山與海的對話 .

2,826愛的鼓勵 0訂閱站台

黃金雨

        天に代わりて不義を討つ  忠勇無双の我が兵は   

        歡呼のに送られて  今ぞ出で立つ父母の国   

        勝たずば生きて還らじと  誓う心の勇ましさ

    查埔人攏入空內矣。怹有的夯鴨頭[1]拍石頭，有的磅石，有的扒塗仔，有的共身軀弓做一隻水牛港，出力共貯滇礦砂的礦車一車一車位空內捒出來。

    讀冊囡仔嘛攏去學校矣。毋過這下早仔，怹無佇教室上課，無佇運動埕做操，嘛無佇學校的菜園仔種菜、薅草。一千二、三百名金瓜石公學校的學生囡仔，攏手攑日之丸旗，予怹的先生𤆬出來佇學校外口排列，隊伍綿延山路幾偌个彎斡。

    雨霎霎仔落，山霧茫茫，怹褪赤跤徛佇澹澹醬醬的塗路，搧位路盡磅彼頭的海墘仔吹起來的一陣一陣冷風，毋過怹幼稚的面、怹小小的胸坎，卻是滿滿攏是愛國的熱情。

    逐个囡仔攏綴怹先生的指揮動作拼命擛旗仔，逐个囡仔攏看怹先生的喙形瞪盡食奶仔力唱歌，旗海像湧滾絞佇礦山的山谷，歌聲響亮甲規个山城攏會顫振動。

    彩雲仔穿一軀加冗幾偌號大的紺色海軍仔領制服，伊嘛摻佇隊伍內底，臭奶呆臭奶呆綴人唱甲真拚勢。伊才一年仔，毋過這種場面伊已經毋是頭擺參加矣，伊知影等咧有一个紅綾袚胛的少年家會行對怹面頭前過，經過怹的歌聲，怹的日之丸旗，然後拖著沉重的背影，沓沓消失佇故鄉金瓜石淡淡哀愁的雨霧。

    其實彩雲仔並無了解這條歌的意思，伊干焦知影這是逐个讀冊囡仔攏一定愛會曉唱的送兵歌，便若學校長佮教頭叫全校的囡仔攑國旗出來外口排列唱這條歌，就是金瓜石閣有少年家囡仔欲去做兵矣。

    毋過嘛毋是逐遍全校出來排列攏有唱歌、攑國旗。有當時啥物攏無，怹干焦隨人佇手股頭鉼一个烏孝恬恬徛佇遐，等一跤用白巾仔包牢咧的四角箱仔予人𢯾咧，對淡淡哀愁的雨霧內底閣出現，經過怹面頭前的時，怹才腰向低低共行禮，按呢就會使矣。                 

  「万歲！」

  「天皇陛下万歲！」

    煞學彩雲仔用包袱巾仔共冊揹起來就趕緊傱轉去。踏入門，伊就聽著老爸火龍仔佇屏後的房間哭甲齁齁叫，怹姨仔隨仔輕聲細說耐心哩共問話：「阿牛仔𤆬你去三角湧看了到底是按怎？你毋就講。」

    「嗚……，先生講咱人的目睭就可比一面鏡，鏡的後面有一沿水銀，伊講我的目睭就是彼沿水銀去挵害去矣啦！嗚……」

    「水銀挵害去？按呢欲按怎？伊敢有法度醫？」

    「水銀挵害鏡就看無矣妳毋捌諾？鏡破敢會當修理？青盲矣啦！嗚……」

    「……」

    彩雲仔恬恬徛佇大廳聽怹老爸一直哭一直哭，過一睏真大睏，才閣聽著怹姨仔無啥氣力講：「按呢囡仔欲按怎？咱一家以後欲按怎？」

    「青盲袂做矣欲按怎？囡仔共辦停學，搬搬轉來去崁跤寮仔啦！」

    聽著老爸講欲共辦停學搬轉崁跤寮仔，彩雲仔門簾仔掀開一聲就傱入去，想欲喝無愛。毋過一入去到房間，伊看著老爸倒佇眠床，怹姨仔手提一塊面布，一直哩拭怹老爸按怎拭都拭袂焦的目屎，佮鼻著臭臊臭臊的目睭屎膏。伊目屎輾輾翱，嚨喉頭煞卡牢咧，「無愛」二字仙喝都喝袂出來。

    崁跤寮仔是屬雙溪庄界管的一个山內兜底的小庄頭，全庄才蹛八戶人，五十偌丁口，隨仔的外家厝就蹛佇遐。

    隨仔是孤查某囝，二十捅歲矣老爸老母猶共留佇厝內，拄好本居地蹛礁溪的火龍仔自細漢無爸無母，三十七、八欲上卌矣猶羅漢跤仔一个沐沐泅，遊啊遊，遊來到附近的庄頭，人看伊古意，才報伊去予隨仔招。

    予人招入門火龍仔真認份、真骨力做。崁跤寮仔四箍輾轉攏是崎山，無平坦的土地通種作，火龍仔就剉斷菅尾，挖菅尾頭起來，用菅尾頭刺刺彼爿插入去山坪塗底，一抱一抱相倚排規排，排好才耙塗落來坎佇面頂，按呢硬佇崎崎的山坪，加開墾出幾偌稜的番薯稜，通好加種咧真濟番薯。

    隨仔的老爸真𠢕用竹篾仔編物件，有時伊編寡菜籃仔、火熥、茶籗、𥴊壺，抑是畚箕仔，火龍仔就津津tong-tong共擔去雙溪街仔賣，換一寡白米、油、鹽擔轉來。日子過了真清苦，毋過上少無一家圓圓，和和樂樂。

