駱英的台文
主題發表人：駱英203.19.28.243
發表時間：08/29(14:53)
發表內容：…
1.發病兮時辰
茲禮拜是學生當咧無冗期考的大禮拜，卻是阮做老師的冗孱孱的一段快活的日子！
不拘，我遂去感著，大昨日捌燒到39.2度，彼日拄好禮拜，揣無醫生，姑不二衷去一間有
咧看診的小兒科與看，先生佮我注一枝射，我倒轉去茨也，食二包藥了後，著退燒矣，不拘
到今仔日為止，猶未好了完全，病毒ㄙㄨㄢ去我的聲帶遐置咧作怪，互我ㄙㄠ聲，講話足疾力
的，好嘉哉的是這陣不免講課，抑否，我著不知影欲按怎度日子囉.
人佇咧發病的時辰，眼中看著的世界攏變做灰色的色致，舉兮人孱ㄉㄠ4ㄉㄠ4，干但直直想
欲睏，咧睏的時辰又復睏昧好勢，舉身軀骨頭痛得無一位痛無周到的，有也是足艱苦的.
我這個人值普通時也真罕咧有啥艱苦病痛，逐擺著值咧開始欲"好命"的時辰，有的無
的艱苦病痛著相招做陣來，與我氣無限的.聽講不干但是我才按爾，是做老師的人一款
職業病，可能是普通時足無冗的，家己的生理的控制勿會發病，一旦精神放鬆落來，啥物
著攏擋昧著.若按爾講起來，咱人的精神力量有也是欲佮病魔決鬥的後盾.若拄到艱苦
病痛著不好懶勢，才會好了較緊是無？
2.一台雜貨也車
值下班的路途中央，各種新型的轎車相爭向前超車的大通路邊，有一台載得舉車身，無看
到車頭佮駕駛，蓋頭蓋面的五分也車，用恰若咧跳曼波的腳步，ㄉㄠ3ㄉㄠ3也對我的面前
ㄙㄜ2過去，茲幕與我恍然身在現代佮古早的時間交叉點.
茲台雜貨也車，ㄉㄧㄣ7ㄉㄧㄣ7ㄉㄨㄥ7ㄉㄨㄥ7載得舉車的咱一般民間的茨內所需要用著的周細
項大物件，有芒草做的掃帚、竹也編的畚箕、鉛線網也型的桌罩、材做的籠seng3…
.茲是看會著的大物也，若是彼點點滴滴的幼秀物也，藏置伊彼個ㄗㄞk4(窄也，擁擠也
)tong7tong7的車身內底的，著不知也有多濟囉？
茲細台的車載得茲爾濟的物件，看起來恰若ㄏㄛ3sing3(蒼蠅)di8(戴)ging3
ging4殼(龍眼殼)，一步也一步拖得生活沉重的擔頭，對日頭落山的方向駛去，好親像
一個孤單老人踏著ㄌㄛk4ㄌㄛk4hang4的腳步仝一款，欲落山的日頭光佮伊的身影拖得
ㄌㄜ7ㄌㄜ7長，漸漸消失置我的眼界內底…
3.歌聲滿人生
今也日的課程上到"詞"，我著擋不住心內的歡喜，亦無歹勢家己的"狗聲乞食調"，著招學
生鬥陣來唱出唐宋五代的詞人所填的詞作.唱到李後主的，伊的亡國的哀怨，值一聲復
一聲"問君能有幾多愁，恰似一江春水向東流"的尾聲中間，與人柔腸寸斷.
值咧唱陸游的時辰，恍然看到沉園重逢，舊情未盡的才子佳人，無奈的忍受命運的創治，
尾聲一字一血來唱出"錯！錯！錯！""莫！莫！莫！""難！難！難！"，是遐爾也無限的
心酸.
若唱到蘇東坡的，咳！彼著誠無仝款嘍！受到道家庇蔭的東坡，你看彼的生命芳氣是延
對四界去，唱到"月有陰晴圓闕人有悲歡離合此事古難全"的時，你看伊續落去彼句是"但
願人長久千里共嬋娟"，生命是充滿向望的，不是悲情的.
