香港車壇吹環保風短短10年，今日hybrid車嘅比例相信已經係世界數一數二，喺政府落後嘅政策下一樣有低硫柴油Audi Q7 TDI可以登記成為私家車，連電動車（EV）都已經有2款，今個月更加增加到有第3款選擇，仲要係香港人覺得高人一等嘅歐洲車同首次出現嘅大路房車車型。 $388,000定價為香港EV市場創新低價，今日訂車9月已經可以火速交車，你要買新車有能力都唔揀就認真罪過！
香港EV市場睇落發展迅速，2010年Mitsubishi iMiEV首登場，2011年Nissan LEAF到港，但前者基於十零萬嘅K-Car發展而成，蚊型車仔變EV後賣到$395000，並唔符合經濟原則；而後者雖然係獨立開 發EV，揭背車型亦夠實用，但賣到成$420,000差不多夠買3部同類型汽油車Tiida，而且產量非常有限，一樣唔係出名現實嘅香港人容易接受，所以2年來喺街見親嘅EV都係政府或大機構專車，根本冇打入過民用市場！好在2012末日EV救星到，Renault Fluence Z.E.本月登陸，size係同Corolla差唔多嘅家庭房車，$388,000創EV新低價，仲講明9月有車交！喂，買部Corolla都要成廿幾萬啦！而家唔使入油仲要係歐洲車，畀多十零萬買部EV，無論喺心理上定財政上都合情合理，絕對有可能令EV同Renault喺香港紅起來！
EV最大家族
可能大家連聽都未聽過法國Renault有出EV，其實唔只1部，而係有4部！早喺09年筆者去法蘭克褔車展時，廠方已經公佈呢個Z.E. （Zero Emission）車系計劃同出晒concept car，除家庭房車Fluence Z.E.外，仲有Kangoo Z.E.小貨van、Twizy Z.E.雙座位微型車同Zoe Z.E.揭背車仔，雖然前兩者係基於現有汽油車改裝而成，但車系之廣比日本車廠更大堆頭！ Kangoo Z.E.最早喺去年上市，仲攞埋International Van of the Year，今年就到Fluence Z.E.上場，1月已經整咗好似眼前呢部咁嘅頭批車出嚟全世界做demo，6月就正式投產，亞洲第一批車8月就會到港交30部畀政府，有過半數會喺警務署服役，其他ICAC、水務署同民航署等都會用到。而且街客訂嘅話，代理講明9月交到車，並唔係好似之前啲EV咁show多過賣！
高官政要齊撐電車
今次Renault引入的Fluence Z.E.作為首款正式在港發售嘅歐洲電動車，唔只政府支持買入30部，連法國政府都力撐！發布當日除環境局局長邱騰華外，連法國交通部長同法國駐香港及澳門總領事都有到場，大談電動車日後在港的發展及世界環保汽車動向。
法國交通部長 Mr. Thierry Mariani
今次受邀到港出席Fluence的登場儀式別具意義，因為Fluence是首款被香港政府採用的法國製電動車，標誌着法國的尖端汽車科技實際應用在香港路面上。法國的城市交通環境同香港很似，繁忙而且路面小，廢氣問題日益嚴重，沒有廢氣的電動車正好是兩地用作解決廢氣問題的方法。此外，兩地的交通部門都會就今次的交流而互通意見，為日後電動車加以普及各出一分力。
法國駐香港及澳門總領事 栢雅樂先生
法國本土已有不少電動車行走，香港地小又多車，很容易出現汽車廢氣問題，電動車零廢氣排放最適合香港這類高度密集的都市。希望今次雷諾Fluence電動車得到香港政府選用，為法國汽車科技及香港環保工作出一分力。
換殼迷你怪—Twizy
Renault Z.E.車系中外形最誇，得兩個位細細粒只重450kg，可以好似smart仔咁換殼，仲有向上飛起又冇窗嘅車門，但今年就真係會量產，用18匹摩打、極速80km/h只宜代步，但差3個半鐘就可以行100km，售價只需6,990歐元，代理話年尾就會引入，但問題係都唔知用咩類型車種出牌？
長氣壓軸hatch—Zoe