    這款日子經過成十冬，彩雲仔出世、大漢該當愛讀冊矣，老丈人嘛破病過身，火龍仔才決心𤆬某囝離開崁跤寮仔，出去金瓜石揣趁食。

    自明治30年（1897），日本田中會社提著金瓜石礦區的礦權，

佇金瓜石設立礦山事務所，金瓜石就開始有大量的日本職員、日本

礦工位內地遷入來，一棟一棟的日本宿舍嘛綴咧一直起起來。

    日本宿舍上高級的內底有花園造景，閣落來有二連棟、四連棟

，上差的是礦工階級哩蹛的一排十偌戶的長屋。遮的宿舍無論好

䆀，門口攏有下一跤用柴枋仔釘的大跤糞埽桶，火龍仔初初到金瓜

石身無技藝，伊佇會社引著的工課就是清遐的糞埽桶內底的糞埽。

    逐工伊用沙耙仔一桶一桶共糞埽耙出來，耙好才用扁擔一擔一

擔共擔去山跤的豬灶燒。工課算是穩定，毋過餓袂死嘛脹袂肥，火

龍仔想欲加趁幾仙銀仔通改善一家生活，就趁欲暗仔煞工閣兼去共

人擔塗炭。

    塗炭一擔一百斤，閣愛擔咧跁崎、落崎，火龍仔人矮閣瘦，逐工位透早擔甲暗，按呢位死的擔倒來，擔甲有一工身體實在是堪袂去矣，規身軀攏痠疼甲擋袂牢，伊才凊彩去青草仔店拆草藥仔轉來煎。啥知藥仔啉落，頭殼就強欲煏破，目睭一直無看去。

    死毋死，人閣報伊去揣一个赤跤仙仔。赤跤仙仔用布袋針撓伊的目睭筋，撓好提一罐藥粉仔予伊，叫伊轉去攪卵清糊目睭，糊一下才規組害了了，目睭規个攏無看去。                                                                  

    轉到崁跤寮仔，火龍仔規工倒佇眠床干焦哭。彩雲仔嘛哭，伊哭無冊通讀矣。

    隨仔一向上軟汫，毋過當當水淹甲規家人的鼻空，干焦伊無閒工通哭。

    伊去會社捒塗仔，一台礦車貯五十畚箕的塗，講輕無輕，講重無重，拄拄好一家四頭喙的重量。

    捒啊捒，一車閣一車，一工過一工，隨仔透早出門做甲暗，做甲連日子按怎過都毋知。有一工，伊捒車捒甲一半雄雄感覺腹肚真疼，褲跤尾閣有血水流出來，伊才趕緊揣一抱較茂的菅尾去覕佇後壁，才知有身毋知，已經落胎去矣。

    轉到厝，火龍仔猶是倒佇眠床哼哼呻呻。隨仔風火有夠著，揤倚用拳頭拇就直共舂，罵講：「查埔人規工倒佇眠床欲死欲活，放查某人做甲落胎，你是佮人做啥物查埔人？是做啥物翁？」

    彼暗，火龍仔哭甲真悽慘。

    隔轉早仔隨仔無顧身體虛弱照常去做工，做甲一半若閣感覺有血角落落來，伊就仝款走去覕佇菅尾後，共跤紮仔敨開予血角落出來，才閣紲咧做。

    欲暗仔煞工轉到厝，隨仔佇房間看無火龍仔。伊開始四界揣，揣來到灶跤，才看著火龍仔坐佇低椅仔摸咧摸咧當哩絪草絪。

    草絪一絪一絪散翸翸㧒甲規塗跤，逐絪都絪甲歪膏揤斜。隨仔這陣目屎才輾落來。

    一擺做袂好勢閣做第二擺，第二擺閣做袂好勢做第三擺、第四擺、第一百擺，跋倒閣再跁起來。火龍仔摸甲毋但會曉絪草絪，伊嘛會鬥剁燃火的柴枝、嘛會鬥鏨豬菜，彩雲仔若共牽，伊嘛有法度擔水、擔肥去渥菜，甚至嘛有法度行真遠、真坎坷的山路，去到雙溪揹粗鹽轉來豉鹹菜、豉菜頭。雖然代價是褪赤跤的跤指頭仔不時踢甲流血流滴、指甲藃藃起來，總是若會當加減替隨仔分擔，按呢伊就心甘情願。

    毋過嘛毋是啥物所在火龍仔攏有才調去，像若欲去蠓仔坑共海墘仔人分魚露，彼就無隨仔袂使矣。

    「魚露」是海墘仔人欲做魚脯仔的時煠魚仔賰落來的湯汁，對怹來講是濟甲愛倒倒掉的冗剩物，毋過對買袂起魚仔的彩雲仔怹彼家伙，彼卻是真真難得的人間好滋味。只不過這款好滋味，隨仔怹欲得嘛真真難上難。

    附近庄頭有一句唸鬥句，講：「基隆雨，雞母嶺路，文秀坑的查某。」意思就是用基隆厚雨水的程度，來對比雞母嶺路的歹行佮文秀坑查某的𠢕妝。隨仔怹若欲去共海墘仔人分魚露，就是愛擔油罈盤過雞母嶺，才位雞母嶺溜崎落去到海墘仔。

    雞母嶺論真講毋是蓋懸的嶺，只不過若欲位崁跤寮仔的方向盤過，就干焦一條像牛傱過草抱林留落來的路痕仔，彼種講路無成路的牛挵路仔；尤其欲落去海墘仔彼斬趨崎，塗跤是紅銀塗的，滑溜休，起落攏愛靠雙手去挽牢邊仔的菅尾，才袂規仙人像哩跙流籠。

    魚露若提轉，隨仔會共下較鹹咧才閣加煠一遍，煠好才用矸仔入予一矸一矸保存起來，若煠青菜仔，倒一屑仔出來搵，按呢規家大細就食甲笑咍咍矣。想到遮，莫講頭前是雞母嶺，就準做是刀梯，隨仔照常會共控起哩！

    生活已經有夠艱苦矣，日本人閣來彩雲仔怹兜共怹的豬仔挾耳仔，閣交代講豬仔已經做號袂使「偷刣」，若無就愛罰金兼拘留二九工。

    家己的豬袂使刣，欲食豬肉煞著靠配給。隨仔佇會社做工，厝內有破相的、有囡仔、有老人，按呢每月日會社配予怹一塊量約半个手婆大的肥豬肉。

    半个手婆大的肥肉欲按怎分伻一家度規個月？隨仔激破頭殼。尾手伊想著共肉豉鹹鹹囥佇灶頭，等欲煮菜的時才提來對鼎底輕輕焐一下，按呢逐家就攏啖有著矣。

    昭和17（1942）年七月，彩雲仔閣牽火龍仔盤山過嶺到金瓜石，欲去酒保領會社配給的彼塊半个手婆大的肥豬肉。

    酒保是會社設的供給所，是一棟二樓起的紅毛塗建築，內底食的、用的、穿的、五金、百貨逐項有，真濟金瓜石人會來遮款日用品，手頭無方便的礦工嘛會提卡鑢仔來先賒物件，嘛有人來領配給品，平常時鬧熱滾滾，人排誠長。毋過當當火龍仔怹來到位，內底煞冷冷清清無三隻貓。

