二月大陸之旅將會啟程，感覺是：好驚！
在我眼中，大陸和去伊拉克沒有太大差別的，所以每次一提到返大陸，我都好驚俾恐怖份子綁架，然後，我會係個鏡頭裡同大家講：「頂你個肺，斬頭就快d啦，阻Q住曬！」你唔信？如果我俾人捉左我就試俾你睇！
為左我返大陸唔會突然俾人捉左去鎗斃，在下已經做足準備功夫：
1)背熟國歌，絕對唔容許自己因為背錯台灣周杰倫個首《霍元甲》而俾人殺死。
2)練好國語，「大哥好！中國好！毛主席好！你喇媽好！」公安哥哥一定唔會捉我去黑房。
3)準備一百蚊人民幣，根據周星馳《國產零零漆》裡，只要一百蚊便可以免去死刑。
4)溫習歷史書，以方便自己刷毛主席，江澤民，陳水扁鞋，流水行雲，快過車神。
5)叫阿媽帶定刀阻止我去紫禁城或者天安門大嗌：「釋放程翔，平反六四，王丹萬歲」等等字句。
唔好以為我痴左線，其實我係想同大家講，返大陸，你想講道理，你不如落閰羅王度講。要想安全行走於大陸街道上，你有三樣野一定要做，第一：強迫自己心繫家國：係內地，無論係一舊屎，一件公安，或者係一碌幹部，你都要覺得係完美o既，無懈可擊o既，咁樣，你先唔會犯上了叛國罪，洩露國家機密罪，侮辱排洩物罪；第二：小心駛得萬年船：見到人地打劫，你唔好逞英雄去幫手捉賊，而係用鎗，矛，石頭，火箭炮，手榴彈清場，因為，你唔知邊個係打劫，邊個係俾人打劫，要自保，就只有清他娘的場；第三：醒醒定定記[也母]住前面個兩樣野。
返大陸，唔係旅遊，而係搏命。迷暈黨、扑頭黨、機車黨、貪污黨、共產黨，有邊個黨你敢挑釁佢？如果你可以面對面問候以上一黨的娘親，而又完完整整落返黎，(我相信無呢一個人存在)請你今年參選特首，再參選埋國家主席，接下去，你已經可以支配世界，隻手遮天。呢個世界，只有嫌命長o既人先會返大陸，而小弟就係其中一位，皆因我死剩都係得把口，怕佢有牙？
我返去個唔知幾多日，各位觀眾就唔駛黎本台睇下我死左未，因為就算我死左呢度都唔會有消息公佈。而且內地一定會禁制消息，並且會剖開我心肝脾肺腎去做研究，最後屍都無埋。拿拿拿！咁點樣先知道死左未呢？好簡單！你見到我一個月都未返黎打文章呢，咁你就可以十成十肯定我係瓜左老襯，到時可以入帛金落我戶口，以資助我殮葬費。我入土為安後，我會記住邊個俾過帛金我，我死後便會庇祐一下你。
文章定位：
