話咁快，今日第一日返工喇。
今日延遲返工時間，10:30 至開工。但我今朝 7 點左右竟然起咗身去嘔~~~﹗救命﹗
好彩只係嘔咗一輪就冇事，所以可以照原定時間，9 點起身返工。
返到去，當然周圍逗利是啦。呵呵~~﹗
之後諗住逗完利是就正式開工啦~~﹗點知，同放假前咁樣，喺眾人既吹噓之下，老細竟然喺公司開賭檔，玩三公，我同另一位同事細細地玩，都同上次一樣贏錢。呵呵﹗其他同事就幾百蚊上落，我哋兩個就廿蚊廿蚊咁去，上次就贏 90 蚊，今次因為好快就收檔，所以都係贏 60 蚊咋。咁都好過輸既﹗今次老細就最傷喇，上次佢做莊，就贏千幾蚊；今次佢做莊就輸幾千蚊。WOW﹗
之後隔咗無幾耐，又要出去食開年飯，我朝早嘔完都唔係好有心機去食嘢，但唔食又唔得。真係進退兩難﹏﹏
之後2:30食完飯，照番正常開工做嘢，咁就癲完一個上晝喇，哈哈﹗
原來仲未癲完，另一個老細喺 4 點幾，竟然叫我哋寫外賣（即係老細請食外賣）。
唔係呀化﹖兩點幾食完餐全部人都飽到嘔既開年飯，4 點就再叫嘢食﹖有錢都唔係咁樣駛吖﹖有錢無碇駛既，套現俾我仲好吖﹗
之後因為大家都真係食唔落，而同番老細講多謝（夾承惠）喇，但真係食唔到。好彩老細都明白，冇叫我哋寫嘢食喇﹗
聽日工作正常返晒架喇，都唔知幾時又可以咁樣玩喇﹗哈哈﹗
文章定位：
