一個陽光普照的炎熱中午,一名女子在灣仔截停了一部的士。不到十秒鐘,她發現自己上錯車,令她後悔得要死......
「香港大學呀唔該!」
「嘩!星期六下晝喎!星期六仲去港大做咩呀?D講師都放假啦,邊有人做嘢呀!」
「星期六都有人要上堂嘅!」
「唔係!星期六邊有人做嘢架?喂!五天工作呀嘛!D講師好嘆,好多假架喎!」
「......」(你話咩就咩啦!)
「喂!咁你去教人定去上堂呀?」
「上堂...」(仲係被迫去嘅添!)
「哎呀!星期六都要上堂咁辛苦呀!喂!咁勤力去進修,你讀咩呀?」
「......」(關你咩事?)
「喂,咁我想問吓呢,你星期六都要讀書係讀咩架?」
「......」(揸你嘅車啦!)
「係咪進修讀degree嗰D呀?星期六都要上堂架咩?你讀咩呀?」
「......」(關你叉事!)
「你就勤力啦,仲去學嘢!喂!做老師呀嘛,做老師就唔駛咁辛苦啦!又多假,又冇咩做咁...(下刪20句評語)」
「我已經係老師啦!不過我E家都係要去上堂!我放咗工都要備課改簿架!!!」(究竟你清楚D定我清楚D呢?)
「哎呀!乜你係老師嚟架?咁你仲去讀咩呀?D老師唔係要讀完degree先做得架咩?」
「......」(反白眼中)
「喂!你係咪去讀master呀?讀master咁勤力呀?做老師要咁高學歷架咩...(下刪十多個問題)」
「我已經讀完master好耐啦!」(又如何?!)
「吓!讀完master啦!咁你仲要讀咩呀?讀博士呀?」
「......」(我都想知點解我仲要讀呀!)
「嘩!你都已經係master,咁教你嗰D咪要係博士先得!唔係點夠資格教你呀?」
「......」(點解你唔可以靜靜哋開車呢?)
「咁我想問呢,你究竟係去讀乜架積?我聽人講D老師好嘆架喎!乜仲要讀書架咩?」
「......」(妖~!)
「嘩!做乜你仲咁勤力,星期六都去讀書呀?你自己想增值,做補習天王搵錢呀?唔係做乜仲要讀唧?」
「我哋唔係好早放咗學就冇嘢做架!就係因為教育制度改變,E家D老師都需要去進修。唔係話讀完大學就唔駛再讀。我E家就去緊讀新高中課程詮釋,準備三三制啦!」(頭頂冒煙中)
「哦!咁架!D老師唔係好嘆架咩?好早放學,好多假放架嘛!」
「......」(係呀!真係得閒得要死架!你都嚟做吓啦!)
「喂!咁你點解唔去做補習天王呀?我睇報紙話佢哋搵好多錢架喎!你去做吓呀嘛!」
「......」(黐線!)
「我成日跟住D巴士見到佢哋賣囇廣告好威架喎!點解你唔試吓做唧?搵好多錢架喎!」
「唔係個個補習嘅都係天王,個個都搵好多錢架!」(點解我仲要答佢呢?)
「係咁架咩?D人話佢哋個個搵幾百萬一年架喎!」
「......」(點解咁耐都未到架呢?)
「喂!點解唔做唧?諗吓呀嘛!又有靚屋住,又有靚車揸!唔駛咁辛苦呀嘛!」
「呀司機,唔該你前面俾我落呀!」(走得快好世界!)
「唔駛上埋去呀?架車可以去到門口,唔駛行咁遠喎!」
「我自己行上去得啦!唔該哂!」(快D收錢啦唔該!)
「呀!咁勤力!俾心機上堂啦!」
「......」
文章定位：