詩詞著愛佮唱出來的，人講"心聲"著是愛有情復有聲的，聲情的感受與咱佮幾偌百年前
的古早人心聲相通，與咱每日的操煩得到出路，每一工攏會使重頭發起！咱著愛與咱的
心內不時有歌聲做伙行.若安爾，人生的路頭復加遠，嘛會當輕鬆也行，是無？
詩詞著愛佮唱出來的，人講"心聲"著是愛有情復有聲的，聲情的感受與咱佮幾偌百年前
的古早人心聲相通，與咱每日的操煩得到出路，每一工攏會使重頭發起！咱著愛與咱的
心內不時有歌聲做伙行.若安爾，人生的路頭復加遠，嘛會當輕鬆也行，是無？
4.書房聽雨
算起來，茲當時是暮春時節矣！今年的春雨無gah4偌濟，值於晝開始落的茲場春雨，若我
無記不著，應該是開春以來上猛的一場，盡無像春雨的綿綿情意，反倒轉是有彼個熱人風
颱雨的聲勢，與人領教到春天變面的速度，有也是親像後母的面腔彼一款.
坐置靜悄悄的書房內底，原來干但有我打字的聲音，漸漸，對一聲二聲滴滴答答，離離落
落的雨聲，愈落愈緊，到落尾也，雨水落置ㄌㄛ4ㄍㄚ5頂面ㄆㄧㄝ4ㄆㄧㄝ4叫的聲音，掩
ㄎㄚm3過我的打字聲，彼兮是大自然的雨水聲，昧感覺吵呢！
值雨聲的包圍內面，有一款"風雨中的寧靜"與人心平氣和，一工的疲勞欲似著安爾與洗
得清氣溜溜矣！
吹面不寒楊柳風
今也日清明，我來到一間廟寺前佚陶(蹉跎).我不是欲來拜拜的，是專工來廟口茲個湖邊
欣賞伊企偎置岸邊的柳樹.
中部的春天總是溫暖加濟咧春寒.置劍湖山腳的茲個湖，四匝圍攏是楊樹或是柳樹，有的
企得直溜溜，有的是以半倒的姿勢，隨在歸頭鬃的柳條垂落入去湖水內，輕兩ㄒㄧㄨ4的柳
枝佇春風的輕撫下，款擺腰枝，彼款夭嬌的模樣，好親像一個長頭鬃的女人，頭也攲攲悠
閒的用鬃梳咧律家己的頭毛，情境恍然置詩的世界.
安爾吹送與我的楊柳風誠在是和爽閣有豐富的詩意的.睛睛看著環湖的柳樹，我的心內
有看見「灞橋折柳」的離情別意，也有感受到「昔我往矣楊柳依依」的黯然銷魂…
不過茲寡傷情的場景，攏不如柳永詞「今宵酒醒何處楊柳岸曉風殘月」的曠達佮浪漫，
與我的心思得到一時一間的徹底的釋放.
人生無須要太濟的傷感，生命愛容允心靈去走揣故鄉.
借問心靈故鄉在哪裡？置風中，水上，柳條，春花，山間，明月…總不是置凡塵俗世矣！
人生若恰若舞台者，每一條歌曲總亦是有唱煞的時辰.無論好聽抑是敗聽，彼當時兮因緣
聚合鬥偎做夥兮人事，自然著會值尾聲收煞彼時漸漸散去…
自細漢到旦，人生舞台兮歌曲不知也唱煞幾遍矣？加早值純情兮年紀，若離別兮歌聲唱出
來，目屎著擋昧住來ㄘㄚp4ㄘㄚp4滴，實在是親像寫兮:「悲莫悲兮生別離」，是盡不甘放
下茲段兮感情所致.不拘，仝款兮離別情景，發生值阮一班老師進修班兮中間，在互相恭
喜畢業兮祝福聲情內底，另外有一款無影無隻兮目屎值我兮情感內底酸軟也酸軟也延來
延去…
欲晏時，我斟酌佮家己打扮過，行出房間，坐著電梯，位九樓下來，來到八樓擋咧，電梯門
打開，一個查甫同窗意外的出現在眼前.伊是我頭一個熟似的同學，著是值四年前註冊彼
工，伊都好排置我兮頭前，阮互相知也是同班了後，彼早也話著講昧煞.續落來茲四年阮
並無啥交接，日子倏一下竟然亦來到茲落尾也工矣！上尾一工復拄到伊，而且是單獨兮情
景下，實在有淡薄也咧搬戲兮感覺！置去佮轉來兮計程車內，阮復一擺像四年前初初熟似
彼辰仝款有講昧煞兮話.講到電梯前兮時辰，該當講再見矣，無彼個傷情，卻是有小可也
甜甜兮情份，與阮兮離別滋味甘入喉.
