台灣俗語話的饗宴
主題發表人：董峰政200.88.223.98
發表時間：08/29(14:35)
發表內容：…
台灣俗語話的饗宴
「台灣飲食」俗語的饗宴
前言─食飽未？
台灣人早期的查埔祖先，因為佇福建、廣東的原鄉散赤歹討趁，聽著風聲講台灣錢淹
跤目，所以相招移民來到台灣，結局是「唐山過台灣，心肝結規丸。」因為來到台灣
，雖然有種作的田園，不貳過時常愛看「天公伯也」的目色食飯，尤其遇著風台等天
災時，規年通天的辛苦付諸流水，有的只好四界借錢度三頓，若無著愛枵腹肚，甚至
有人餓死。所以過去鄉親見面的時，攏用「食飽未？」來關心對方的生活，後來變做
拍招呼的用詞。由此可知，「食三頓」、「顧腹肚」是過去台灣人生活中上重要的代
志，所以強調「食飯皇帝大」，因此佇台灣的民間，祖先留下了足濟有關食食(ciah8
-sit8)的俗語，處處表現了祖先的智慧。
飲食文化佮俗語
文化著是生活，生活上種種的活動攏包括佇文化中間。飲食是人類逐工愛做的代志，
所以年久月深，自然會形成一種習慣甚至一種文化，並透過語言來記錄。深入一般人
心的飲食習慣，攏會用一種通俗的話來流傳，即款話被稱呼做「俗語」。俗語的流傳
往往唅(和)民間的風俗並無完全一致，有的風俗早著消失，但是反映遮個(這些)風俗
的俗語猶原佇一般人的喙舌(口頭)裡。透過遮個俗語，咱著會凍了解古早已經消失的
生活風俗。比如「七月半鴨，毋知死活」、「鴨仔咧聽雷」、「牽豬哥趁暢」。
飲食的俗語，是台灣俗語上蓋重要亦是上豐富的一部份，下面以分類方式介紹有關飲
食的俗語：
飲食價值觀
「趕人生，趕人死，趕人食無天理。」
「枵雞不畏箠，枵人無惜面體皮。」
「萬項總是罔罔是，度腹肚袂枵饑。」
飲食習慣
「米飯一粒著抾(拾)起，拍損五谷雷拍死。」
「予人請，三頓免洗鼎。」
「一頓久久，兩頓相拄。」
料理作法
「緊火冷灶，米心那會透。」
「好歹粿著會甜，好歹查某著會生。」
「一粒田螺九碗湯，三粒田螺一醃缸。」
當令的食物
「有錢食鮸，無錢免食。」
「九月烏(烏魚)，卡好食豬跤箍。卜食烏，毋穿褲。」
「食巧毋是食飽」
飲食保健
「拚贏雞酒芳，拚輸六片枋。」(指生產的危險性)
「暗飯減食一口，活到九十九。」
飲食禁忌
「貪食無所補，漏屎極艱苦。」
「小飲是人參，大飲誤了身。」
節日飲食
「甜粿壓年，發粿發錢；菜包包金，菜頭粿食點心。」
「未食五月節粽，破裘仔毋敢放。」
「食尾牙面憂憂，食頭牙捻喙須。」
飲食禮儀
「一箸喙裡哺，一箸佇半路，一箸金金顧。─喙食目看。」
「相讓食有申，相搶食無份。」
其他
「九頓米糕無上算，一頓冷糜抾去囥。」
「食糖算頓，食水久長。」
「新婦驚食晝，討海驚風透。」
「舊柴草快點火，舊籠床好炊粿。」
結論
一個族群的語言，上會當表現語言的特色，是伊的「俗語」。俗語是一個族群生活經
驗的智慧，亦是一個族群的風土民情佮(kah4)思想信仰的縮影，反映迄(hit4)個族
群的個性，透過祖先的「古早話」，互咱會當了解本土文化的源頭。台灣的俗語，除
了充滿人生智慧佮哲理外，另外配合語言本身的音樂性，使得台灣俗語到處看會著、
聽會著「押韻」的旋律，若像一首短短優美的歌詩。譬如：「第一顧腹肚，第二顧佛
祖。」、「趕人生趕人死，趕人食無天理」，遮爾優美的俗語，若像「天籟」一般，
身為台灣人的囝孫，咱有應務愛來甲發揚光大。
「喙講父母話，手寫台灣文」這原本是一件天經地義的代志(事志)，但是佇台灣煞變
成是「天方夜譚」的故事。因為一百外冬來的歷史，台灣受著外來統治者的壓制，佇
日據時代(1895年)「日語」成做(ciann5-co3)台灣的「國語」，終戰了後(1945年)國
民黨政權嘛將「北京語」變做台灣的「國語」，所以毋管是「台語」抑是「客語」、
「原住民語」，攏予人(夆hong5)當做「鄉土語言」來看待，甚至佇學校場所、政府
