講起卡通片，真係會講唔完.........
細細個最記得，同爸媽一齊睇電視，好開心，仲有就係，原來爸媽都有各自鐘意睇既卡通片架喎 呵
記得有套叫百變黃毛仔，爸爸一見到就話個公仔好得意，好好笑，其實我都唔係好記得d內容係咩，因為只係睇左幾集，佢就做完...而且當時好細個，所以都唔係好記得....
跟住就係一套我地全家人都有追既<莎拉物語>，我記得呢套係禮拜日朝早做，所以每個禮拜日，媽咪都會叫我起身，一齊睇，睇完我一定會訓返 我記得莎拉係著住條藍色裙，跟住就係一對綁帶既boot仔，佢個頭髮都係藍色既。
再來就係適合一家大細睇既叮噹，超級好睇!!!最記得阿大雄好鬼無用，跟住技安就係開雜貨舖既，成日比佢阿媽鬧，而阿福就係好鬼有錢。不過我記得有個配角，大家成日都唔記得既，就係大雄既情敵，阿健仔(應該無記錯)，阿健仔成日都約靜宜去佢屋企玩，講真丫，我覺得阿健仔同靜宜係好襯架 呵呵 不過好多故事都係咁既，女主角偏偏會鐘意上另類既人 估唔到細個既卡通片已經有呢隻橋~ 呵呵
再來應該係Salor Moon，警惡懲奸!! 哈哈 睇左幾集之後開始覺得悶悶地，最鐘意就係睇佢地d鞋，覺得好靚，唔知點解我畫極都畫唔到好似佢地咁靚既 學極都學唔到 最鐘意就係阿麗，因為佢著既係紅色高根鞋 呵呵 其他人就會著boot，我心諗上身著到咁鬼涼，下身就整對boot，真係上面賣涼粉，下面蒸鬆糕咁。
有一套係暑假播既，就係<相聚一刻>，超級好睇，阿享子小姐同預作先生(其實唔知係唔係咁寫)，覺得個間屋好靚，入面好多好搞野既住客。呢套真係超好睇話阿享子小姐係一個寡婦，阿預作先生好似係一個作家，諗返起都覺得住係個間屋的人好開心，好溫馨。
到大個小小後，就係鐘意睇櫻桃小丸子，好好睇，最記得佢有個小玉好朋友，帶住副眼鏡，好得意，好有錢添，佢阿爸好鐘意影相， 呵呵。 跟住就係有個唔知叫咩名，但成日都會話"世界末日"，個個人好恐佈，佢一講野背景就會黑哂，佢個樣好得人驚 @_@" 而且我覺得三條線呢個表達方式好似就係因為呢個卡通片就興起既
講到依家都係講緊無線既卡通片，應該講下亞視既卡通片..........
印象中最記得既就係有套叫以天烈百科全書，我成日覺得個套野同叮噹係差唔多既，連d主角都好似差唔多咁，有個好似技安既肥仔，成日蝦好似大雄個個男仔，又有個好似靜宜既女仔鐘意個個假大雄。呢套野我記得，好似係轉台轉到無野睇啦，咁就會睇下既 呵呵
跟住再來呢套就係<我愛西瓜刨>，呢套真係超鐘意睇，覺得佢好得意，好好笑，最記得有個叫三寸釘，成日比佢老點。哈哈哈 我記得個時鐘意睇到呢，連佢首歌都識得唱，日文來架，聽得多咪識背囉 呵呵
我諗<橙路>係大家都好鐘意睇既，其實我就真係麻麻，仲有就係亂馬1/2，呢兩套都係漫畫改編既，我都無追，一來成日都遇唔岩時間，做親橙路我都睇唔到，睇到時，佢已經就來完，亂馬我就記得係禮拜日晚上十點半做既，第二日要返學，所以就好少有得睇，媽咪要我早d訓。
卡通片係講唔完既，一講到電視，我係一直都會講唔完既 呵呵 ^^y
不過有一點一定要講既，就係我覺得無視既配音好似係好聽過亞視既配音咁既 呵呵
Comments (1) ( Previous | Next ) Last Published Delete
話時話,你有冇諗過用綠茶加益力多去試下減唔減到肥呀?你肥咩?你D相都唔肥,係塊面比較有D豬仔肉,我覺得好變態呀,甘樣飲法會唔會有事架,雖然我唔係要減肥既人士,但我覺得做運動比較有效D,唔得去做運動,咪係屋企做下sit up羅,再唔係係屋企加部跑步機o October 29 11:40 PM
Published by: RepeatingMan (http://spaces.msn.com/members/manyue0131/)
文章定位：
