落雨天心悶，拄著外媽的鹹肉豆仔
彼一工，知影騎鐵馬的車隊欲安排去埔里南豐茶園活動，心內躊躇:「山路真崎無啥簡單騎，大粒汗牽細粒汗會沿路滴雨……」雖然我是標準「肉跤」彼爿國的，但是「輸人毋輸陣，輸陣歹看面」，嘛面皮激厚厚報名參加。「敢是我心肝底有某一種生命力當咧精神?」
早起時著烏陰天，阮共鐵馬疊起車頂後，準備欲駛去埔里的山跤。拄上車雨毛仔著開始輕輕仔掖籽，「應該無礙啦?」啥知一到半路，雨若起性地愈落越大，我看註定攏愛「坐車攻頂」囉！看逐家頭額邊攏牽三條線……。我原本厚面皮的自信，若像去夆「洗面」仝款：「天公伯仔啊實在真毋予阮面子！」，心情煞幔一領厚厚的烏雲，毋知冬時才會散--開?
雖罔bōe-tàng真正騎鐵馬，Làng雨縫的時有人建議去山尾溜踅踅咧，我一行開跤心煞漸漸清幽起--來。規山頭真正是媠噹噹，溫柔的雲kah清涼的霧一路佇身軀邊陪綴。才行到山腰，我的目睭雄雄一金展大蕊，閣叫出一聲著驚兼歡喜的「啊！」，因為看著細漢時佮我真有感情的彼種牽青藤的肉豆仔。不幸中真正有好佳哉！感謝原本予我罵歹心的天公，共我開一扇「足感心」的門----想袂到落雨天佇外縣市心悶的山頂，會重再拄著三十幾年前鹹酸甜合味的心記持。
細漢彼時陣，阿爸、阿母攏佇學校教冊，時常會無閒通認真煮飯、仝桌食飯。早頓定定凊彩pe-pe咧，有時陣，連中畫頓嘛食佮真簡單。外媽伊看了真毋甘，就共阮阿母講:「樹頭愛徛予在，毋驚樹尾咧做風颱！囡仔人三頓愛煮予營養，大漢才會若勇跤馬走四方。」自彼工開始著換伊來煮營養的料理予阮囡仔食。真福氣按阮兜後尾門行到外媽兜，轉彎角連鞭著到。阮外媽真敖煮食，無論是菜脯煎卵、米粉炒、白菜滷、麻油雞……攏是伊常常煮的手路菜。猶有真濟真濟種料理菜色，著算規碗櫥仔內的盤仔總拚出來嘛攏貯袂了！
若講起我記持上蓋深刻的滋味，著是外媽所炒的鹹肉豆仔。細漢時物資欠缺，雖然阮兜公教人員生活小可仔較好過，嘛是真少通有四秀仔會使食。佇阿爸、阿母無閒的時陣，外媽三不五時會chhōa阮四、五個查某囡仔，著會對阮兜後尾門出發。下晡時仔歡喜的「遠足」時光，沿路佇大紅花頂面、牆圍仔面頂、圳溝仔邊……，肉豆仔生佮滇蓬蓬，若像外媽疼孫的愛，是某一種超越時間、無限存在的生命力！
外媽教阮揀的攏是足飽仁的豆仔，若共外面發毛koh澀味的皮一剝開，烏紫、烏紫的豆仔仁，著若阮這幾個激骨的「查某鬼仔」仝款，按豆殼仔跳入坩仔內走鏢。看著坩仔內滇滿滿的豆仁仔，「大鼎未滾，細鼎沯沯滾」，阮規蓬查某囡仔已經佇邊仔直直流嘴瀾囉！佇這當時，外媽著會共阮攏戽戽出去門口埕chhit-thô，伊家己一個人佇灶跤炒豆仔仁，毋閣芳味啊總是掩蓋袂稠，燒滾滾對煙筒管通天……入地……。
炒好的肉豆仔仁鹹鹹，真香擱真好食，外媽用油紙一人包一包，予阮當作四秀仔，過了貪食的腹腸袂枵過飢的囡仔時。頂一代「手路菜」的甘甜柔情，早著貯入我心肝內記持的甕仔底發酵、開封、衝芳……。三年前，外媽一百歲綴外公去西方極樂國做仙囉！火化的時陣，我雙手合十企佇火化爐外面，若看到外媽佇咧共我使目尾，然後著若目晭合偎睏中晝去囉！彼款感覺我知影，是伊叫我放心啦！祝福伊趕去「外國」和相約的外公會合，二度蜜月旅行啦！
怪奇中有真稀奇！烏雲外有向陽天！佇天公伯仔落雨予我心悶的奇巧安排中，使我現在企佇離外媽伊真近、真偎的山頂懸，感念伊的恩情，喝講我的相思！這支山變做若像我囡仔時「通天」的煙筒管，予我閣再鼻著外媽用愛所炒的鹹肉豆仔芳……，彼種「入地」猶原會數念的滋味……。這時，連我喙面頂的幾滴仔雨水，嘛鼻著芳味，變到鹹鹹，我恬恬仔舔入喙內，吞入腹內，感謝天公的恩賜……「外媽！食鹹肉豆變肉跤的查某孫仔，已經大漢親像勇跤馬，後逝著會騎鐵馬走四方，上山頭來看你囉……！」
後記1：在一個機緣巧合下需要寫台語散文的文章，於是把自己幾篇對外婆的思念與懷想很認真的寫下來，因此『落雨天心悶，拄著外媽的鹹肉豆仔』誕生了。2012/09/09
後記2：上傳這篇文章不禁想到蕭煌奇『阿嬤的話』，至於【阮阿爸】其實是一個非常非常好的阿爸喔！
文章定位：
