話說昨天早上如常上班，工作了兩個小時後被老闆召進辦公室。然後她拿出早已準備好的「解除僱傭合約」出來，說：「阿遙，你好似做得唔係幾開心喎，我地都睇得出，我都唔想請啲員工黎係唔開心。拿！不如我地就今日立刻解除僱傭關係，你唔駛再做咩，而家即刻走得，好無？」小弟唔知點解個一刻有極反常的行為，笑着說：「好！拿筆來。」呈現了一個你炒我我重開心的形象，到現在小弟為何有這種反應，仍是個謎。
收到解僱信，內心當然唔好受。首先要反省自己做錯啲乜春野，搞到要俾人炒？話說我之前用電腦整亂左佢個customer list，跟住我這一星期把這個list回復了50%，最後老闆沒有空把她的咭片給我，咁我都無辦法。老闆與上司之前已明示暗示並且陸續不斷向我施壓，表明要我「死都死返掂個list」，例如他們建議我拎啲咭片返屋企整個list，或者係公司留耐啲，小弟都拒絕並推塘了。就這件事上面，小弟都幾賤格，做錯野自己唔立即補飛，睇黎呢單野都係最大檸樂o既一單。
咁其他方面小弟有無問題？有的。例如班港女sales日日講埋啲物質到不能再物質，自以為高貴到不能再高貴的話題時，小弟問題在永遠不插嘴。例子有：「個個客真係好靚仔架！佢本身個樣普通，但係因為佢住貝沙灣，所以好靚仔！」「你唔好以為我地好斯文，我地成班sales都好粗魯，全部都講粗口架！」(在我上班不足幾日已講呢句說話，可能想向我下馬威。我係公司唔多講野，所以佢地唔知道，我係一個粗口爛舌o既人。但無論如何，我從來都唔覺得講粗口代表粗魯，重有，講粗口點解值得炫耀？)
又例如，小弟被老闆照肺時，叫我唔好「準時收工」，要學乖啲，睇下上司有無野教你。講真，學野點解唔可以係辦公室時間學？點解要收工時先去學野？我都肯定有人會話我「小小野都計較」，「咁你後生要熬下」或者「個個都係唔準時收工架啦！」。多謝你們寶貴的意見，小弟都聽過六七百萬人講過呢幾句說話，求你們行行好，唔好再轟炸我！其實，香港點解班打工仔成日都無補薪又無得準時收工，就係因為你地呢啲「唔計較」，「肯熬」而造成，個個都將呢幾句野當做打工宗旨，頂爛市，全港打工仔因而日日仆街，十一點都收唔到工。問心個句，你係咪好願意無補薪情況下日日ot？如果係，我會尊重你o既選擇，但對唔住，你唔好將你個套搬落我頭上，我認為，ot要補水，無水收工，有水開工。可能好市儈，但係，點解唔可以話係工人應有權利，點解將自己權利放去俾老闆到，當做佢地o既權利？肯搏肯熬唔係無條件日日ot七個鐘，而係你係工作時間去到盡，做到盡，個啲先叫搏叫熬！如果你認為俾曬啲時間老闆係肯搏肯熬，對唔住，我覺得我個種睇法好似我良心過得去之餘又不失智慧。
愈講愈離題，返一返黎。被炒魷的原因甚為複雜，都難以盡錄。小弟綜觀如下：
1)整亂左個customer list
2)準時收工
3)返工無笑容
4)同港女們溝通不來
5)不受人老點
咁最後大家點評價我覺得唔緊要，我自己知自己事。錯就梗係啦，如果唔係點會炒你？但係係咪咁簡單呢，我就唔知喇！
但是，無論怎樣，小弟一回家已又寄了四五十封電郵應徵，繼續努力籌集大學學費，風雨不改，沒有甚麼可動搖我。
文章定位：