    火龍仔怹攏免排列就直接共隨仔的卡鑢仔下佇紅毛塗櫃檯頂頭。櫃檯後面徛幾偌个穿插撆紮、頭毛綁甲真整齊的日本查某囡仔，怹看著火龍仔爸囝先是愣一下，過一時仔一个看起來較濟歲的才行倚櫃檯共怹做登記，登記好才對下佇塗跤的一跤紙箱仔內底提肉出來予怹。

    領肉的過程並預料的較順序，時間猶早早，難得過來一逝金瓜石，火龍仔就決定先斡去彩雲仔怹叔公的厝共坐坐咧。

    知影老爸的決定，彩雲仔嘛真歡喜，伊干焦想著嬸婆炒的菜逐盤都油甲會發光，喙瀾就強欲流出來。就按呢，二爸仔囝歡歡喜喜行對彩雲仔怹叔公的厝。

    佇金瓜石，除了日本宿舍厝頂崁瓦，臺灣人仔蹛的差不多攏是厝頂崁油紙、漆打馬膠的礦山低厝仔，瓦厝算真稀罕，伊代表主人相當有地位、相當好額。彩雲仔怹叔公蹛的就是一間大瓦厝。

    彩雲仔的叔公號做游阿秋，是怹外公的叔伯小弟，親成關係算來疏疏仔，毋過山頂人重情，二家猶是親戽戽不時來往。

    游阿秋是金瓜石的保正，早年趁著金仔錢，厝內好額甲連廳頭的燭台都用純金的。伊人真慷交，厝內不管時都一陣人來哩開講，毋過當當火龍仔爸囝入來到大廳，煞發現規間大瓦厝袂輸刁工落空城。

    「阿叔！」火龍仔對內底喝幾偌聲攏無人應。

    「阿嬸！」伊閣較大聲咧喝幾偌聲。一睏仔久，才聽著內底柴屐敧敧硞硞。

    「火龍仔，恁來喔。」出來應聲的是彩雲仔的嬸婆阿秋姆仔。

    「是啦，阿嬸。啊阮阿叔敢無佇哩？」

    「恁阿叔伊……」阿秋姆仔聽火龍仔按呢問煞雄雄克喉，頓一下仔才講：「恁阿叔早起去予日本警察掠去矣啦！」

    「阿叔予日本警察掠去？」火龍仔聽一下驚一趒。

    「透早阮猶哩睏，雄雄聽著外口磅磅叫，有人來哩挵muî。恁阿叔幔一領衫起來共開，規陣無熟似的日本警察就傱入來矣。對方干焦講有代誌需要伊去講清楚，就提一个竹篾仔做的頭籠對頭殼共套落，共押起哩一台拍火車載走矣。嗚……」講到遮，阿秋姆仔捎咧一直吼。

    「哪會按呢啦？阿叔保正做好好啊無按怎。今這聲欲按怎？毋就揣看有人通鬥相共否？」

    「欲揣啥人鬥相共？連仁祥仔都掠去矣，猶有啥人通共咱鬥相共？」

    「仁祥仔叔嘛予掠去？」火龍仔聽一下才是大驚，伊知影這聲代誌大條矣。

    仁祥仔姓黃，自細漢綴老爸搬來金瓜石，做山、種茶維生。怹二兄號做羅溪，北白川宮親王𤆬兵盤過三貂嶺欲來佔臺灣的時，伊加入義勇抗日，不幸戰死佇𥴊仔賴（瑞芳）。

    二兄抗日戰死，毋過伊的老母卻是佇日本人入金瓜石接收礦山的時，鼓勵伊的大兄黃從去佮日本人接接。黃從尾手真正得著日本人的信任，允准伊佇金瓜石經營苦力店。

    金瓜石礦藏豐富，有金有銅，欲開採需要大量的人工，負責招募人力的苦力店就變做上燒烙的行業。本島人工招無夠，就閣招對中國溫州去，黃從因此趁家伙。

    毋過毋知按怎，伊佇事業發展到當旺的時，煞雄雄看破收山，某囝𤆬咧轉唐山。

    黃仁祥的事業就是怹大兄放予伊的，只是伊愈楦愈大，到甲尾仔，伊除了是管轄金瓜石千偌个工人的「工王」，日本人口中的「大飯場長」，另外閣投資真濟事業，閣做過保正、庄協議員，閣是金瓜石上大間的廟宇祈堂廟的創辦人，已經是共金瓜石的宗教、政治、經濟攏搦佇手底的金瓜石第一頭人。

    二冬前瑞芳瑞三礦業的大頭家李建興予人陷害，講伊交結中國欲做內應進攻總督府。代誌牽連李建興家族佮瑞芳、猴洞仔炭空仔工人百偌人，造成二十偌人冤死獄內。彼當時金瓜石閃過風颱尾，想袂到代誌經過二冬風颱煞回南，換掃對金瓜石來。

    想著當年瑞芳佮猴洞仔的慘狀，火龍仔尻脊骿一直冷起來。

    「金發仔咧？哪會無看著金發仔？」

    「金發仔講金瓜石仔無頭人矣，伊欲去臺北揣朋友救怹老爸。」

    「乎！按呢就較佳哉。」知影金發仔無受牽連，火龍仔鬆一口氣。

    離開游阿秋的大瓦厝，火龍仔爸囝跤步毋敢延，怹佇金瓜石的路坎仔路彎來斡去，經過輕便車路邊，無偌久來到五坑空口。

    空口邊又閣是一逝崎崎的路坎仔，順彼逝路坎仔跁起哩到半山腰就是山神社，閣起哩就是四坑，到遐就有一斬電車通坐矣。電車會使坐起哩到二坑，跁起哩就到石尾，過石尾就離開金瓜石的地界，就離開這馬當哩透、當哩絞的風颱的暴風箍矣。

