星期六(15/11/2008)凌晨放工返家已經4點半，本來以為都可以瞓番3個鐘先起身，點知樓下有條麻甩佬唔知係咪飲醉咗，係到大嗌，真係豈又此理，要嘈返屋企嘈喇！真係想爆粗！
好喇，終於等到佢收聲，我正想瞓時，收到個短訊，難得有人病咗瞓醒都會send短訊覆番我，唉咪決定唔瞓囉~ 咪係度send嚟send去囉~ 咁就過咗一個鐘~ 其實個心係會甜架~真係會吱一聲笑咗出嚟架~
既然唔瞓6點幾落街食咗個好飽嘅早餐，就係我至愛嘅皮蛋碎牛粥加牛肉腸，好味！都唔知點解要收番樓下d "冬菇亭" 嘅熟食牌呢，搞到我冇得食雲吞麵同飲茶~ 個"冬菇亭" 依家得番兩檔，"合華" 同埋個檔食粥嘅(講起上嚟咁多年我都冇留意過佢個檔名添)~
(題外話：唉~ 唔知個"冬菇亭"係咪會拆呢？有時當你習以為常，以為d人事物係理所當然鮋時候，忽然間有日尼d人事物好可能已經變咗、唔見咗，就好似富善商場地下間文具舖咁，都做咗有廿年喇，細個時成日幫襯肥佬老細買文具、聖誕卡，幾個月前執咗冇做，依家個舖變咗賣衫，行過好唔習慣囉~)
食完返屋企執袋，搵極都搵唔到cap帽，又唔想攞細佬或老豆個d cap帽戴，所以決定唔搵喇，帶把遮算數。
之後睇咗本雜誌，都差唔多8點40分，係時候出門口，行過去海寶花園應該啱啱好9點。屋企冇晒水樽，去咗海寶花園樓下間7仔買咗支水，嘩，今日都幾曬喎~ 只不過係9點啫，就已經咁曬，嘩去到晏晝3點咪曬死！！！我尼隻彊屍十世都未試過咁早起身曬太陽~
會合Kit Ling同佢表弟(一個好乖嘅六年級生)，就急咁腳行去太和搭火車去粉嶺。哎呀，我仲以為Kit Ling識得點去綠田園添，真係服咗佢連地圖都冇print到出嚟，希望的士司機識路喇~
好彩搭的士十幾分鐘就去到咋，仲以為會遲到添，點知去到路口見到d旅遊巴剛剛到，嘻~ 好彩唔係跟車去咋，唔係我咪要再早d起身出門！
嘩嘩嘩，好多人呀~ 等齊人就分組呀聽briefing呀，嘩乜原來有300人參加今次個活動架！見到好多一家大細呀，有好多小朋友呀~ 連Kit Ling公司老細呀鬼佬高層呀都有出席喎，真係好大力支持今次個活動~ 齊齊親親大自然~ 亦係一個好好親子活動~
分組後聽綠田園嘅工作人員講解乜嘢係有機耕種、綠田園點樣運作，之後參觀行田呀，落手係一小塊田翻土施肥播種(白菜仔)。
我部數碼相機都唔知發生乜事，有電時唔俾我影相，到影到相時冇電，所以影咗好少相咋~
之後食lunch buffet，係到會嚟架，最搞笑係粟米斑塊點解冇粟米汁嘅？後來先發現其實係有粟米汁，只不過係擺錯位，不過d斑塊已經食咗好多喇~
天氣真係非常好，好適合戶外活動，雖然好曬不過又冇話好熱，起碼我冇熱到出汗先喇~
飯後活動係Bakery Workshops，有教做麵包、pizza、曲奇餅同豆腐花，而我哋個組整麵包。中學家政堂後已經冇整過嘢食喇~ 我、Kit Ling、表弟同晶姐一組，用有機材料整麵包。
都幾驚唔夠時間整架，1點半先開始呀。搓麵粉都要搓20分鐘，搓咗好耐都未好似樣，硬硬地咁~ 表弟好努力咁搓，搓得似模似樣，睇個款好似學過吓咁。勁呀！我哋都係等佢手軟時幫手搓幾嘢，邊有表弟咁好手力丫，得我哋搓都唔知要搓到幾時，哈哈~ 隔尼枱係度對塊麵團發洩緊，已經唔係搓，係起勢揼，都係好鬼好力！
因為焗爐只得一個，一次只可以焗兩盤，不過我哋遲開始整麵包，所以最遲攞去焗，要等其他組焗完先呀！又冇理由整咗d麵包唔攞就走嘛(原定3點半活動結束)~ 點都睇吓自己親手整嘅麵包係乜樣，所以等到麵包焗好先走。
Yeah終於出爐喇~ 我嘅製成品~
攞完麵包嗱嗱聲上旅遊巴，呵呵，居然俾我哋搭到順風車，係大元邨落車(架旅遊巴嘅終點站係九龍塘)。唉~ 真係好攰呀，係架車度瞓咗一陣眨眼就到大埔。
雖然好攰但最後都出咗沙田睇戲，同Kit Ling睇"爆粗band友"~
真係好好笑架~ 本來我真係好鬼眼瞓架~ 成十幾個鐘冇瞓過~ 但係套戲好好笑架，好睇到要頂住眼瞓，如果唔好睇嘅話我一早就瞓咗喇~
返到屋企都成11點幾喇~ 打電話俾你睇吓你係咪得番半條人命返工，聽你把聲好似好番好多，你話瞓咗成日好好多~ 個人安心好多囉~ 同你傾咗一陣，你話我十幾個鐘冇瞓過，叫我早d瞓，下次再傾過喎~ 嘻~ 你唔講我都唔覺攰添zzz~
星期五冇見你返工，真係好唔習慣見唔到你，又唔好意思問人你係咪病咗，個日心不在焉之餘覺得自己冇膽，雖然最後都有問到靚太。唉~ 你的存在...我已經習慣...
方寸大亂
啤梨：無論我今天 有多麼的風光
都要你背後打氣
無論在假裝 對你愛理不理
都當你是我知己
小雪：我幹這麼多 都不夠多
抑或你怕了我麼
慌慌失失怎麼竟像傻
*啤梨：無論你眼中 我怎麼的不羈
不過我最著緊你
無論在這刻 我最叫你生氣
不過我下過心機
小雪：請不必囉嗦 喜歡我麼
吞吐對答那麼多 拖拖拉拉
不知竟為何
小雪：始終不知怎做 都不知怎說
怎能明瞭心事
啤梨：其實我 如何面對
才讓你能明瞭心事
小雪：若我奉獻太多 你如何承受我
恐擠迫感太多
啤梨：恐擠迫感太多
小雪：一早消失方寸 一顆心很亂
怎能完成心願
啤梨：其實我 如何待你
才讓你能完成心願
合唱：難道做太少抑或是做太多 都是 我傻
repeat*
小雪：始終不知怎做 都不知怎說
怎能明瞭心事
啤梨：其實我 如何面對
才讓你能明瞭心事
小雪：若我奉獻太少 你如何明白到
我心喜歡你麼
啤梨：講多竟錯多
小雪：一早消失方寸 一顆心很亂
怎能完成心願
啤梨：其實我 如何待你
才讓你能完成心願
合唱：難道做太少抑或是做太多 都是 我傻
文章定位：
