百感交集 純粹是日記，沒有秘密可言．如果你有心來看的，請細心閱讀，可能你的心情都跟我一樣． 終結，其實是為了迎接開始，所以，請不要害怕終結的來臨，它是只一個過程，一個人們都必須經歷的過程．

232愛的鼓勵 0訂閱站台

聖誕節玩得勁開心呀．．已經好耐無試過好似個日咁，雖然第二日我要返工，但我都唔理三七二一玩個盡興．．哈～～仲有一大班好朋友一齊，我點可以唔玩返夠本呢？！





照樣要返工的廿五號，晏就細蚊上過黎映之館，佢係上黎打發一下時間同還碟，晏少少又會返去教會，再之後先搵返我地．




喺映之館其間，細蚊玩油指甲，咁就順道幫我整埋，真係麻煩哂小蚊蚊了，佢令我ｄ指甲增添色彩．唔係逗留好耐就走了，我就要等埋阿邦返黎先可以走，而且阿婷同阿瑩都未得，所以我都唔急住走．




約到佢地兩個之後，行左葵芳一陣，我去買菲林的時候，嘉慧打黎話好快就到葵芳地鐵站月台，咁我地三個就拿拿琳走過去，行到半路，細蚊都打黎問我地喺邊，所以一齊約左喺月台等，好快咁我地見哂面，爭阿頭未到，我地到左旺角站等佢，好彩今次唔係要等好耐，如果唔係就慘了．





我地第一個目的地係中環，多人到死，但ｄ景靚到爆爆爆呀．．所以我地不斷咁狂影相，影到好多好多呀．所以我都非常開心．然後我地選擇坐船仔去尖沙咀，好耐無坐過，所以都令我十分開心．去到尖沙咀直頭想尖叫呀．．．靚到個咀都變左圓圈咁．．．個種心情真係難以形容．影完勁多相之後就返旺角，無記錯的話個時係零辰點幾左右，我阿婷阿瑩同細蚊就返去阿瑩屋企先，咁嘉慧同阿頭就去食野．好快就到達，去到瑩屋企簡直舒服得很，我第一時間借用阿瑩屋企個廁所－－－沖涼＜－－－－請看清楚．．．係沖涼，我就係沖涼，因為第二日我要直接返工，唔會有時間返自己屋企沖涼，而且我好怕無沖涼嗰種感覺，好唔舒服嫁，所以我都係逼不得已，好彩阿瑩招呼周到．沖完涼，攪左陣，細蚊就話整野食，佢同我走左入廚房整麵食，攪左一大輪先有得食，食飽之後就睇下電視傾下計咁囉，我就不知不覺咁訓著左，我好似記得係四點幾咁啦．





第二日十一點起身都好精神，仲有少少覺得凍，我拿拿琳著好衫褲，執好哂野，先行一步－－－－－返工，落到留下等車，我阿哥打左幾個電話叫我快ｄ返黎，你估我想嫁，無車都無辦法嫁，摧摧摧．．煩到嘔．返到去，佢又唔係即刻走喎，真係激鬼死我呀，唔係咁趕就唔好叫我趕返黎啦．．．．傻嫁．



幸好都叫做有訓覺，整日的工作無令到我好慘．．．哈哈．．．




下午，阿笑突然到訪，真係驚喜，一個電話都無就上黎，佢唔驚我唔駛返工？？！原來佢上黎俾張聖誕咭同聖誕禮物俾我，好開心呀，我至愛的貓貓（聖誕咭）同ｍａｒｉｅ鎖匙扣（禮物），我勁鍾意呀．．．都係阿笑有我心，本來我都想買聖誕禮物俾佢同阿婷嫁，因為我上年都有買開麻，但最可惜無時間出去買，祇係寫左聖誕咭，希望佢地唔好介意啦．







諗返起，廿五號真係好開心，做所有野都係令我地好開心，可惜阿笑同豬仔無黎，如果唔係，我會仲開心囉．


真係多謝佢地，有佢地先有咁開心呀．
多謝阿瑩的聖誕咭，係我今個聖誕節第一張收到嫁．（其實我收得兩張”）
多謝阿笑的聖誕咭同禮物，令我十分驚喜，真架，我諗都無諗過．
多謝上帝賜給我所有，令我感受到身邊的人事物，擁有一切快樂的．