三號台 二零零八年八月三日下午二時三十五分（再見）

37愛的鼓勵 0訂閱站台

嘩！不經不覺都有半個多月無打台報了，我最近做乜呢？唔知喎…好似都係唔知囉，每天都係返工放工返屋企煲電話粥，好耐好耐都無煲此粥喇，唔知幾時開始，成日同哩個同事講電話，講好耐都有講唔完的說話，無他的，都係工作上的是是非非，UM…識我的人都知道我唔係D長舌婦、到處搬弄是非的人，大家講的都是事實，工餘時發下嘮叨，講講大家的感想、睇法，有甚麼可以改善的呢…等等。
有一件事都想o係哩度攞o黎講下，星期一在舖頭睇中個PUMA袋，星期二返工同個同事講想買，點解要同佢講？因為佢識人有七折囉，中午諗住出去買，點知天公幫我慳，來個「紅雨」，到星期三，個同事話今天天氣好，去囉，好！點知…重點到…食完午飯，諗住出去的，經過有個課室，好似有甚麼事咁，我問乜事，無人講，算…我繼續走埋那長長的走廊，但似乎有點不對勁，我走回頭，走入課室，走近那人堆中，看見有個物體在地上，我要講清楚，在我未看清楚之前，那些看起來是似一件物件的，再走近些，原來是個老師，我再問︰「做乜事呀？」，終於有人肯出聲了，話個老師肚痛，痛得很厲害，我當時睇倒個老師係痛到在地上碌來碌去，當時各人似乎都不知所措，因為校內一個主任都沒有，全都去晒開會，我就問依家咩情況，有人問個老師行唔行倒去搭的士，我當時講o左句︰「呀…校車夠鐘添。」咁又有個老師講︰「校車開晒啦！」跟住有人講CALL白車得唔得，咁我就問CALL o左未呢？咁有人講校務處話要問主任喎，咁我就由走廊尾快步走到校務處問依家做到那個步驟，但當時校務處各人都在跟不同的通話中，我不知道，所以不能做甚麼，也不能即時打999，因為我未能確是否有人已做了此動作，所以我必須搞清楚，終於有人講完電話，我即時問撥了999沒有，回答的就是︰「我依家打。」，好，我確定了此事後，回頭看看，很接近十二點，即是上午班放學的時間，有老師們說不如早點放學，那書記便開咪請各位老師預備現在放學，話剛說完，走廊盡頭，一班老師已合力把那個老師緩緩地扶到校務處等車，當時人太多，我覺得當時的情況有點亂，我抓住了一個姐姐問︰「有無暖包？」回答的是︰「無」，我見各人安頓了那位老師，我便走到走廊尾的茶水房，問另一位姐姐要一條乾淨毛巾，要濕熱水，仲要一個食物袋，個阿姐不停地嘍嘍喃喃，算…忍你，與此同時，有個老師按對講電話問姐姐學校內有無暖包，那個姐姐答︰「無，但阿糟整緊出o黎。」出到去，我將那個臨時暖包交俾照顧住那個老師的老師，之後我就行開了，站在門口做住人場先，因為當時已經放學，人多，八卦的人也多，尤其是工人姐姐，不久，白車師傅到場，當時有個不識時冒的老師在校務處門前站著找叫外賣的電話簿，我便請她讓開，好，師傅們開始處理那個老師，咁，又有個老師問，好唔好攞個屏風呢？UM…考盧了一會，個老師話攞出o黎好方便、好快咋，咁就好啦，攞o左出來，此時，那個找電話簿的老師走出屏風外，唉…醒少少，唔好o係哩個時候搞搞震，幫幫忙吧，我就只留意住班師傅們完成未，好預備拿開屏風讓路，回頭看，老師已經在wheel chair上，老師放回屏風到課室，看來是車籠的師傅攞晒所有帶來的物品先行，跟住到主管，隨後就是另一位師傅推着老師走近樓梯口，主管叫車籠的先行上車，然後用一隻就抓住椅的腳位，就帶走了那位老師了，白車未到場期間，其實有位老師在背後幫了很多的忙，校務處在一樓的，她先到樓下截住其他車，又或者請司機駛開架車唔好逗留，很賣力哩，而另一位書記自動自覺地陪同那位老師到醫，她每次都是當這角色的。
