ｄ咩事～不過佢都飲左好多水同埋即時面青口唇白咁～我都真係嚇死咁滯～好彩冇事～恭喜晒～～哈～如果唔係我都唔知點同佢阿媽交付咯～
３號～去左九龍灣百老匯同文睇智能叛變～都幾好睇丫～
之後又係四圍行街．．．．就咁就一日
４號～都係陪文一齊～個日四點鐘左右上左佢屋企～因為要帶咪咪去睇醫生～
我去幫手～好搞笑啊咪咪～我同文同文ｄａｄｄｙ一齊帶咪咪去～文ｄａｄｄｙ揸車車我同文去～我負責抱咪咪～抱住咪咪個陣咪咪真係好乖～唔亂郁架～
一上的士～咪咪就即刻自己行開～要自己坐一個位望風景～勁搞笑～不過可能咪咪驚～有陰影啦～因為之前個次咪咪坐的士去醫務所～咪咪就要係個度留一晚～俾人綑住仲要吊鹽水～所以咪咪係車度流眼淚喎～不過好彩醫生話咪咪好左好多～但就要終生食藥喇～文又要慳ｄ咯～因為咪咪ｄ醫藥費都好貴～睇一次都八百幾～一出醫務所～咪咪又流眼淚～唔知係咪開心得滯呢～哈哈
之後回程個陣～咪咪又係要自己坐一個位望風景～點知世伯一殺制～咪咪就成個頭跌左去車頭位個車底～之後我即刻抱返起佢～咪咪好似小朋友咁好驚咁要我抱住～（乙水）左佢一陣佢又冇事咁要自己坐返一個位～好搞笑～返到屋企一放低咪咪～佢就即刻去廁所大小便～哈～估唔到佢咁叻～識得忍咁耐喎～之後文就陪我返大埔喇～
５號～原先冇野做～之後阿楚打俾我叫我陪佢出沙田買野～我地行左一陣咁啦
最後行埋宜家傢俬就閃人囉～呢日都幾搞笑～原來我同楚都係睇分針唔睇時針既人～哈哈～
６號～阿文又放假既一日～都唔明點解咁鬼多假放～一星期放３日～哈～勁！
本身諗住唔出街架～但俾文叫多兩叫～又肯出喇我～哈～心軟．．．
我同文去左太古諗住睇導盲犬小Ｑ架～點知去到都遲左成十分鐘～
最後都係放棄左睇～之後去行街～
我捉左阿文去美國冒險樂園玩～呵～激死佢！！
之後又四圍行～行到玩具部撞到以前ＴＯＹＳ Ｄ朋友喎～
又傾左兩句喇！～文胃痛～咁我同文就走左Ｍ記食雪糕～
食完之後我同文就搭丁丁去中環轉３０７返大埔喇～～～
就咁就過左我無無聊聊既一日喇～～～
７號～唔記得做過Ｄ乜喇～印象中成日都係屋企過咁囉．．．哈
８號～訓到兩點幾～之後起身食Ｄ野就出門口返工～
返尖咀大化中心ＭＡＭＭＡＭＩＡ啊～好得閒～冇客咁滯～
得２３個客～８個人服侍．．哈哈～誇張～～～
放工之後我等阿芷過黎一齊返大埔～
我地去左買Ｄ小食上車食～佢就係咁同肥仔傾計～哈～
不過冇所謂啦～佢開心就得啦～～哈哈～
希望肥仔係星期五識做啦～～呵呵～
９號～全日都係屋企～係屋企大掃除～執完之後就累到死左咁滯～～
之後就同屋企人食烏冬～咁就一日ＬＵ～
１０號～原本話左兩星期唔見阿文～點知尋晚嘈黎～最終我都係心軟的～
ｓｏ同阿文去睇導盲犬小Ｑ～嘩～套野喊到我死咁滯～
好好睇～但又好慘～～睇完之後同阿文入左元朗執屋～
之後就返大埔食野ＬＵ～
１１號～好早起左身～上網ＣＨＥＣＫ會考成績～
我考左３科～但都有４分喎～哈哈～
我考中文～西史～ＥＣＯＮ～除左ＥＣＯＮ差上年一級之外
另外兩科都同上年一樣～估唔到上年溫到死死下又咁既分～
今年冇溫過書又係咁～不過我發覺我中文溫左書～讀本考到Ｄ啊
但因為太耐冇寫字作文～好似唔識字咁～作文得Ｅ．．．
晒左溫書添～哈～西史都好喎～有Ｄ～哈～但我溫左幾個鐘咋喎～好彩啦～
ＥＣＯＮ就晒氣啦～冇乜點溫就去考～
人地係試場出面就係咁溫書～我就係試場出面嘻嘻哈哈～哈哈～合格都偷笑啦
雖然自己麻麻地～但好開心Ｄ朋友都考得唔錯～
魚同雪都升到中六～寶儀仲有２１分～好開心～叻女啊！！！恭喜啊！！
希望其他朋友仔雖然升唔到～但都可以入到自己想讀ＩＶＥ既科啦～
１點半個陣我同ＳＫＹＬＳＴ仲有ＤＡＶＩＤ同張多一齊係稻香飲茶～
嘻嘻哈哈左好耐～咩都傾～
之後成班人除左麗婷同張多走先其他人就上我屋企打麻雀～～
都幾嘈架～阿楚中途就走先～
之後玩到６點半到睇埋新聞就出去食野～阿魚就返屋企食野～
我同雪同ＬＵＩ同埋佢男友一齊係我屋企附迎間燒烤王成野～
我地四個食野咩都傾一餐～上至政治下至學校都傾～
ＤＡＶＩＤ好勁～咩都插到嘴～
我真係未識過一個男仔可以咁多野講～其實我真係幾討厭男仔多野講～
又有點兒認叻呢～不過佢係我好朋友既男朋友～當然佢好唔好都唔太關我事啦
最緊要我朋友鐘意ＪＥ～哈哈～希望佢會識諗定性Ｄ少野講Ｄ啦～
食完野之後各散東西～我就返屋企等阿嫂幫我染髮～好搞笑囉
個頭Ｄ髮根全部都啡金色～但下面就黑色～始終都上唔到色～
搞到我要張條界轉一轉位～咁先冇咁肉酸咋～
１２號～訓到２點半起身～之後去晒相ＴＨＥＮ去左剪頭髮～
係剪頭髮個度洗完頭之後等左好耐先有得剪～
不過都值得既～個男仔好有心機同我剪～我個頭先冇咁７咋！
之後去左大中～文入左黎同我食飯～
仲係大中度打機～佢竟然玩賽車輸俾我喎～哈哈～
之後去左揀阿芷份生日禮物～之後就返屋企ＬＵ～
Ｐ．Ｓ 阿芷１３號１８歲生日～係度祝佢生日快樂啦～同埋佢願望成真～
肥仔會對佢好好啦～同埋希望佢１８歲之後都對肥仔好～唔好咁任性啦～
魚～你要生日禮物～放心啦～我會係十蚊店努力搵架喇～～呵
上面張相係咪咪黎架～係咪好可愛呢～～哈哈
文章定位：