Zoe比Renault Z.E.車系更歷史悠久，早喺05年已有concept car，改良過3個概念版之後，最終今年宣布量產，車長4,080mm 嘅揭背車仔只係比Prius C長85mm，用85匹摩打、極速135km/h，加入大量新科技，30分鐘快叉或9個鐘慢叉後，續航力高達210km！售價15,700歐元起。
技術唔使憂
以前香港車迷對法國車嘅可靠性都有啲負面印象，不過進入EV時代其實已經係另一回事，因為再冇引擎、波箱等傳統機件，對任何一間車廠嚟講都係起步階段，電池同摩打嘅規格亦比引擎波箱統一得多，唔會再話日本設計啱香港用多啲。而且Fluence嘅汽油版早喺09年上市，行咗3年街證明基本規格冇鑊氣。就算大家真係信日本車多啲亦冇問題，因為Renault其實一早同Nissan結盟互持股份，合作推出新車，係世界第3大汽車集團，所以Fluence Z.E.同Nissan LEAF共用咗好多技術，電池亦係由Nissan同NEC合組嘅公司提供，比其他EV有信心保證得多！
續航更加勁
同大家最有信心嘅EV Nissan LEAF比，Fluence Z.E.數據上少14匹馬力、5.5kgm扭力，極速亦低10km，性能似乎冇咁勁。但Fluence Z.E.喺較低輸出下，就算房車車身重多85kg，185km續航力亦比LEAF嘅160km長25km！不過Fluence Z.E.同LEAF最大嘅不同，在於充電設計上，因為Fluence Z.E.用歐洲AC交流電制式，以家用220V電插頭100%充電要10-12個鐘時間長少少，而且用唔到現時香港3個快叉站30分鐘快速充電80%設施，規格同日本EV始終有啲唔同。但Renault就幫Fluence Z.E.搞咗好多比日本仔更有前瞻性嘅合作project，設計時已經同Better Place battery switch network傾掂，喺車上加咗電池快拆技術，喺有QuickDrop system嘅電池更換站1分鐘之內就可以換嚿100%充電嘅電池上去，唔使慢慢等叉電。雖然現時香港未有換電站用唔到，但Renault亦同另一間Schneider Electric合作咗，如果車主住村屋或獨立屋有私人停車位，出車時可以畀多$10,000-$15,000，Schneider Electric就會上門幫你喺車位整快叉設施，100%充電時間可以縮短到6-8小時，感覺上服務尊貴好多！
Renault Fluence Z.E. Spec.
電池：398V 22kWh lithium-ion鋰電池 / AC摩打馬力：95ps/3,000rpm 扭力：23.1kgm 極速：135km/h 車重：1,605kg 車身：4,748×1,809×1,458（mm）（Win） 0-100km/h：13秒行走距離：185km（Win）充電時間：10-12小時（220V家用插頭）、6-8小時（家用快速充電）售價：$388,000（Win）查詢：Wearnes Motors HK（2927 3538）
誤差只有1km
講多無謂，試車最實際！見Fluence Z.E.話有185km續航力，原本打算由鯉魚門showroom來回元朗南生圍試盡佢，點知去到部車顯示要叉多35分鐘先滿電，現時只可行87km，惟有改路線入西貢。不過開車未出鯉魚門續航力已經快速跌到79km，心諗應該好似之前長期測試過嘅日本EV啲續航力咁「唔足秤」！好在同行代理人員同筆者一樣夠大膽，照行原定路線，經將軍澳入西貢，再行西沙入沙田，最後行大老山隧道、觀塘繞道返鯉魚門。途中高速公路、多彎山路、塞車路段、上落大斜路各類型香港路面都齊晒，仲要停過將軍澳墳場、銀線灣、西沙、中大4個地點影相，搞咗足足4個鐘長開大燈、音響、冷氣、未熄過車，最後返到鯉魚門showroom得番9km續航力，試得夠晒盡！不過結果一計行車里數，原來都行咗77.1km，加埋未行嗰9km，同出車時顯示嘅87km只有1km誤差，真係前所未有咁信得過！起碼唔使好似揸其他日本EV咁要估佢個續航力有幾多成堅吖！
出發前
回程後
共行77.1km
行駛到剩餘約20km，屏幕就會彈出充電提示。
Nissan LEAF Spec.