    「阿爸，咱到五坑矣。」

    「恬恬！緊行！」火龍仔知影風颱厲害，五坑有真濟工人佇遮做工課，真濟會社的日本人佇遮行踏，伊驚彩雲仔毋捌講毋對話予人聽著就害。

    彩雲仔是無蓋捌，毋過伊嘛看會出老爸緊張甲反常的面色。二爸仔囝就按呢恬恬仔一坎一坎一直跁。

    才拄跁來到山神社下面的鳥居，雄雄彩雲仔看著路坎仔頂有一个穿和服的查某囡仔行落來。

    山神社服恃的是日本神，伊本底就是離鄉背井的金瓜石日本人的信仰中心、心靈歸依的所在，彩雲仔猶哩讀冊的時，怹先生嘛捌𤆬怹規班來參拜，佇這條山路仔搪著穿和服的日本查某囡仔，一點仔都無啥物好奇怪。毋過等彼个查某囡仔行倚來，彩雲仔認著伊是oo₃₃ lin₅₅ gioo₅₁的時，猶是驚一下。

    oo₃₃ lin₅₅ gioo₅₁大彩雲仔一、二歲，伊生做面肉真白，自細漢怹kha₅₁ sang₁₁就攏愛共妝甲像一仙日本尪仔，人才會按呢共叫牢名。怹too₅₁ sang₁₁是黃仁祥的心腹，有錢有勢，怹閣是改日本名姓的國語家庭，臺灣工仔若櫼櫼佇工寮邊的破電影院看二輪舊片，怹就會使佮日本人四序四序坐佇另外一間有tha₃₃ tha₅₅ mih₃的電影院，看上新的頭輪電影。彩雲仔會捌伊，是因為以早老爸佇日本宿舍清糞掃，定定會佇遐看著伊。只是二个敢若一懸一低的二條平行線，從來毋捌相交插。

    佮逐往擺仔仝款，彩雲仔看著伊總是目睭看塗跤；怹嘛無佮彩雲仔相借問，就做伊直行直去。

    轉崁跤寮仔才過無偌久，人就來報歹消息矣，講彩雲仔的叔公予人送轉來，規身軀攏是傷，二肢大指頭公烏烏烏。

    火龍仔想欲去共送山，毋過隨仔堅持毋肯，驚伊去惹事端。尾手干焦隨仔𤆬彩雲仔去共送。

    游阿秋是有錢、有名望的保正伯，伊的喪禮冷冷清清。

    前前後後閣較濟袂勘得酷刑的人予人送轉來，怹有地方的頭人士紳，有黃仁祥的親朋、下跤手人，有大包工頭、小包工頭，閣較濟的是守貧趁食的礦工佮拍鐵仔師傅。尤其拍鐵仔師傅，日本人講黃仁祥就是叫怹拍刜刀欲造反，所致怹受牽連、受害上深。

    遮的受難者的喪禮差不多攏無任何儀式，嘛無幾个親朋戚友敢來相送，干焦一陣穿麻衫的幼囝，恬恬共送上山頭。若毋是有一枝白幢幡仔予山風吹甲颺颺飛，就敢若像哩埋死狗。

    悲慘的毋但活活予人折磨死的受難者，怹留落來的無依倚的某囝猶閣較可憐。受難者真濟攏才二十偌、三十偌，囡仔攏猶閣真細漢，經濟的樑柱崩倒，一家生活隨成問題。囡仔失學，查某人少年守寡閣愛擔一家重擔，偏偏犯罪家庭無人敢倩，蹛倚山的（金瓜石仔人）就干焦會當罔抾柴、抾塗炭，蹛倚海的（水湳洞仔人）就冒風湧罔釣魚、罔挽海菜，閣愛予人驚、予人輕視，按呢悲慘過日子。

    oo₃₃ lin₅₅ gioo₅₁的too₅₁ sang₁₁嘛佇隔轉年予人送轉來，彼當陣怹已經破產矣。

    怹too₅₁ sang₁₁予人掠去無偌久就有一个臺灣人來揣怹kha₅₁ sang₁₁，講伊有熟似憲兵隊長，會使𤆬伊去運動。oo₃₃ lin₅₅ gioo₅₁的kha₅₁ sang₁₁佇無辦法的情形下相信伊的話，綴伊去揣彼个憲兵隊長。隊長怹兜鋪tha₃₃ tha₅₅ mih₃， tha₃₃ tha₅₅ mih₃頂頭在一隻低桌仔，桌仔跤囥二跤相匼的面桶。彼个臺灣人一直講情，隊長有當時輕輕仔頕頭，有當時聽甲目頭結結。oo₃₃ lin₅₅ gioo₅₁的kha₅₁ sang₁₁看伊結目頭，就緊共桌跤相匼的面桶掀開，好禮仔共紮去的規大只現金囥入去，才閣好禮仔共匼倚。按呢一逝閣一逝，錢毋知提幾面桶去矣，隊長才予伊一个住址，叫伊會使照住址寄物件去，毋過袂使面會。oo₃₃ lin₅₅ gioo₅₁的kha₅₁ sang₁₁誠實照住址寄物件去，毋過攏無回音。

    想袂到傾家蕩產等年偌，等著的是倒佇門扇板頂的一具冰冷身軀。掀開伊身軀頂的白布仔，看著伊瘦枝落葉，規身軀攏是木蝨、攏是烏青凝血的傷痕，頷頸閣有一稜真明顯的烏青。oo₃₃ lin₅₅ gioo₅的kha₅₁ sang₁₁想欲共拭身軀換衫，幾个查埔人就鬥相共共插起來。衫一褪起來，雄雄一張白紙對oo₃₃ lin₅₅ gioo₅₁的too₅₁ sang₁₁尻脊骿落落來。oo₃₃ lin₅₅ gioo₅向落去共抾起來，發現彼是一張圓圓的罐頭標頭，頂面有罐頭的說明佮商標。伊一眼就認出來，彼是怹kha₅₁ sang₁₁寄予怹too₅₁ sang₁₁的罐頭標頭。伊提佇手底看啊看，無意中共紙反過來，才發現紙後本底應該白白的所在，有二逝紅紅的字跡。伊詳細一下看，紅字寫：「我無法度矣，恁好好照顧厝內。」oo₃₃ lin₅₅ gioo₅₁明白矣，彼是怹too₅₁ sang₁₁袂勘得苦刑，欲求解脫進前咬破手指頭仔，用血一字一字寫的遺書，驚予獄方發現，才偷偷貼佇尻脊骿頂頭。

    oo₃₃ lin₅₅ gioo₅感覺心肝像予人用刀鑿，本底強忍的目屎完全失去控制。伊傱咧拚入去房間，共thang₅₁ su₁₁內底的日本衫一領一領攏僥出來抨佇塗跤，鉸刀捎出來，隨領隨領攏共剪甲碎糊糊！