此時，各人散開了，事情暫告一段落，雖然發生的時間只是十數分鐘，而當時距離我午飯完的時間還有二十分鐘，但我的心情未平伏，連街也沒有出，坐在我的位子上不停的回想，反思剛才的處理，有很多感想，其實做為一個有急救證書的我，應該仲有很多事可以做，但就好似「白色巨塔」套劇咁，有D事情原來真的不到我決定和做的，我到場前，我唔知道D老師同校務處的溝通係點，但我問返D同事，似乎有點不愉快，有人在食飯房度聽到老師發嘮叨，「老師都係人嗻，叫車都要主任批？」聽完我就明白，點解當初無人肯同我講發生乜事，另外，我又覺得如果我係一個沒有急救證書的校務處員工，當我唔知點處理的時候，我當然需要問主任點處理好啦，而我，我應該叫D唔係幫手的人散開、觀察和take那個老師的vital sign，我企開似乎有點袖手旁觀，我對於我應該做、能夠做但又無做的耿耿於懷，我總覺得，咁難得遇到case做，點解唔做好D呢？講就天下無敵，做就有心無力，我覺得自己做得唔好，年年比賽我都抽唔中出賽的，所以好的唔好的都好似與我無關，哩件事發生之後，當晚我很久也睡不著覺哩，當然我也有與那個傾開電話的同事討論啦，到現在，我仲未放低的。
仲有，我同那個PUMA袋真的無緣？唔係啦，我終於在星期四買o左，仲睇中另一個大的PUMA單邊咩旅行袋添，未買，仲諗緊，但好鐘意呢…不過，有個朋友俾我的意見是「有用的就抵買，無用的就一D都唔抵喇」，咁不如大家陪下我去旅行吖，我近來想去台灣、馬來西亞、吉隆坡、北京…唔知幾時再有機會同朋友一齊上機呢？好想好想啊！
好多PUMA o野，好大出血咁，自從個同事有七折後，我就心思思去睇，又真係睇中好多好多的，但就D真係唔抵的就無買到。
時間過得好快，一日一日就咁就過了，我忙到連到朋友的BLOG都好耐好耐無睇喇，有人講多謝我幫佢留飛，好開心哩，因為我開心有人在意我，又有人講好開心一大班人去小菜王，其實那個十幾人的組合很難得，至少難得在有我這個稀客，我仲因為佢提到「相愛6年」首歌，我仲即刻download o黎聽添，又有人講徐步高，我都有諗如果我係兩位徐太，我都會係咁，所以我見徐步高太太的感謝信，我很欣賞她那份專一單純的愛，因為她說如果有得再揀一次都係揀返徐步高的。
工作方面，在那短的期間，我做錯過兩份通告，連累老師要煩住改，有個老師半講笑半發洩咁要我交失誤報告添，我公司係咁的，只要你做錯o野，主任就要你填失誤報告，要有人食o左個鑊佢，搞到D人很不滿，但我雖然衰過幾次，差丁點就要寫，但到現在，始終未寫過，而我同事就已經寫過兩次了，其實咁樣都幾打激員工的士氣o架，因為我感受到那同事down donw地，o鴉…點解D管理層搞到我o地校務處同老師不能好好相處呢？我o地校務處同老師之間總係有磨擦的，我唔想咁呀，有D老師真係好好的，我想同佢o地好好相處，做好朋友。
我之前咪提過有個同事無端端黑我面的，事情發展到原來佢以為我嬲佢，以為我驚人o地講閒話，以為我唔鍾意佢多多口同我講笑，唔同佢食飯，又唔同佢出街，但我相信熟我的人都知我唔理哩o的o野的，不過，依家係我唔會再主動找佢喇，因為之前我試過主動聊佢，但佢擰咩面、望第二度、唔出聲應我，咁我做乜要勉強佢呢？所以我決定o左，隨緣吧，睇主的帶領。
今晚打o左好長篇的報導了，係時候要去洗澡睡覺了，各位晚安。