[轉貼自訊報]
老馮，我想送一首歌畀立法會！
係咩歌？
電視劇飛越十八層嘅主題曲！
幾時做架，我都無乜印象，不如唱嚟聽吓！
「世界腐敗，犯法那需領牌，看吧，強盜滿街，法理若在，爲何強盜滿街，難爲正邪定分界！」我對立法會非常失望！
點解呀？
立法會根據基本法第七十一條第八項，要求行政當局為東亞運大幅超支二十億而進行聽證，竟然只得五票贊成，十九票反對，三票棄權，一票請假之下而被否決，而曹姑媽反而批評提案嘅吳議員，究竟澳門嘅公義去咗邊？
克仔，議員唔同意動議聽證相信有佢地嘅理由嘅，就好似歐安利議員咁講，原來立法會係唔可以審判政府架！
尊貴嘅歐議員係政府委任，佢一向立法會上面嘅表現有幾出眾，市民都有目共睹，我唔想再浪費口水，但係立法會嘅主要職能之一就係監察政府，監察權力中包括進行聽證會，有聽證會當然就會有判斷結果啦，我唔知道歐安利議員所講嘅審判係咪指聽證會之後嘅判斷結果，如果係，我對佢嘅專業資格有保留，再睇番一眾民選嘅議員，仍然投反對票，實在令我痛心疾首，政府舊年嘅開支不過係百幾億，而一個運動會用咗四分之一嘅政府開支，而其中百分之五十仲係超支，而一眾議員竟然仲幻想，行政當局自己查自己可以查出有問題癥結，十九位議員究竟係無知定純情呀？
咁又唔係，就好似群爺話齋：「政府同立法會都係兄弟一樣做事，這又相『煮』何太急呢？」
群爺幾時都有Ｄ高見畀市民，不過唔係個個人都好似佢同行政當局咁好「兄弟」。
唔好咁勞氣喇，講番曹姑媽，究竟佢又講咗Ｄ乜批評吳議員呀？
當日表決東亞運聽證被否決後，吳議員作為提起人之一，就發表表決聲明，聲明中表示「我們為現在無法推動立法會在這項工作上發揮對行政權的應有監督功能而向公衆致歉」。語言剛落，曹姑媽就發難，話首先對吳議員嘅言論表示遺憾，佢將吳議員嘅向公眾致謙言論，直接演繹為立法會全體議員要向公眾致謙，所以佢話吳議員嘅言論指所有投反對票的議員都係同居民對立，仲話咁樣講對其他議員好唔公平。拜託喇！曹主席，佢只係識得批評吳議員嘅表決聲明內容會對投反對票嘅議員公唔公平，曹主席佢又有無諗吓澳門市民每人被迫畀咗九千蚊去支持呢個東亞運，得番嘅結果就係「澳門版國皇的新衣」，好多聰明嘅商賈名流高官傳媒公開表示東亞運好成功，但係澳門唔聰明嘅市民只係見到有人去祐漢公園派門票畀Ｄ公公婆婆仲包車包食請佢地睇東亞運，唔聰明嘅市民只係見到每個學生被迫去睇半日運動會，唔聰明嘅市民只係見到十日運動會期間六千名與會人員任食，結果就食咗三千萬公帑嘅飯盒，唔聰明嘅市民只係見到入場人數不到百分十，但係政府就話售票率超過百分之七十，唔聰明嘅市民只係見到運動會期間遊客人數不升反降，而政府喺東亞運之前委託澳大嘅評估結果，竟然預言東亞運將令澳門有五十一億收入。唔聰明嘅市民只係見到嘅係一場比賽只有兩名選手，最後拉到一名壯丁，湊雜成軍，結果三人比賽，三人得獎，當然成功嘅東亞運只有「聰明人」先至睇得出嘅。
聽你咁講，我都無話可說！但係睇傳媒嘅報導，好似投反對票嘅人先至係做得啱！
喺今時今日嘅澳門傳媒生態下，好多公共事務嘅真正內容，已經唔容易分對錯，不過我相信歷史會好好評價呢一眾「聰明人」，還市民公道。
文章定位：