    「嗚──」

    愈來愈捷聽著霆水螺矣。崁跤寮仔無水螺，水螺聲攏是對幾偌支山外面的其他較大的庄頭引聲過來的。聲音真遠，遠甲予崁跤寮仔人感受袂著啥物戰爭的氣氛。

    一直到甲有一工，怹聽著頭殼尾頂挵挵叫，擔頭看著天頂烏崁崁攏是飛行機。無偌久怹聽人喊講基隆大空襲，基隆港一寡船沉了了，一寡厝嘛予炸彈撼倒了了，人死歹算，怹才頭擺感受著戰爭的可怕，而且無怹想的遐爾遠。

    金瓜石有煉金嘛有煉銅，尤其銅是重要的軍事物資，遐閣有真濟日本厝、蹛真濟日本人，毋過米軍除了㧒一粒炸彈造成百姓一死二傷，並無對金瓜石採取較大規模的轟炸。彼是因為金瓜石有啄鼻仔寮──きんかせき（金瓜石）捕虜監視所，內底關幾偌百个南洋掠來的各同盟國戰俘，遐的阿啄仔平常時「自願」冒性命危險，佇40度以上高溫的空內採銅礦，到甲戰爭的尾期，怹是金瓜石上好的保護傘。

    毋過金瓜石第一頭人黃仁祥就無遐幸運矣。基隆大空襲過幾個月後的一个半暝仔，黃仁祥的太太接著怹律師的電話，講黃仁祥已經予火車載轉來佇瑞芳矣。

    怹事務所有担架，幾个厝邊仔就透瞑夯担架落去瑞芳共扛轉來。伊的身軀仝款瘦卑巴，毋過除了二支喙齒暴出來，身軀看袂出有啥物明顯的外傷。

    朕深く世界の大勢と

    帝囯の現狀とに鑑み

    非常の措置を以て

    時局を收拾せむと欲し

    茲に忠良なる爾臣に民告ぐ……

    昭和二十（1945）年八月十五中晝，金瓜石會社的放送頭雄雄播送日本國歌《君之代》的演奏，了後就開始放送「天皇玉音」。   

    日本投降矣！一向高高在上的金瓜石日本人隨變做揜尾狗，一人揹一領棉襀被佮簡單的行李，就目屎那流離開金瓜石，去基隆等遣送。

    關佇臺北刑務所幸運活落來的金瓜石人總算轉來矣。怹轉來講逐家才知，原來大空襲彼工除了黃仁祥，猶有七个金瓜石人當場予米軍炸死。

    七个受難者的家屬像對天堂再次跋落地獄，怹去刑務所揣，發現七个人予人埋埋做一窟，已經無法度確認，尾手只好運轉來金瓜石仝款共怹葬做一墓[2]。到遮，事件牽連金瓜石、水湳洞百偌人，遇難達到五十个。

    日本戰敗，若按呢臺灣人仔應該是算贏抑算輸？崁跤寮仔人開始相諍。尾手聽人講按呢就號做「光復」，怹才綴人喝光復。

    光復矣，崁跤寮仔人逐个攏真歡喜，聽講基隆有米通買，怹就相招提粿袋仔去基隆揹米。路真遠，米無輕，毋過逐家都揹甲喙仔裂獅獅。

    換國民政府來金瓜石設礦務局，金瓜石人換一个頭家，仝款入空內拍鴨頭、磅石、扒塗仔，仝款共貯滇礦砂的礦車一車一車對空內捒出來，仝款認份做怹「入空像鬼，出空才是人」的金礦工。

    oo₃₃ lin₅₅ gioo₅規家佮黃仁祥遺族前後離開金瓜石這个傷心地。換金發仔做里長，伊兼咧包礦山的工程，規工無閒佮礦務局的官員盤撋，事業做甲真發展。

    隨仔閣去掠豬仔囝轉來飼，另外閣飼雞仔囝、鴨仔囝。彩雲仔真歡喜，想講這擺無日本人來挾耳仔，穩食的。

    崁跤寮仔人仝款佇深山過怹與世無爭的日子，人人對太平後的未來，攏懷抱著樂觀的向望。怹向望怹飼的豬仔緊大隻，大隻賣掉就會當掠閣較濟的豬仔囝轉來飼；雞仔、鴨仔嘛仝款，愈飼就會愈大陣。怹相信，只要毋驚艱苦拍拚做，沓沓沓沓就會出頭天。

