五日四夜嘅宿霧之旅終於完結喇~~好玩嗎？小寶寶覺得ok啦。不過好在天氣非常好！明明話有雷陣雨，但係幾日都陽光普照，只係半夜我地覺覺豬嘅時候先落大雨咋！連導遊都話奇，明明前幾日都仲落緊雨嘅~~！ ^.^
全團十五人：六個跟我地年紀相若，但食煙飲酒又粗口、一家三口仔仔剛考完會考，好cool~~、一對警察夫婦（女嘅係PTU），都幾nice，加我地五人（點解多咗個？哦~~領隊Ricky囉，‘豪仔’個同事嘛，所以都成日一齊玩一齊食。
第一日：十二點幾出機場，先參觀古堡、教堂、廟宇......到酒店都四點多，晚上再吃團體餐，返酒店CASINO賭場參觀，因為有coupon所以都玩咗幾手，贏咗P600（唔夠一百蚊港幣）。之後再出去食夜宵，有串燒食，而呢度嘅mango shake亦係小寶寶嗰幾日飲過最好飲嘅！！^.< 呢晚點幾就訓，因為第朝七點morning call出海！
第二日：先响酒店食早餐，十點出發坐車到大富利再坐船出海到椰子島附近浮潛。對於唔識游水又怕水嘅小寶寶真係好弊！只係拉住船邊嘅繩浮咗廿分鐘左右，望過下海底嘅珊瑚、海星同魚就返上船用麵包餵魚！（不過嗰度嘅海底都唔係好靚，唔太蝕底~ :P）跟住又去咗另一個島仔食海鮮！最開心係嗰度有好多狗，我地仲餵燒雞佢地食tim~~ ^.^ 兩點左右再返大富利玩水上活動，不過小寶寶就無玩喇，因為........小寶寶發現自己M到！好掃興呀！！>.< 所以小寶寶就無玩水上活動（不過小寶寶就算無M都未必玩，因為比之前响墾丁玩嘅貴好多呀！），而KenKen就响泳池游下水，真係對唔住喇KenKen，我咁樣實令你都好掃興..... :( 之後返酒店，晚上食酒店嘅自助餐！又用coupon响賭場贏咗P400，之後就去做massage！Massage好抵呀！一個鐘都只係百一蚊港幣，雖然手勢差點點，不過都幾好啦！
第三日：小寶寶同KenKen無食早餐呀！十一點起身就準備由酒店轉去resort。中途參觀結他廠同自費lunch，去到resort都三、四點，我地四人住一間屋，分開兩間房，一邊一個廁所，不錯呀！係Shirley嗰邊個廁所多d蟻，不過無耐已經比肥豪殺哂班蟻民！夜晚又去食團體餐，今次係中菜，ok喎~~ 之後返resort打乒乓波同桌球，好玩！不過最衰無冷氣，勁熱~~ @.@ 玩咗兩個鐘左右，大家沖完涼就開始UNO大戰！！^o^ 小寶寶成日贏架！最屎係Ricky，算啦~ 佢係初學者，係要交d學費架喇，請飲野lor~~ :P
第四日：除咗小寶寶同KenKen留响Resort，其他人都出海潛水，如果唔係period小寶寶可能都會去浮潛嘅，而且又去返前日出海附近，所以我倆都決定唔去。好彩無去咋！團友都話有被騙感覺，特別係男仔，比咗五百幾港幣只係潛咗廿幾分鐘，女仔就半個鐘，同之前講嘅完全兩件事！而我同Ken就好歎世界咁游下水曬下太陽、訓下覺咁等佢地返黎，夜晚五人响Resort入面嘅餐廳食海鮮，都ok正喎~~ 晚上再黎UNO大戰！！成三點先訓！
第五日：最後一日八點半就起身食早餐，爭取時間再享受下陽光與海灘，十二點就checkout走喇，到shoemark（宿霧嘅唯一大商場）‘自由行’ 。小寶寶同KneKen行咗一個鐘已經頂唔順，响Starbuck同Ricky傾咗兩個鐘，其他人就行足咁耐，特別係嗰三pair情侶，買好多野仲唔夠錢要再換錢tim！！勁~！五點開車往機場，晚上七點五十五分飛機，Shirley佢地upgrade咗張機票呀，所以我地分開咗坐，勁眼訓呀！小寶寶仲有d暈機浪tim~~ :P 攞埋行李返到屋企都零晨十二點幾喇~~~~~~成兩點先訓，好彩小寶寶仲有一個off先返工！不過KenKen就慘喇~~
總結：
1.宿霧嘅陽光海灘無想像中咁靚（反而之前去墾丁仲靚！）
2.相信小寶寶唔會再去cebu
3.嗰度d野食大部分都好咸，不過唔貴
好消息：小寶寶同KenKen都曬黑了
壞消息：KenKen曬傷了
好消息：兩個人五日加埋都係用咗千幾蚊港幣咋
壞消息：小寶寶同KenKen基本上咩都無買
好消息：阿仔响阿媽度住咗五日輕咗五磅
壞消息：相信佢會响兩日內回復體重，而且可能多過五磅
文章定位：
