好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

  

佇連續劇看幾若遍鋏（giap，夾）布尫仔的畫面。尫仔歹鋏，男主角落氣的表現真笑詼；每一个尫子閣奇巧，有特色，予我也想講揣（tshuē，找）一工來鋏看覓（敢若啥偉大的志願）。

一暗，佇台南新化市舊街仔食過暗頓，罔踅蜇（se̍h，逛），看著一間鋏布尫仔的店，隨入去看。可惜壓克力箱仔內底的物件，竟然是實用的吹風機、薄毯仔和貯（té，盛裝）佇盒仔內的機器人。這款物件應當是欲唌（siânn，引誘）大人的。

後來轉來台北，經過一个休息站，我閣發見幾若台鋏布尫仔的機台，內底疊規堆的尫仔，真粗，閣真䆀（bái，醜）。這款物件敢有可能唌著囡仔？

頂日，對紀州庵出來，和鳳凰行去捷運站的半路，我閣看著一間鋏布尫仔的店（心內有啥，目睭就會看著啥），我招鳳凰入去試看覓。兩个有年歲的人請教邊仔一个少年的，伊一步一步教阮動作，順紲（sūn-suà，順便）講選角度的撇步；不過，伊鋏的海翁（鯨魚），真緊就落落去。阮兩人照伊講的，橐（lok，投）錢、操作「方向鈕」，正爿、左爿、面頂、下面勻匀仔徙，相準準才鋏物件。

然後，物件一聲就落落去矣；無管是皮卡丘尫仔、隨身小布包，抑是大碗泡麵。

初體驗，哪有可能成功。我貢獻三个十箍銀角，鳳凰兩个。伊猶毋甘離開，講：「欸，機台會當換銀仔角耶。」

我講好矣，自起心動念－－觀察－－執行，我的「志願」已經完成。