若是查某同學，有二個加搭心兮知己.想起四年前上第一節課時，導師叫阮一個也一個上
台去做自我介紹.值我下台轉來家己兮位，才坐落去，隔壁彼個自我介紹時講話盡閉思
兮同學，竟然家己揣我開講，伊兮面容盡溫馴，態度盡親切，與我有盡熟似兮感覺.續落來
茲幾年，阮二人恰若褲帶結相連仝款，食暗頓著是阮交心兮透氣時間.阮ㄌㄤ4二禮拜才同
窗上課一擺，阮無愛來上一寡無聊兮課，卻是盡愛彼段交心兮時間.伊盡鰲扶家，嫁與一
個盡愛口林酒兮翁，若不是伊兮撙節，我料想尹翁是無才調做到大位的.平平是查某人，
復互相有投緣，猶復加上同窗兮純情關係，阮著佮普通時也值現實生活內底兮烏黔黔兮
心事一條也一條脫開束縛，任在阮兮心靈置無限兮自由空間釋放日常生活內兮鬱卒、委屈.
上尾茲年，因為選課兮關係阮無法度同班上課，嘛失去食暗頓鬥陣開講兮機會.不拘，身
離心偎，值彼工兮惜別宴會中間，伊才踏入餐廳大門，看到我著直接踵過來佮我講長講
短，純然無彼個久別兮生份.阮加緊互相留下電話，約束互相愛復相揣，恐驚也人生茲條
路會親像杜詩講兮「明日隔山岳，世事兩茫茫」矣！唉！咱現代人無驚大山大海兮擋路，
驚是咧驚心內兮萬重山兮阻礙矣，是無？
猶有一個查某同學，我嘛愛佮記錄起來.伊是一個好命人，後頭茨是好譽人，嫁與一個不
是伊上愛卻是會當與伊上自由兮翁婿.看伊兮穿插，舉身軀全日本貨，一ㄙㄨ衫上無愛開
一萬兩元以上，每暗欲煮飯無是任在伊咧主意.我咧想，茲個世界哪會有茲好款待兮查甫
人，哪會有茲快活兮查某人？不拘，伊佮我講伊無愛伊兮翁，只愛伊兮地位和伊會使與
伊兮自由爾爾.茲著是我想昧通的載誌？不拘，慢慢也我著會當了解伊兮想法矣.人食到
上四兮年歲，情愛對伊來講是無啥大載志，卻是輕鬆自在無束縛兮生活才是伊上ㄍㄚ7意
的.伊是一位盡理性兮查某人，昧像一般兮女人ㄎㄚm4昧著(動輒)就與情所縛，親像安爾
兮朋友有也是一個參考.