    日時仔做忝忝，暗時逐家攏真早睏，尤其山頂的天氣就算開春矣，東北季風猶是冷sǹg-sǹg，剾甲崁跤寮仔人隨人早早就攏包入去棉襀被。

    「硞硞硞！硞硞硞！」

    這暗，彩雲仔怹一家早就毋知睏甲第幾殿，雄雄一个硞硞叫的聲音共怹攏挵精神。

    「彼啥物聲？」隨仔問。

    「敢若有人哩挵後尾muî仔是否？」火龍仔耳空較利。

    「遮暗矣……，我起來共看覓。」講煞，隨仔摸起來疊裘仔，紲共油燈仔火點著。

    「啥人？」

    隨仔怹姨仔平常時攏家己一个睏佇倚灶跤的一頂竹仔眠床，雄雄聽著伊佇灶跤喝聲，隨仔油燈仔火捀咧趕緊就傱過去。

    才傱到灶跤，隨仔拄好看著怹姨仔共後尾門仔拍開，門外一个人懸漢大的查埔人跤手真好隨搢入來。

    油燈仔火的光線暗暗，隨仔一時看袂清楚彼个查埔人的面，伊干焦清清楚楚看著查埔人的手底攑一枝烏㽎㽎、長長長的武士刀。

    「姨仔！」隨仔大驚失色開聲喝。

    這个時陣查埔人趕緊出聲：「阿姐！毋通喝，我金發仔啦！」

    「金發仔？」聽著查埔人喝聲，隨仔才認著，彼確實是伊的叔伯小弟金發仔無毋對。

    金發仔為啥物透暝入山來崁跤寮仔？逐家攏真想欲知。隨仔共彩雲仔趕去睏，四个大人坐佇大廳的食飯桌，金發仔才沓沓仔講因由：「……不滿的群眾衝入去瑞芳國軍倉庫佮警察局，另外閣有一大陣人沿自動車路溢對金瓜石仔來。怹有的去日本宿舍拖外省仔出來拍，有的就去挵公司的機械設備，聽講連礦警隊仔的銃都去予人搶去。礦務局長聽著消息緊鼓電話去揣陳儀討救兵，陳儀才對基隆調兵趕來，毋過兵仔才到半路，遐的人就攏四散走了了矣。兵仔來掠無人，就揣我這个做里長的坐數，叫我愛共滋事者名單交出來，無毋放我煞。當時遐亂，閣攏是生份的外地仔人，我欲佗生名單通予怹？驚怹對我不利，毋才透暝走來遮覕。」

    「遐濟人攏無一个你熟似？金瓜石仔人敢正經攏無半个參加在內？」火龍仔問。

    「金瓜石仔人攏是會社工，怹若有參加在內，哪有可能予人拍的遐的會社的外省仔會認袂出來？」金發仔講：「來接管會社的外省仔攏是讀冊的斯文人，怹對工仔無刻薄，工仔欲哪會去拍怹？以我所知當時顛倒有一寡工仔出面掩護怹，厝借怹覕，抑是𤆬怹去藏佇空內。」

    「按呢你照這个情形共兵仔講，兵仔敢袂接受？無嘛會使叫外省仔出來做證。」彩雲仔的外嬤按呢講。

    「外省仔干焦共兵仔投講怹予人拍、予人搶，𤆬頭的軍官毋才硬愛我交名單予伊。伊講代誌鬧遐大，若無交幾个仔人出來擔，伊無法度對頂司交代。」

    「按呢無你凊彩寫幾个仔人名予怹敢袂使？」隨仔講：「橫直攏是外地仔人，你講毋知怹蹛佗位毋就好矣？」

    「阿姐，」金發仔斯文氣斯文氣的面雄雄賴落來：「阮老爸是按怎冤枉死的妳敢袂記哩矣？我欲凊彩寫一份名單予怹真簡單，毋過彼愛害死偌濟人妳知否？這款僥倖代我敢通做？」

    金發仔一句話問甲逐家面色沉重無話通應，干焦看桌頂彼葩無偌光的油燈仔火，恬恬一直燒。

    金發仔佇崁跤寮仔覕無幾工怹老母就叫人來傳口信，講兵仔去怹兜揣幾偌逝，放刁講伊若閣毋出面去佮怹開會，怹就欲放火燒金瓜石共燒出來。閣講公司五、六个外省仔課長攏講好勢矣，金發仔若出面，怹會同齊出來共保。   

    金發仔知影代誌到遮無出面袂煞的矣，就決定隔轉早仔落山去佮兵仔開會。

    欲落山進前，隨仔專工煮一鼎無摻番薯的白米靡予食早頓。金發仔食飽，家己點一枝薰坐佇戶橂頭恬恬仔噗，噗甲彼枝薰強欲去燒著手指頭仔矣，伊才共薰橛仔彈甲遠遠遠，對一直徛佇伊尻脊後毋敢出聲的隨仔講：「阿姐，阮兜敢有鋤頭？」

    「鋤頭？」隨仔予無頭無摠雄雄問一下煞愣去，一時仔才問講：「你愛鋤頭欲nî？」

    「借我咧！」

    隨仔毋敢閣問，越咧就去後尾攑鋤頭。金發仔嘛跁起來，越咧入去房間。

    隨仔鋤頭攑來的時，金發仔已經閣行出來大廳哩等伊矣，手底攑彼枝伊紮來的烏色刀殼的長武士刀。

    位隨仔的手底共鋤頭接過來，金發仔無閣講啥，就按呢越咧一肩扛鋤頭，一手攑武士刀，飄飄撇撇行向猶予早霧罩牢咧的樹林。

    「哎喲……哎喲……」一伐入去礦務局的會議室，幾个像凶神惡煞的兵仔就揤倚，銃捎起來用銃頭對金發仔的身軀直共挵，挵甲金發仔哀爸叫母。五、六个佇外口聽候的外省仔課長聽著金發仔哀，就趕緊入去欲共討保。

    「好！我可以相信你們。我相信游里長沒有參與暴動，但你們敢保證他完全不知道誰暴動嗎？你們敢保證礦警被搶的槍枝不在金瓜石嗎？」

    「這個……」

    幾个課長攏是文身人，予掣頭彼个橫霸生橫霸生，看起來袂輸冷面閻羅的軍官嚇一下，喙舌煞攏拍結。你看我、我看你，無人敢閣替金發仔講情。

    「游里長，既然課長們都為你說情，我也就不為難你。只要把名單交出來，你就可以回去了。」軍官對遐的驚死驚命的課長冷笑了後按呢講。

    「oò妹有名單，oò真的甚麼都不豬道！」金發仔用伊佮礦務局的外省仔盤撋學來的新國語回答。

    「他媽的！敬酒不吃吃罰酒！」軍官隨變面，手對桌仔頂出力頓落，規陣凶神惡煞隨閣揤倚，用銃頭挵、用跤𨂾，金發仔蝹落怹猶毋放伊煞，一直拍甲金發仔嘔紅倒佇塗跤袂振袂動，怹才停手。

