陽光．彩虹．「夢」星雲 夢．星．雲 不應分離 是時候讓他們重聚 「夢星雲」的世界裡應該充滿愛與理想 讓愛的和煦璀璨入夢 讓理想的勁擦亮星星 讓澄明的心洗滌白雲 不單要凝聚，還要有陽光與彩虹

103愛的鼓勵 0訂閱站台

2.9.06,星期六,霞. ”生日會”

是日長週，沒有停過手，因為星期一要入院了，我要在入院前趕起手頭上的工作，但似乎明天仍要繼續努力，因為今日收工後，我們要為陳先生和張先生慶祝生日。
我們5A七子今晚本來人齊，但因為Billy”出事”少了一個，不過有番賢哥仔和花姐兩個頂上，都叫有8個人撐場。今晚張先生揀去加太賀，所以我們相約七點半向紅磡火車站等，然後坐的的(的士)落去。我們都好耐無去過加太賀食o野了，上次係唔知幾多年前一大班人個次，上次我們有間大房，十幾人玩得不知幾開心，雖然今晚人少少得八個，但一樣有間房，一樣食得咁開心，照例鬼殺咁噪，再加上我們今晚叫了一枝1800ml的菊正宗...哈哈!簡直瘋狂呀!!其實不管食乜飲乜，有我們七子存在就唔靜得。
最初以為加太賀名氣細o左，食物水準會下降，但點知又ok喎，$1500八個人都食得飽飽的，都叫可以啦!不過如果人少許可能就唔化算，因為其實這裡價錢比出面係貴o的。
話說回Billy先，今晚本來就到Billy唔洗出團的，但點知他日前從台灣返港，不知是弄穿了腳趾水泡受感染，還是因為在台灣某處給蚊子釘了十多口(但是釘手的)的原故，他在回港的機上開始感覺占寒占凍，到港時給邊防人員發現發燒給隔離，跟注隻腳就開始腫脹起來，最後要入院求醫呢!正因為Billy出事了，所以張先生發起食完飯去Billy屋企探佢。除了陳生同Pinky，我o地個個都有上去。眼見Billy是精神的，但他仍有發燒，隻左腳真的腫得很厲害，兼且”花晒”，好似衝瘀o左咁!我們一群人”問候”佢一番，向佢屋企擾攘到十二點幾先走人。最後，我同張先生和花姐送過阿婉去旺角擔小巴後，我們三人也坐的的返屋企去。

3.9.06,星期日,霞. ”20出頭”

今日原先想話九點起身開始工作，但點知伯伯從廣州的到來，計劃改變了，一早去茶樓飲茶，一飲就飲到成兩點幾先返...開始工作，三點做到六點幾，但仍有一份重要的未做，但這時已非走不可了，因為今晚我又要去藝術中心睇話劇--”20出頭”。
我今晚原本約了Madam同阿華一齊食o左飯先去睇話劇，但因為做到成六點幾，結果我返屋企放低o的o野，食兩塊餅送過頭痛藥，跟注就雞咁腳就走人趕過海去，準時七點九到藝術中心門口等Madam佢o地。
今晚的”20出頭”真的十分好睇、非常搞笑，成晚幾乎笑唔停，在這笑聲背後，真的充斥著我們這群出生於七十年代、成長於八十年代，迷失於九十年代的香港人的集體回憶!小時候的話語「閘注反彈無回頭」、中華牌鉛筆、萬能筆盒、足球小將...八九十年代的金曲、衣著、封貼紙的紀念冊，小學、中學的生活、豆芽夢，中五畢業後的迷茫等等，這一切一切，真的是我最「無憂無慮」的時候，是我覺我最快樂的時光，真的使人回味。所以再看多次也無防。
不過今晚有o的人走寶了，發起人又係佢，但唔o黎又係佢，結果錯過一齣精彩的話劇。之但係咁，錢我係會照收的，如果唔比就等收律師信啦!哈哈~~~

4.9.06,星期一.陰. ”逃院威龍”

入院了，入院了，今天入院了，一早起身本話盡量做埋份o野先走人，但點知醫生話入得院啦，你早o的黎啦，結果我執好o野，然後去食過早餐就往大埔進發，但結果還是準時十二點去到”拿拿素”，準時去到醫院，辦好手續，好快就見到醫生(因醫生早就在等我了)，好快就照X光，但之後等見麻醉師...等安排病房、等見物理治療師就...變了化石，用了一個下午，就連做”逃院威龍”也要等...真的救命!為何我會做逃院威龍，因為我的手術是安排為明天的第二個，不用一早做，所以我可以選擇返歸先，第二朝8點半返到病房就可以了。不過今晚十二點開始，我不可以飲食啦!是關我明天是要全身麻醉的。
講真，我真係驚，仲想縮沙添，但聽完醫生的詳細講解，同多個醫護人員的關心問候，我個心才定點。講個秘密大家知丫，唔知點解o的醫護人員特別對我關心，點解我咁講，因為同我一齊入院的另一個男人，o的醫護人員無乜問佢o野又唔係點理佢，但相反就特別關心我似的，就好似”逃院”咁，最主動話要走的那個男人(即一齊入院的)無人理，但我就快過佢安排走人。所以我講笑的同阿媽話，我可能生得可愛o的呢!哈哈~~~(其實我都快30啦，還叫自己可愛，真的想嘔，兼且成日比o的細佬叫我叔叔o架啦...但掉返轉，唔知點解向大過我的人的眼裡，我成日都比人睇成細佬咁...唉~可能我真的好低B啦)

我不知日後能不能再有機會寫日記了，所以在此向各位長期以來支持我、關心我的朋友說聲「衷心的感謝!」，真心的感謝!如果真的不能回來，在此說聲:各位，再見了~~