此去人生兮路途敢有緣復再佮茲幾個朋友開講人生兮逐細項載志？尹攏一直佮我吩咐叫
我愛ka3電話與尹，我干但文文也笑，我會當保証兮是尹會留置我兮情感世界內底，我昧
請裁佮尹放乎昧記矣，對我來講，安爾著是我與朋友兮深情矣！
彼日暗頭也置你按捺阮兮所在，你我講起著咱茲塊土地點點滴滴兮載誌，雖然你因為家
內事無閒復無眠，咱干但請裁開講幾句也話爾，不過，你有一句話留置我兮心內不時咧
牽絲，不三時就去想著…
宜蘭--臺灣人心靈兮故鄉！
對我即兮置中部庄跤大漢兮台灣人來講，宜蘭是一位迢遠生份兮地名爾.較大漢兮時，知
也伊厚雨水又復有明山秀水;等到即一二十年政治開化了後，伊出得一兮陳定南益加拍
開宜蘭兮名聲，續落來兮宜蘭欲似變做全省各縣市兮"模範生"，逐兮台灣人攏有一兮向
望，欲共咱所企起兮地方建設和宜蘭仝款，平平是台灣人，敢會無才調？
頭一遍來宜蘭是行北宜公路過來兮，值九彎十八ㄨㄞk4兮公路頂看下來，地理名詞兮"蘭
陽平原"就出現在眼前，初初兮印象是感覺即兮所在有也盡平，四界全水，有一塊一塊兮
水田，復有大細條水溝.企懸懸所看著兮蘭陽平原，是與四匝圍兮大山和大海所抱住兮所
在，眼界盡空闊.等到親目珠看到名聲透全省兮冬山河時，眼界又復闊一大層，若親像安
爾兮水嘛才有像水，誰講台灣水攏是臭水溝呢？
即行復來茲是沿水路來兮，值黃昏時也兮風雨中，阮復一遍踏入宜蘭茲塊土地.伊用伊出
名兮雨水面腔迎接阮，我一點也著昧失望，顛倒感覺盡自然.阮兮車行過鬧熱兮羅東市
也，巡過綿延不盡兮運動公園四匝圍兮當辰，天色漸漸開矣！公園內外才適好予雨水洗
過兮樹也草也，逐叢著盡新jian，對阮茲許也過路客吐出生甜兮芳氣.阮無閒入去內底
行踏，干但位牆圍邊也放眼共伊瞬一ㄌㄧㄣk，一時間我覺是家己是身在美國兮公園內呢！
加早去美國佚陶，攏欣羨尹外國人會使共公用兮設施起得赫爾人性化和自然，不知也置
咱台灣嘛有安爾兮所在，莫怪游錫ㄎㄨㄣ(前縣長)會講"有宜蘭就不免移民紐西蘭".
離開羅東運動公園青翠兮懷抱了後，西山兮日頭掙脫了烏雲兮葛葛纏，放射茲日最後兮
光輝，笑面來迎請阮外地人兮拜訪.沿路企置二爿邊也兮"將軍梨"看板共阮講三星鄉即
目到矣！適才問路，在地人共阮講今也日盈暗阮欲歇困兮"宜蘭厝"就企置路邊爾.所致，
阮開始斟酌看門牌號，無張持洶洶遂予眼前正頭前兮兩支山抓著咧！值溫柔兮黃昏日
頭光做背景之下，有幾絲爾白ㄒㄧㄙㄞk4兮白雲或者是山嵐，輕ㄋㄧㄨㄙㄧㄨng復懶勢也懶勢
歇踮半山腰中間.我和伊一見鍾情墮入愛河，我欲似聽到山內仙人兮呼聲…目一目耳
宜蘭厝遂行過頭去矣！
茲間宜蘭厝企置梨園邊也，猶未入門就予門扇前彼幾叢野薑花兮芳味煞著;矮矮也兮
大門是粗材釘起來兮，半扇開開兮親像不三時咧迎請人客兮款.前院兮砂石路引阮來
到茨前，舉頭一看是一棟不止也氣派兮三層樓建築，和我自本按算兮"民宿"盡無合
輪！非洲進口兮櫸木予茲間茨兮扶梯和門窗有一款盡ㄗㄢm3gamg3復自然兮風格，都市
內冷ㄍㄧ3ㄍㄧ7兮鐵窗也門置茲所在全然無看得影隻.三四間闊ㄌㄨㄥ7ㄌㄨㄥ8兮和室按捺阮
過茲二暝.透早梨也園兮雀鳥也就偎來窗也邊呼請我去看近在眼前兮大山，是你共我講
我才知也尹是中央山脈和雪山山脈兮起頭，有也是"有眼不識泰山"！展開ㄙㄚㄇㄧㄨㄙㄚ
ㄇㄧㄨ兮目珠，咱台灣五嶽中兮二座雄偉兮大山是值"虛無縹緲"兮早起兮濛霧中，茲當時
兮大山好親像頭罩網絲兮新娘，含情脈脈，引人遐思.
