忟憎＠傻氣的蜜糖熊｜PChome Online 個人新聞台

2005-05-19 00:31:09| 人氣30| 回應0 | 上一篇 | 下一篇

忟憎

推薦 0 收藏 0 轉貼0 訂閱站台

今早我帶姨甥女去搭校巴，本應最遲要8:05am出門口，但係出門口之時，家姐仍然幫她收拾緊東西，唔係呢樣未得，就係果樣未得，我係"車立”口等姨甥女，兩部"車立”都走埋，最後攪到8:10am才走得，仲要跑樓梯tim．

一落到樓下，我飛跑到巴士站，剛好送車尾，果刻覺得好熱，又好忟．諗住湊姨甥女搭巴士返學，（心諗一陣返工實遲到，公司每個月遲到超過15分鐘，每分鐘要罰$2，好變態）諗住上巴士之際，有位小朋友家長（佢個女都係搭校巴）走過黎叫我，話校巴返左轉頭，我同姨甥女咪又跑番過去囉，果位亞姐仲黑晒面咁tim（即係校巴保母），亞姐仲對住姨甥女講，叫佢第日早ｄ落黎，下次唔會再兜圈返黎．

雖然佢上左校巴，但我心情卻沒有好轉到，仲係好忟！

我覺得好忟，就因為我覺得帶返學校既野，係應該前一晚準備好，而唔係出門口時先準備囉，無錯，我係忟我家姐！真係好嬲，好唔鍾意ｄ野做得咁趕．．．

嗰刻好想發洩，即刻打俾人呷，當我講完一切後，仍然好滾，但對方卻說出了一句：校巴都黎左，仲忟咩喎！．．．真係一言驚醒夢中人，又係喎，既然依家無問題，咁我仲忟咩呢？算吧啦，心情當堂放鬆番，仲無咁熱tim．．． ^ ^

我就係咁，好容易開心，又容易唔開心，算是情緒化吧！所以我好鍾意同人傾計，只有咁樣，先至可以多角度去睇一件事．

朋友成日話我無記性，仲叫我改善下，但係我卻視為優點喎，至少，我可以忘記好多唔愉快及唔開心既事，未必可以當作無件事，但我卻可以忘記對那件事情既印象，都幾好呀，哈哈！

p.s. 係呀，呢幅相係我今晚煮既餸黎嫁，老實講呀，味道就好一般啦，但都叫做睇得下，至少都睇得出我俾既心機，係咪！嘻！

我要檢舉

台長： * J.T. *

人氣(30) | 回應(0)| 推薦 (0)| 收藏 (0)| 轉寄
全站分類: 心情日記(隨筆、日記、心情手札)

回應(0)