95學年開學快將一星期，未夠一星期，但係差不多一星期啦。
遲下，95學年開學將會超過一星期。
係呢接近一星期，未夠一星期間，本人已經經歷左好多黑仔野，遲下，本人仲會體會到今年課堂有幾艱辛。
你地或者會問，台長，你係呢一個星期裡面，經歷左咁多黑仔野，情實點解會咁呢？係度，我可以好清楚咁同各位講，95學年開學，情實仲有排先夠一個星期。至於本人會唔會有咁既機會，去慶祝我地開學一星期呢，就要睇我捱唔捱得過d黑仔野同埋煉獄級既課堂啦。
情實，我有幾黑仔呢？話說我星期一去交學費，點知發現張提款卡壞左！搞到要用印章去提款。之後去銀行交錢啦，當我電單車到步後，我就熄匙停車，就係我隻手摸到車匙既一剎那間，「嘩啦」一聲串鎖匙就掉左係地上面，原來條鏈斷左......不幸中既大幸係佢唔係我行進中斷開，如果唔係我真係死比你睇囉。另外，我由澳門返黎台灣後，好不幸地部電腦又壞左開唔到機，結果要去小森度寄生左幾日。後黎我部機整返好啦，要去攞機果日，咁o岩有人黎買學長放係小森房既mon，仲要唔係lcd而係大屁股= =|||，小森已經扯晒火，出盡辦法都搞唔掂之下唯有call物主黎，見佢好似雜耍咁用電單車送貨，真係牙煙。最後我都順利抬部腦返黎，之但係世事又點會咁如意丫，部腦開頭好似好正常，就係我開開心心用緊既時候，佢忽然自己重開！我驚一驚，再搞下其他野，又好似冇咩事，點知同晚夜d既時候佢又黎多次！之後仲發現佢不時有半輕機既情況......我睇都係要重裝啦，煩！希望黑仔到此結束啦。
再情實，d課堂有幾煉獄級呢，對各位高材生黎講可能唔算係乜，之但係對我黎講已經可以算係煉獄啦。
首先有我地既重頭戲，萬中無一既大三必修科──史學方法。話說老師係德國慕尼黑大學畢業既猛人，仲要係本系師資入面幾最猛既其中一個，此人作風嚴謹、打分偏低、罵人不留情卻又有真材實料，保證十足真金！呢個學期我地要分組寫文仲有勁多既課堂討論，睇怕都係難捱中既難捱。
再黎有我地既全英孖寶──美國史&英國工業革命。呢兩科既老師一位係美國留學，好巴士閉。但係另一位就仲加巴士閉，因為佢係我地系主任，仲要係劍橋大學畢業既猛人阿嬸。呢兩科係第一堂佢地都不約而同地問：「各位同學你地怕唔怕多英文呀？」講義同課本睇怕都係英文啦，唯一慶幸既係報告唔使用英文寫，之但係考卷係用英文出既......
未完喎，仲有我地既經濟雙拼──台灣經濟史同經濟學。台灣經濟史要寫萬字論文，諗起都想死。經濟學就更難，都唔知佢講乜，咁明明係選修科點解我唔識唔鍾意都仲要選呢，各位我唔係犯賤ga，而係系上有d無謂既規定逼住我去選，唔選冇得畢業，所以冇辦法之下我都係步入左呢個星期三下午經濟地獄......
最後，我發現今年有3日我都要好早上堂...兩日8點一日9點，我上年最早都10點先上堂ga......嗚嗚嗚
講完，多謝各位......
文章定位：
