好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

電話攑起來，對方講，「嗨，咧無閒？」

「無，咧看報紙。」我慢慢仔講，因為那（邊）講那想這是啥人。我對聲音算是足敏感，這个腔口有熟似，毋過，一時袂當確定是佗一位朋友。

「知影我是啥人無？」

敢若伊有讀心術，我講，「秀芬？」

「著啊，我感冒矣，你敢無聽出我齆（àng）鼻聲齆鼻聲？」

我講：「有啊，你的聲有一點仔齆齆。」

「鼻音重嘛。」

「你敢若不時感冒喔，我共你講過感冒啉薑母茶上有效，你有啉無？」

「毋過我嚨喉無爽快，淡薄仔嗽。」

「按呢就啉檸檬紅茶，毋通啉薑母茶；愛較甜，就摻蜂蜜。蜂蜜顧嚨喉也治感冒。」

真濟年來，我毋捌（不曾）「好好仔感冒」過，當然也毋捌為著感冒食藥仔。我的祕方就是薑母茶。逐遍我若感覺疲勞、愛睏，骨頭開始痠軟起來的時，就趕緊燃（hiânn）薑母茶；分兩三擺燒燒啉落去，氣力就恢復，人真緊清爽起來。

煮薑母茶上簡單，幾片仔薑母用水燃出味，才加烏糖去滾一下，按呢爾爾。

秀芬無偌久以前才重感冒，連伊上愛的畫圖課也無去上；想袂到這陣閣再

感冒矣。我講：「你無聽我的話，你應當感覺咧欲感冒的時就啉薑母茶啊。」

伊講袂赴矣，問我：「啊tsit-má（現在）啉檸檬茶加蜂蜜有效無？」

我講加啉、加排尿就有效。紲落去，我教伊，「若正經嗽起來，你就用一寡紅棗、枸杞、幾片薑母和烏糖去燃，落尾才摻蓮耦粉入去。蓮耦粉先用冷水抐（lā，攪）散才倒入去攪。有一年，我嗽半個月，……。」

無予我講完親身的治嗽經驗，伊共我的話切斷，問我有閒無，有一件代誌欲請我鬥相共。

我喙內講有閒，心內卻希望毋是需要出門的代誌。隨想伊有啥代誌需要我鬥相共？借冊？無啥可能。買書畫用品？In兜（tau，家）附近有幾若間書畫社，顛倒我捌拜託伊替我買過水墨用品。

「你會當借我幾萬箍無？」

哇，按呢我就愛去銀行矣！遮爾（tsiah-nī，這麼）熱，足無愛出門啊。閣一下想，伊足好額，精華區的大樓兩三棟，我共伊借錢較差不多。我笑甲無啥自然，「你哪會欠幾萬箍？你遐爾（hiah-nī，那麼）有錢。」

「攏是定期存款，解約食虧，我也無愛予厝內的人知影。」

我這陣才憢疑起來，「拄才你講你是啥人？」

「創啥！秀芬啊。講著借錢，你的口氣就變矣！」

親像予人看破我澀（小氣）、無朋友情，我笑甲愈無自然：「我想講是毋是……」「詐騙電話」四个字講袂出喙。萬一伊真正是秀芬？有錢的人身軀邊嘛無一定有現金。伊樸實，逐遍我呵咾伊的穿插，伊攏講是一、二十年前的衫；無管是用畫圖紙、粉彩筆抑是宣紙，攏比我較撙節。毋過，彼也是因為伊本頂，書法，伊講讀帖仔較要緊，然後「相準準才寫落去」，就袂浪費宣紙；畫圖，伊的空間感精準，慢慢仔畫，一定有頭有尾，會完成，袂拍損畫材。

這種個性的人gâu（擅）拍算，可能袂予現金白白囥（khǹg，放）佇活存內。毋過，雖然按呢想，我猶有一點仔理智，問伊：「你講無愛予厝內的人知影，是佗一个人？」

「就是彼个人，阮頭家啊。」

「按呢啊？」

龜跤趖出來矣！秀芬的生活狀況我清楚，in頭家早就無去矣。

我本底有想欲繼續和伊牽（長談）落去；可惜伊知影予人看破跤手矣，講：「講著借錢，你的口氣就遮爾冷！煞煞去（suah-suah--khì，罷了），免麻煩你，我家己去想辦法。」電話就掛掉。

這个騙仔猶是有收成的，至少學會曉我對付感冒的祕訣。

伊若較有耐性，我會教伊早起時用拉圇仔燒的鹽水漉喙（lo̍k-tshuì，漱口）、漉嚨喉；閣有，睏的時用手巾仔包頷頸，才較袂咳嗽。

2022年3號《文訊》雜誌