電池：360V 24kWh lithium-ion鋰電池 / EM61型摩打（Win）馬力：109ps/2,730-9,800rpm（Win）扭力：28.6kgm/0-2,730rpm（Win）極速：145km/h（Win）車重：1,520kg（Win）車身：4,445×1,770×1,545（mm） 0-100km/h：11.9秒（Win）行走距離：160km 充電時間：8-10小時（220V家用插頭）、30分鐘（快速充電80%）（Win）售價：$420,000 查詢：Honest Motors（2803 5333）
今年新增1,000叉電站
每次有新EV推出政府都首先力撐買入畀各部門用，但對於鼓勵市民轉用EV又夠唔夠力度呢？《Auto Express》就搵咗立法會環境事務委員會主席陳克勤講吓，原來2010年MINI E電動車到港展覽佢已經被邀請長期測試4日！ 「以我經驗電動車性能絕對冇問題，可唔可以大行其道，取決於配套設施，但而家啲充電站分布得好唔平均，集中喺香港島同九龍區，新界區得好少。雖然今年政府會增設1,000個充電站，但其中500個喺政府設施入面，只供政府車輛使用。我覺得應該開放埋呢500個畀公眾用，加番八達通收費機就得，咁就可以將充電網絡擴大好多。」另外，陳議員亦話現時免EV首次登記稅都未夠力鼓勵現實嘅香港市民轉用EV，其實可以免埋牌費，甚至好似補貼貨車換新車咁，資助以舊車換EV，亦應該推動多啲MyCar之類嘅本土電動車工業。
唔使踩迫力
雖然數據上Fluence Z.E.性能比LEAF弱，加速力的確差約10%，由燈位靜止起步上將軍澳墳場大斜路頂多行到50km/h，但如果好似上將軍澳隧道咁行順咗加速就飛到過100km/h上斜都冇問題。而且唔計Tesla嘅電動超跑，Fluence Z.E.應該係最好劈嘅量產EV！因為佢車高比LEAF低成87mm，重心低好多，同Corolla、Jetta之類冇乜分別。而且懸掛調校好似Renault啲跑車咁落過苦功，避震支撐力同伸展力都好平衡，劈彎時車頭好聽話，但行爛路時又唔會扽到彈彈吓，軚盤更加唔會輕飄飄，而係好有路面感，可以稱得上有少許駕駛樂趣。 Fluence Z.E.同其他EV最唔同嘅係，鬆開加速踏板時嘅牽引力特別大，就好似汽油車行緊1、2波收油咁，好快就會拖慢車速，喺西貢南圍落斜快相位，自動可以拖慢到行50km/h。行平路時係要適應吓遲啲減速、早啲再加速，但喺西貢之類又上又落又多車嘅路面，只要同前車保持3秒距離，靠佢自動拖慢車速就夠，根本冇需要踩brake，反而比揸汽油車順啲。而且鬆加速踏板拖慢時，動力回收得特別勁，所以由將軍澳去馬鞍山一段，表板嘅剩餘里數會減得比實際行車里數少，相信唔多夠電時落條大斜路，會幫手叉番唔少電！
中大生講EV
EV可能唔係我哋呢個時代可以hit起，但肯定係未來社會主人翁有興趣嘅交通工具，喺中大拍攝期間，就特登搵咗2個大學生講吓對呢部EV有乜感想。
語言系碩士生 李小姐之前冇見過電動車，個樣都幾靚呀！係咪好環保㗎？嵋家啲油咁貴，如果只係比汽油車貴50%，我都第日都會買嘅
BBA本科生 Stephen 呢架嘢個樣普普通通啦！雖然話唔使入油啫，但係都要交電費㗎！而家啲電費又愈嚟愈貴，如果比汽油車貴一倍就唔諗㗎喇！貴50%都仲有得考慮嘅。 ####
頭沙板左右兩邊都有充電插位，泊車充電更靈活。
雖然充電池擺喺後座同尾箱之間，但車身亦比汽油版加長13mm，尾箱唔夠深，但都有317L容量，仲送多2條快叉同慢叉電線。
中控台設計簡單，只有一條仿金屬裝飾，比較高級只係多咗個屏幕同波棍後用嚟設定功能嘅多功能掣。
軚盤後有聲控導航及免提掣，右邊水撥棍頂亦有個上下掣，可以切換表板右邊小屏幕顯示續航里數、耗電量及出力狀態等。
中控台屏幕有大量專為EV而設嘅導航功能，如充電站位置及充電模式等，但試車當日未用得，現時已插入香港及澳門電子地圖測試中。
香港版得一個spec.冇option加，原裝已有皮籠，手動前座大張、夠厚又軟熟。
接近平地台後座空間同Corolla差唔多，唔會好似LEAF咁升高咗，腳位完全唔頂，仲有手動窗簾。
冷氣同音響有獨立panel控制，原裝已有左右雙區獨立恆溫空調。
表板唔及日本EV咁高科技，冇大量顯示屏，但左邊就有超大個電量計，右邊亦有小屏幕顯示行車資訊。
續航力：87km
行車里數：45.2km
續航力：9km
行車里數：122.3km
160kg摩打喺車頭，250kg充電池喺車尾，前後車重分布幾平均，加上懸掛set得靚，劈彎時冇明顯推頭甩尾傾向。
屏幕喺出力模式時，踩加速踏板會顯示電池出力，下方出力計指針亦會轉向右邊紅色區域。
放開加速踏板有牽引力拖慢時，屏幕會顯示制動力回收系統充番幾多電落電池，出力計指針會撥向左邊藍色區域。
95匹摩打雖然唔快，但日常代步夠晒用，小問題係車廂隔音一般，全力加速同減速時都會聽到少少摩打高頻聲。
波箱只有向前向後，表現順滑，加速時亦唔覺阻力大。
文章定位：
人氣(1,377) | 回應(0)| 推薦 (
0)| 收藏 (
0)|
轉寄
全站分類:
不分類