    「游里長，我真的也不想為難你，但是你不給我名單我就沒辦法向上頭交代。我也是很為難。」

    「oò真的不豬道……真的甚麼都不豬道……」                     

    「他媽的！拖出去！」

    兵仔像哩捆豬共金發仔的雙手反縛，押伊到金瓜石車頭前的廣場，叫伊跪落，面對廣場邊仔的防空壕。

    「老子最後再問你一次，名單你交不交？」軍官共伊的短銃拔出來，對準金發仔的尻脊骿。

    金發仔智覺這是死神對伊最後的問話，毋過毋知按怎，到這个坎站伊顛倒完全無驚惶。

    「阮金瓜石仔人予日本人迫害的時，時時刻刻都向望恁會當緊來，想講恁若來，阮就出頭天矣。想袂到恁來，是用並日本人閣較狼毒的手段繼續哩共阮殘殺。恁這是欲算啥物祖國？這是欲算恁娘的啥物潲仔祖國？」

    「呯！」

    金發仔出山彼工，彩雲仔怹規家攏落來金瓜石共送。金瓜石仝款是落冷冷的雨，仝款卡雺。彼雺看起來沉沉重重、憂憂鬱鬱，就敢若是金發仔含冤不白的怨。

    「啊！會沉落！金瓜石仔人若欲繼續予人按呢𧿬踏，緊差慢這个金瓜石仔會沉落！」火龍仔目屎那流那對天按呢喝。

    「較細聲咧啦！」隨仔緊倚來耳空邊細細聲仔共提醒：「叫你莫來硬欲來，飯會使亂食話敢會使亂講的諾？」

    「隨在伊矣啦！青盲都青盲矣，某死矣看甲彼跤屎桶！」火龍仔愈喝愈大聲。

    「你是哩共我烏白亂講啥？」隨仔誠受氣，面仔膨獅獅講：「轉去才佮你算！」

    算就算咧，翁仔某代床頭冤床尾和。就佇金發仔過身了的翻轉年，彩雲仔的小妹煞出世。

    上歡喜的是彩雲仔的外嬤，因為若照當初雙方品的條件，彩雲仔的小妹愛傳老母的姓。

    天欲光矣嬰仔才出世，日頭拄浮上山頭彩雲仔的外嬤就趕緊提錢予火龍仔，吩咐怹爸囝去金瓜石揣相命的紅目仔，拜託伊共嬰仔和一个命狀，順紲共號一个較福氣的名。

    二爸仔囝聽人吩咐毋敢延，番薯糜凊彩扒扒戽戽咧，閣紮幾塊仔炊的番薯粿準備做中晝頓，就趕緊出門矣。

    怹行啊行，這山遨過彼山，真無簡單盤過上懸的一支山頭，眼看落崎落去就到金瓜石矣，誰知無張無弛，雄雄一陣生狂雨煞落落來。

    彼雨落甲像一粒一粒斜斜搩來的石頭仔囝，像米國飛行機的掃射，彩雲仔感覺規面、規身軀攏予彈甲真疼真疼。

    「阿爸！咱今欲按怎？」伊驚惶共老爸的手牽牢牢。

    欲按怎？雨來甲遮生狂，山頂尾溜哪有佗位通覕雨？火龍仔戇戇徛佇大雨中想一睏，才雄雄予伊想著日仁仔時代日本人為著防米國飛行機來炸金瓜石，佇這支視野開闊、會當看著規个金瓜石的山崙頂頭有安高炮，嘛有一班兵仔佇遮哩顧守，所致這附近的路邊有幾偌个防空壕。

    「轟！」

    雨大無打緊，雷公閣霆甲毋驚人死，火龍仔看毋是勢，只好趕緊叫彩雲仔牽伊去覕防空壕。

    食名日仁仔時代出世，捌經過太平洋戰爭的洗禮，偏偏蹛崁跤寮仔的彩雲仔爸囝就是攏毋捌覕過防空壕。尤其彩雲仔，便若聽人講走空襲規陣覕防空壕，伊攏會共想講彼應該是心適心適。等真正覕入去，伊煞去想著蹛金瓜石的時，一个佇空內予石頭硩殘廢的阿伯講的話：「彼空內就敢若一尾喙開開的大金蛇，阮逐工位伊的喙空入去，佇伊的腹肚底挖金仔趁食，毋過阮毋知影，伊當時欲共喙合倚。」

    防空壕內底是會當覕雷雨無毋對，毋過彩雲仔愈看這个烏烏臭臭的空愈感覺，伊嘛是覕佇一尾蛇的喙空，毋知啥物時陣蛇欲共喙合倚。

    彼真恐怖，彩雲仔感覺心肝頭一直實起來，一直欲袂喘氣。

    「姦怹三代咧！緊差慢啦，這个金瓜石仔若欲定定遮孝男面，緊差慢會沉落啦！」火龍仔跔佇塗跤那用手去掰伊規面的雨水那按呢罵。

    「猶毋是你害的。」彩雲仔身軀像跋落水，跔佇火龍仔身邊面懊嘟嘟。

    「我害的？是按怎講我害的妳共我講看覓咧。」

    「若毋是你大細心，咱哪會來遮予雨渥？」

    「我大細心？妳這个查某囡仔講話愛天良喔，我佗位大細心？」

    「無大細心是按怎我的名你就凊彩號號咧，小妹欲號名你就愛走來金瓜石仔揣算命仔？」

    「妳的名哪是凊彩號的，妳是……」

    「我是風颱前生的對否？彼工你去遏竹筍轉來拄行甲崙仔頂，看著天頂的雲真艷、真媠，才共我號做彩雲仔對否？看著啥就號啥，閣講毋是凊彩號。」

    「恁小妹予紅目仔號名彼是恁阿嬤的主意喔，彼妳也欲算佇我的頭殼頂？」

    「囝是你生的呢，是按怎你袂使家己主意？咱厝邊仔都無人按呢，干焦你一个。」

    「妳這个查某囡仔……」火龍仔面一陣紅、一陣白，逆甲毋知欲按怎應。

    自細漢無爸無母，受盡別人的欺負，無才調娶才著予人招，看人的面色，聽人講閒仔話，真無簡單才𤆬某囝去金瓜石拍拚，雖然做的是共人摒糞埽，臭夯夯的頭路，總是靠家己的氣力擔一个家，閣較按怎嘛有尊嚴，嘛看會著未來的希望。啥知……