機關被禁止講方言，因為有即款長期受著壓制、扭曲的語言政策，致使多數人講袂好
家己(ti7)的母語，現此時的青少年朋友(新新人類)，甚至一句母語嘛袂曉講。台灣
先賢連雅堂佇「台灣語典」的自序文內底講：「汝是台灣人，袂使毋知台灣的代志」
，伊擱講：「我身為台灣人，雖然會曉講台灣話，但是袂曉用母語寫文章，而且有時
擱無法度瞭解台語古漢字的意思，我感覺真見笑。」(注一)當今的台灣人，尤其是少
年輩，不但袂曉手寫台語文，甚至嘛袂曉喙講台灣話，咱若無意識著母語一旦失落的
嚴重性，從此以後台灣人不但會失去了自主、尊嚴，嘛真緊會變成「失聲」的族群。
所以「喙講父母話，手寫台灣文」，是建立台灣為主體性，推展本土文化，上重要的
工課。下面我提出幾種的看法，予逐家做參考：
第一個理由是「台語是會使用來創作個」：用母語來做思考，用台灣話來寫文章，這
對佔百分之七十四以上的台語母語人口，是有足大的意義佮鼓勵。「台語敢有字」？
這是足濟人的疑問，正確的答案是：「台語大部份是來自於古漢語」，所謂「漢藏語
系」的一支，所以當然嘛有「漢字」。舉例來講：「讀冊─讀書)」、「汝、伊─你、
他」、「箸─筷子」、「鼎─鍋子」、「走─跑」、「作穡─農事」、「尻川─屁股」
、「枵─餓」、「糜─稀飯」、「有身─懷孕」、「早晏─早晚」、「央倩─請托」
、「凊飯─冷(剩)飯」、「中晝─中午」、「斟酌─小心」、「細漢─小孩子」、
「定定─常常」、「跤手─手腳」、「新婦─媳婦」、「好食─好吃」、「搵豆油─
沾醬油」、「吊脰─上吊」、「有空無榫─不適用」、「努力(loo2-lat8)─道謝」
等攏是，即種字著是所謂的「古漢字」，到即碼猶原囥佇(khng3-ti7)咱古早冊佮喙
舌內底。
第二個理由是「用台灣話做主體性」：雖然定定聽人講「台語嘛會通」，其實足濟攏
是「袂曉假膨風」，因為多數人，差不多講十句話，三、四句愛轉北京語才會當來表
達。比如電腦「網路」、褪「口罩」、汝的「行照」、參加「朗誦」比賽，其中「網
路」、「口罩」、「行照」、「朗誦」等字詞著自動轉北京語來講，咱共(ka7)稱呼做
「半精白仔」台灣話，那(na2)像「雞母屎半烏白」，這著是長期無用台灣話做主體性
，所以一寡話講無路來。其實台灣話有足濟傳統典雅的講法，比如：「太太─牽手」
、「情人─搭心個(兄)」、「相聲─答喙鼓」、「歇後語─激骨仔話(孽畜仔話)」、
「繞口令─盤喙錦/箍喙舌」、「聊天─開講/話仙/破讀(pho3-tau7)」、「前言─踏
話頭/扮仙/起鼓」、「最後─煞尾/尾出」、「螢火蟲─火金姑」、「蝌蚪─肚拐仔」
、「黑面琵鷺─黑面撓抔(la7-pue1)/飯匙鵝」、「鯨魚─海翁」、「夜鷺─暗光鳥」
、「我們─咱、阮」、「老婆─牽手」、「玉米─番麥」、「花生─塗豆」、「口罩
─(牛)喙掩仔」、「木棉花─斑芝花」、「壓歲錢─硩(teh4)年錢」、「漲潮─滇流」
、「退潮─洘流」、「瀑布─水沯*(沖)」…等，咱攏愛用正宗原汁的台灣話，
袂使直接對(ui3)北京語翻做台語。目前即款用准的、硬拗的、硬翻的情形，相當的嚴
重。袂曉用純正的台灣話來交談，講起--來，這嘛是另外一種台灣人的悲哀。佇台灣即
塊島嶼，多數的人口私底下是使用台灣話咧(leh0)交談，如果介紹台灣的文化、風土
、民情、俗語，用北京語來做口頭的表達，抑是華文的書寫，根本無法度掌握母語的
原味佮感情，著親像用國語搬布袋戲，演歌仔戲，是袂孝孤咧(得)。
第三個理由是「語言是感情交流的工具」：一個人出世了後，佇生活中第一個所接觸
的語言著是「母語」，因為母語是由日常生活當中自然形成個，並毋是特別去學習個，
所以母語的腔口是無容易改變個、取代個，咱定定聽人講即個人講的是「南部腔」、
「北部腔」、「鹿港腔」、「宜蘭腔」、「海口腔」、「澎湖腔」、「關廟腔」等，