欲離開兮前一暗，坐置你二樓兮十外坪闊兮冊房內，自由自在掀過一本復一本兮冊，山風
共我ㄉㄠk掀，三面壁邊兮冊櫝密密是兮台灣鄉情歷史兮冊，對四面八方親切兮共我呼請，
我舉兮人攏茫去矣！食這大漢猶不捌口林得醉茫茫兮滋味，今夜置三星鄉山跤兮葛瑪蘭
厝，我頭一遍試到酒醉仙飄飄兮感覺.
安爾，我才明白你對我講兮--
宜蘭--臺灣人心靈兮故鄉！
朋友，多謝你送我茲句話，不三時我若看到對你彼也綿延到阮中部兮兩支大山，我兮心靈
就轉去故鄉溫存一霎久也，嘛懷念著你翁婦兩人和你兮子，猶有你收養兮流浪狗，猶有你
彼也兮一草一木…
海水變寒兮時辰，北國兮水鴨就向南飛;秋風轉冷兮時候，客人庄兮柿糕就黃sim4sim4，
對著企置中部兮我熱情呼請.
每一冬，阮欲似呢過冬兮海鳥同款，偎北兮客人庄就是阮定著要報到兮所在~值這柿糕黃
sim4sim4兮秋冬中間.
沿路，十一月兮菅芒花一叢復一叢，生得密密是，山頭好親像一夜白髮兮憂愁人，加添著
秋冬寥蕭兮氣氛.欲入來這個客人庄進前，總嘛未當無去探望彼個水姑娘仔-峨嵋溪.伊猶原
彼爾嫻靜、優雅，恬恬照著伊兮腳步，嬝娜多姿，轉踅過一庄復一庄.
踮橋頭和伊對向一霎久了後，阮就踏入到北埔慈安宮面前.自廟前總佮看起來，鬧熱滾滾，
和一般兮台灣庄跤所在兮菜市或者是廟口無啥差.若行入去中間，才會發見客人庄無同款就
是無同款，逐擔所賣兮物仔，雖然攏爭差無偌濟，不是客人菜包、麻薯，就是糕仔(粄條)、
柿糕…卻是這寡食物全全手工作兮，價數俗復好食.賣麻薯兮歐巴桑現場將一包麻薯分做都
好一喙一粒兮細粒麻薯，若是仰咱家己一塊一塊擠，恐將喙涎就要流咧幾偌斤，結果，人伊
干但用二腳箸，二三下半手，真正su4等，不免五分鐘，就處理得清汽damdam，予我食得一
擺高品質兮客人麻薯，土豆芳猶置喙角旋來旋去呢！
這爿賣食兮、賣oumiyagei兮，滾強強，彼爿四界傳來大細聲兮選舉宣傳車，嘛真拚勢，輸
人不輸陣，予阮耳孔所聽著兮，全是正港兮客人話.斟酌佮聽，復真有意思，有淡薄仔熟似
呢！有兮恰若廣東話，有兮強欲像閩南語，有兮好親像北京話.花花仔聽起來，聽上有、上
濟擺兮一句話，就是-承蒙您啊！
大先不知意思，等了解後，真正是心適，這和台語兮古雅是有逼兮啊！北京話講謝謝，實在
是不如客人講承蒙您彼爾有意思呢！比較一下就知啦！客人仔要表達多謝兮意思，竟然用得
這爾藝術兮語言，一句承蒙您啊！
不但古雅，又復是盡在不言中，後韻綿綿，使人聽得心醉，契摩真好！
日頭欲落山兮時，涼冷兮暗風，伴著宣傳車放送頭一聲復一聲兮承蒙您啊！親切誠懇兮話語
dei5阮兮跤步向南行…
2006/08/30登入奇摩胡清如的部落格網站
http://tw.myblog.yahoo.com/huchingju/article?mid=463
2006/08/30登入奇摩高雄市太極八卦掌協會的部落格網站
2012/03/30登入pchome新聞台胡小俠的部落格
高雄市苓雅區漢昌街84巷23號 電話：(07)761-2979行動：0929-569449
胡清如(筆名胡大俠)
文章定位：