    想到遮，火龍仔頭殼規个鉤落。

    看著老爸面規个糾起來，敢若真艱苦的款，彩雲仔才智覺家己無擂無槌的話去刺傷老爸。伊無意無意，頭殼犁犁毋敢閣出聲。

    「轟！」

    外面雷公爍爁，有時雷公敢若就撼佇怹的頭殼頂，撼甲規个防空壕攏會顫振動，嘛撼甲藏佇彩雲仔小小頭殼內底像歹物仔的物件，攏顫顫出來。

    伊想著較早外公講古予聽，講北白川宮親王𤆬兵盤對三貂嶺落來的時，佇崁跤寮仔就聽會著附近山頭的銃聲佮砲聲。外公講彼陣附近庄頭真濟查埔人去加入義勇，欲佮唐山來的官兵楗做伙，同齊佮侵門踏戶的日本兵拼命。想袂到頭一个刣死日本兵的義勇，煞顛倒予想欲搶功的官兵賴漢奸，共縛縛起來刣。

    「轟！」

    彩雲仔閣去想著基隆大空襲彼工米軍挵挵叫的飛行機，閣想著怹表舅就是予人銃殺佇金瓜石車頭的防空壕外口，彼血津津流、津津流，一直流對防空壕內底入去。

    「滴！答！滴！答！」

    雄雄彩雲仔感覺防空壕內底塗壁垂落來的水，一滴一滴煞敢若愈看愈紅。

    「阿爸……」伊生驚想欲喝咻，煞感覺頷頸敢若予一个無形的歹物仔共捏甲絚絚絚；伊想欲滾躘，才發覺規身軀頂頂下下，攏已經予一條粗粗粗的大藤共捆甲連一肢指頭仔都無法度振動。

    啊伊的老爸咧，就敢若一仙用悲傷做模仔灌出來的石膏尪仔，連目睭皮都無法度小振動一下。

    「滴！答！滴！答！」

    紅紅的洞壁水一滴一滴一直滴，彩雲仔驚驚惶惶，感覺時間敢若嘛予歹物仔共捏甲袂振袂動，一直停佇遐。

    「滴！答！滴！答！」

    感覺有夠久的久，彩雲仔才雄雄看著本底暗暗的防空壕內底，有一道金黃色的光炤入來。

    彼道光柔柔仔，毋過伊予彩雲仔感覺著無底比的溫暖、無底比的力量。伊像看著救命燈，規个驚惶的心隨安落來。

    伊試咧振動跤手，才發現捏伊頷頸的歹物仔已經予光驚一下鼢無去，捆伊身軀的大藤嘛早就跤尾抹火油旋溜。閣斟酌一下看，紅紅的洞壁水一滴一滴嘛一直透明、一直透明。

    伊真歡喜，越頭去揣洞外彼道有神奇力量的光，雄雄伊的目睭金爍爍，規个大蕊起來。

    洞外一點一點金爍爍像金仔粉的雨毛仔，一直對天頂掖落來、掖落來。

    「哇！金仔雨！阿爸你看，外口敢若哩落金仔雨呢！」

    「金仔雨？哈！」聽著彩雲仔天真的囡仔話，火龍仔心肝頭䆀的雜質攏已經熔化，笑甲像9999的純金遐燦爛。

    「阿爸自做囡仔就聽人風聲，講金仔山的金仔濟甲愛用跤桶搬。彼久我攏想無，金仔山哪會遐濟金仔？到今仔日聽妳這个查某囡仔疕講我才知，原來就是金瓜石仔會落金仔雨。較加萬日本人挖五十冬嘛挖袂焦，閣有通著甲中國仔來挖紲落。」講到遮，火龍仔枴仔黜咧跁起來，身軀痀痀對彩雲仔講：「阿爸想欲看一下仔金仔雨是無才調矣，行！牽阿爸出來去渥一个仔過癮。」

    就按呢，二爸仔囝笑嘻嘻軁出防空壕，欲經驗一下仔予金仔雨渥的滋味。

    暴虐的雨已經恬去矣，毋驚人無命的脆雷嘛定矣，烏崁崁的雲散開去，日頭伸出千萬肢手，掖落點點無數，金爍爍的黃金之雨。

    掖佇予暴雨拍甲東倒西歪的上臭賤的野草，掖佇花蕊予暴雨拍害猶硬欲吐莓的無名山花，掖佇枝骨予脆雷撼斷猶毋願倒落的不倒樹欉，掖佇彩雲仔爸囝渺小的身軀，掖佇予人挖了閣再挖，傷痕累累的山跤的金瓜石──

    基隆山、茶鈷山，二支山脈中央一片藍藍的海，猶有金瓜山[3]、山神社、太子賓館、啄鼻仔寮、溫州寮、日本宿舍，一間一間厝頂打馬膠漆甲烏趖趖的礦山厝……

    「虹呢！阿爸，出虹矣！出虹矣！」雄雄彩雲仔看著山跤金瓜石的上空出一道虹。

    「出虹矣？佇佗位？」

    「佇遐……」彩雲仔本底想欲伸手去指，雄雄伊想著老爸目睭看無，才趕緊牽老爸面對彼道虹的方向，對伊講：「這久就佇你的面頭前。」

    火龍仔無閣講啥，伊恬恬徛咧掠彼道虹「看」真久真久，看甲規个人神神神。

    「我看著矣……我看著矣……」

    「你有看著？阿爸你有看著虹？」彩雲仔驚一趒。伊擔頭去看伊的老爸的面，看著伊的老爸彼雙已經略仔塌落去矣的目睭，目睭底澹漉漉，毋過仝款閃爍著像金仔粉的光芒。

    「行！牽阿爸tuínn來去，咱tuínn來去雙溪事務所。」

    「這久欲tuínn？阿嬤毋是吩咐咱愛先去揣紅目仔共小妹號名？」

    「名我號有矣啦。」

    「你號有矣？你家己號毋驚tuínn去予阿嬤罵？」

    「插插伊啊！青盲都青盲矣，某死矣看甲彼跤屎桶！」

    聽老爸按呢講，彩雲仔知影伊心意已經堅定。伊越頭毋甘毋甘閣掠彼道七彩艷麗的虹看一目仔，就伸手對老爸手後曲牽咧，二爸仔囝歡歡喜喜，欲緊閣趕路轉雙溪去共怹小妹報出生。