時至今日,我愛上阿根廷己有7,8年,因馬勒當拿而愛上阿根廷的仍有很多人,
但我,卻是因巴迪斯圖達!
據說,世上有一種美,叫病態美,喜愛阿根廷的人,本身就有點病態。
球壇之大,何供選擇太多,
要開心包冇衰o既,可以選巴西,踢得悅目,大賽名中率高,捧佢一定happy,
要穩陣可靠,
當然要選德國,風頭唔大,但四平八穩,總有收成;
要星光熠熠,自不然是英格蘭,個個都係萬人迷,打得好唔好都有一大堆話題,不愁寂寞;
要追取搶攻嗎?當然選荷蘭喇!前鋒要幾多有幾多,
翼鋒要幾快有幾快,官能刺激有保證!
阿根廷呢?以上種種優點都有o的,但又分別唔夠突出,最突出o既,恐怕就係佢地唔完美,夠病,夠惹人垂憐。
話說第一屆世界盃係烏拉圭上演時,巴西波都仲未入流,阿根廷先係強國,可惜球隊係決賽左輸比主辦國,
天生坐唔正,一條二奶命。
66年英格蘭主辦,同阿根廷係淘汰賽打得難分難解,結果交都打埋,賽後諗住息事寧人交換球衣,
點知英倫領隊藍西爵士死拉住自己友唔俾換,一味話阿根廷茅柴!經此一幕,阿根廷臭馬之名遠播,衰牛精粗魯!
78年阿根廷終於自己搞返次決賽周,本來漫天紙碎襯托佢o地首次捧盃實在完美,但係o係分組賽大炒秘魯6比0,
又畀人話做馬,搞到做o左冠軍,仲唔係幾光明正大。
86年天皇駕到,馬勒當拿一人玩哂成個決賽周,縱使德國夠韌,都一樣俯首稱臣!雷米金盃輕易手到拿來,
之但係就係果一隻手,又替馬勒當拿和阿根廷換來賊仔之名,冇o黎貴氣!
90年家道中落,走o左樣o既阿根廷都仲有代表作,就係1比0險勝又中楣又中柱o既巴西,之後仲憑住兩度互射12碼入決賽,
拎亞軍算有交待。點不知十幾年後,又有自己人爆響口,話當年半場俾o左d迷暈水巴西球員飲,嘩!迷魂黨呀!
94年馬勒當拿紮住復出,頭兩場係威係勢,對希臘佢入球世界波之後,走埋場邊攝影機怒吼,應該震爆o左唔少球迷o既電視。
點不知分組賽未打完,馬勒當拿就被驗出服用禁藥,即out!本來如日方中o既阿根廷,巴迪斯圖達,肯尼基亞,列當度個個冇哂瘾,
16強止步,又衰「拍丸」!
98年冇o左馬勒當拿陰影,照計阿根廷應該走出陰霾見晴天,誰不知又殺出個超級霸王教頭巴薩里拉,話說呢位教練治軍嚴明,
練波第一戒條,竟然係禁絕所有長毛入隊!嘩!係人都知阿根廷男人有頭髮,冇頭髮都要留長頭髮,正一個個都係band友,
結果搞到d好波o既長毛寧願唔入國家隊,而入得國家隊o既長毛又剪到短哂。大家都知,頭髮對好多人o黎講係能力o既象徵,
冇o左o的頭髮,係會成身冇力o架!就係咁,8強止步。
02年!走o左個巴薩里拉,又o黎o左個比爾沙,查實呢位仁兄,原本教波都幾有心得,偏偏就係衰固執,話說佢係外圍賽個陣式所向無敵,
於是一本通書睇到老,前鋒只能用一個,唔係基斯普,就係巴迪高,呢個「盟塞」佬就係接受唔到兩個大男人走埋一齊。我o地旁觀者都知,
只要係好o既,怕咩俾佢地走埋一齊o者!因為唔變通,阿根廷慘烈地分組賽出局!
06年來了!作為飽歷風霜o既阿根廷躉,今時今日若果能夠仲咁硬淨企得響度,撐住阿根廷o既心只會越來越強,各式各樣o既病態,
我地都已經經歷過,所以已練成一副不壞身,甚麼死亡之組,根本從未驚過。我地相信,若果阿根廷癲起上o黎,任何對手都唔怕,
所以唔怕對手勁,只怕自己唔夠醒。
曾經,上天將一個魔鬼天使混合體送到阿根廷,令我們見證了世上最好的一面亦嚐盡最差的體驗,淚流滿面!
假如,我有得再選,我仍然唔想咁平凡,仍然要繼續捧阿根廷,因為,生活本身就好平凡,還不夠麼!
所以記住!甚麼死亡之組,根本從未驚過,唔怕對手勁,只怕自己唔夠醒!!!
06年世界盃,撐硬阿根廷!
文章定位：
