2006/03/11（Michelle Kwan Wedding，恭喜）
例牌節目︰飲喜酒。
仲有Jenny Li及Grace Mok一齊去旺角朗豪酒店六樓明閣飲（係第一次去六樓，但係第二次去朗豪），散場，大家都感覺意猶未盡，經過戲院，無好戲睇，心血來潮，落機舖打機囉，佢地一開始玩槍，而我係從來都唔玩的，跟住賽車，好衰0架，有個人坐在第二部車，隔開0左我同佢地，搞到我揀唔倒同佢地一齊比賽第一局，我仲好快咁玩完添，跟住我就等佢地，等緊佢地0個時，有人想等我坐緊部車喎，我死忍唔走，我幾驚呀！緊住等倒佢地玩完，我話要玩第二局呀，跟住我就係咁無儀態地大聲問「揀乜呀」、「揀邊個呀」咁，玩倒喇，終於可以一齊比賽喇，好0野，仲有0個個唔識的人一齊玩，好好玩呀，中途大家都互有輸贏，最後係我包尾（4/4），咁就玩夠起身走喇，當時係凌晨零時22分，Grace話要走喇，佢要搭火車，咁我就同Jenny去仙踪林飲0野傾計啦，坐坐下，Jenny接到Grace個電話，話無火車搭，咁就不如落返旺角一齊飲野啦。
嘩…可能太耐無見，一飲就飲到舖頭打烊的時間—凌晨3點，咁Jenny好好咁話不如走喇，唔好阻住人家收工，同意，走人，咁就首先同Grace去搭「綠色亡命」返新翠，而我就搭通宵巴士，Jenny步行往大角咀，一上到車就跟Jenny繼續等車時講到的話題，一直傾到4點13分，返屋企，晨早5點多d就睡覺。
有無搞錯呀，9點22分（我只係’訓’0左四個鐘頭咋）電話響，樂仔（兩柴）話有人甩更，「你得唔得閒去泥涌幫幫忙呀？」，NO，緊係唔得啦，一來精神唔夠，二來有約在先，就係同婷婷去花展，今日係花展最後一日喇，點可以唔去0架，老實講，係你—彭偉樂的事，我樂意去幫，但…隊的事，對不起，我是不願意多理，點解？…盡在不言中！知道的人就會知道（廢話）。
花展，本來我就不怎麼喜歡「花」這東西，但是絕不討厭，所以一早就答應婷婷一齊去，不過都有少少抱歉的是花了點力氣去遷就這個「約會」，弄到花展的最後一天才去觀賞，花…好靚、好多顏色，會場…好多人、好熱鬧，我同婷婷拍0左幾張照片。離開花展，行下行下見倒「小巴黎」越南餐廳，入0左去食0野，婷婷食雞絲扎肉河，我食雞絲湯檬，好味，跟住走0左去搭「叮叮」，老土…上0左架好多人無位坐的電車，但後面好快就0黎0左一架少人有位坐的電車，算…又可以點，咪就企下囉，北角落車轉乘地鐵回家了，在新都城二期廣場戲院附近遇到志堅，佢好似同個女仔（女朋友掛？！）一齊，很快咁打了個招呼，時間太短喇，睇唔倒個女仔個樣添，淨係見倒好大雨，要返轉頭上兩層扶手電梯繞道行橋返屋企（無帶雨傘嘛）。
p.s.哩兩日特別喜歡聽容祖兒的「逃避你」，點解？應境囉…
…明明迷戀，然而又不知怎向你形容…
…呆等，感覺被我斷送…
…緃使看不清所愛面容，仍未敢伸出我手觸碰…
…逃避你，卻又期待我可跟你做情人…
…逃避你，愛是遙又遠得很…
…而我始終不敢靠近，還是不相信能和你合襯…
…明明留戀，然而讓輾轉的掛念撲空…
…共你從沒開始…
文章定位：