因為每一種的腔口攏有伊的特色，一聽著知，嘛感覺親切擱心適。比如「蕃薯cu5-ci5」
、「鳥鼠chu2-chi2」、「舉箸ti7-tu7」、平均「kin1-kun1」、「小妹mue1-me1」、
「雞肉ke1-kue1」一聽著知影是南部腔，抑北部腔；「捾菜(sai3)籃，去菜(sai3)
市仔，買紅菜(sai3)」，這是台南關廟腔的特色(ch轉s音)。台灣俗語講「離鄉不離腔」
，所以有人講：「鹿港人講話無相仝(kang5)」，因為鹿港人保留了較完整的泉州音；宜
蘭人講話：「酸酸軟軟(suinn1-luinn7)，食飯配鹵卵(ciah8 puinn7 phue3l oo2l uinn7)
，食甲光光(kuinn1)。」因為宜蘭人保留了較(卡)濟的漳洲音。對遮(ui3 cia1)，咱著
會當體會「少(siau3)小離家老大回，鄉音無改鬢毛摧。」的鄉愁，「美不美，山中水；
親不親，故鄉人。」的鄉土感情。
第四個理由是「語言是一種思考的方式」：每一種語言的形成是幾百冬，甚至幾千冬以
上，所以每一種語言攏保留了迄個族群深沉的文化。當咱咧(leh0)講一種語言的時，著
是用迄種語言咧思考，比如：節日的時陣，咱會祝福別人平安、快樂，但是清明的時，
無人講「清明節快樂」；仝款嘛無人用台灣話講「阿母，我愛汝」，因為咱無即款的文
化，所以著無即款的思考佮講法。另外像英語講：「open the door」，北京語講「開門」
，但是用台語來表達著加足豐沛：「開門，門開，門開開，門開開開…」等。講著數量詞
有一粒(個)、一爿(半)(ping5)、一周(角)(ciu1)、一條(liau5)、一瓣(bang7/pang7)
(如柑仔一瓣)，一屑仔(sut4)，分別代表一到十六之一的數量詞。擱比如講：台灣話對煮
食，有十種料理的講法：「炸(sah8)、煮(cu2)、焄(kun5)、煎(cian1)、炒(cha2)、
糋(-cinn3)、鹵(loo2)、炕(kong3)、炊(chue1)、封(hong1)」，攏有伊無仝款的手路。
另外像台灣的俗語有「父母疼囝長流水，囝想父母樹尾風」、「食糖算頓，食水久長」、
「初三四月眉意，十五六月當圓，廿三四月暗暝」、「卜去烏影，毋去吊鼎」、「一牽成
、二好運、三才情」、「目珠看粿，跤踏著火」，這攏是活跳跳的台灣活，攏是即塊土地
的聲嗽，毋過(m7-ku1)若是用北京語來講，抑者是翻做英語，台灣話的原味著走精去，
因為每一種語言的思考佮表達的方式有所不同所致。
頂面幾(kui2)種理由，值得逐家做伙來思考個。1930年台語文前輩黃石輝講：「汝是台灣
人，汝頭戴台灣天，跤踏台灣地，目珠(睭)看的是台灣的光景，耳空所聽的是台灣的消息
，生活所過的是台灣的經驗，喙舌所講亦是台灣的話句，所以汝愛用感情的筆，來彩繪台
灣的文學。」伊擱講：「用台灣話做文、用台灣話做詩、用台灣話做小說、用台灣話做歌
謠，描寫台灣的代志。」古早先賢講：「卜消滅一個國家，先毀掉伊的文化；卜毀掉一個
文化，先埋葬伊的語言佮文字」。身為台灣人，咱是不是愛覺醒，來關心家己的母語，當
咱的「喙舌佮筆尖合一」的時，也著是台灣人「文藝復興」的開始。
〔注〕連橫著台灣語典：「汝是台灣人，不能不知台灣事。」「余台灣人也，能操台灣之
語而不能書檯語之字，且不能明台語之義，余深自愧。」
2006/09/02登入奇摩胡清如的部落格網站
http://tw.myblog.yahoo.com/huchingju/article?mid=482
2006/09/02登入奇摩高雄市太極八卦掌協會的部落格網站
2012/04/03登入pchome新聞台胡小俠的部落格
高雄市苓雅區漢昌街84巷23號 電話：(07)761-2979行動：0929-569449
胡清如(筆名胡大俠)
文章定位：
