有一次為主作見證好失敗的經歷，昨天中午，我其中一個上司當眾問我24號洗唔洗去唱詩(報佳音)、返教堂？我隨口答佢：「唔洗呀」，咁佢又問：「咁25號呢？」我冇諗過就答「唔洗」，其實果日係主日，係要返聚會的。之後，咁我上司就自言自語咁行左出去食飯了。跟住就入題啦，坐系我隔離果兩個會計部同事就問我：「下！原來你係架？」嘩～我仲以為佢地一早就知道添，唔通我平時活不出基督徒的生命？以致人家不知道我係一個基督徒，不過又冇理由，開大咪嗌晒比全公司知道、或者舉牌表示架嘛，都係順其自然啦。咁我就回應：「係！我係架」佢地就問：「下！你唔做果d野架？」「下！你地唔洗慶祝架咩？」「下！你食飯做咩唔叫我地祈禱呀？」「你做咩冇叫過我地聽福音呀？」「你教會系邊度呀？」…佢地二人問左幾個類似問題，我記憶體有限只係記得咁多，咁我回應：「係！果樣野…唱詩(報佳音)做黎都冇意思，我唔會做，聖經沒有記載果日係主耶穌出生，對一些不信的人，而且唔係值得慶祝的日子，總之咁做就冇意思啦」「我食飯唔叫你祈禱係因為，你地都唔知道個意義係咩野，不過其實都冇分信唔信的人都可以祈禱既」「我冇邀請過你地去聽福音係因為…首先我同你地唔係好熟」「我教會係一個小小的福音堂，系深水土步」嘩～以上我所講既野，簡直係冇經過聖靈、思想就講出黎，自己都知道好廢。事後諗番，其實可以唔洗咁講咁，呢兩個都係師奶，其實佢地咁問都好正常既，冇心為難我，只係好奇，但最後咩都冇講過福音，佢地就叫我先去食飯。總結：２００５年１２月１９日中午在公司，為主作見證，靠自己，失敗了。其實有時有些係傳福音的好機會，但往往讓自己打差了主的工作，我都想比張福音單張(有福音堂地圖果張)叫佢地黎聽福音架，不過冇帶，如果下次有機會我一定比！不過呢次都係一個經歷黎既，求主賜給我當說的話，將我所認識的主耶穌介紹比人，使人得真正的福。
另外，都有一件事好值得記低既，就係偉文、永鴻、同埋我可以去day camp啦，不過我己經知道23號星期五冇得早放，如常6點收工，因為24號星期六至係公司的聖誕聯歡會，如果係23號搞就應該有。咁冇辦法啦，唯有各有各去啦，因為我公司附近有bus直達烏溪沙，我都要約約佢地先，都唔想佢地第一晚系門口吹風等我！
文章定位：
