今天的日記,由昨天寫起......
因為星期六份功課要成四點幾先完成,所以未能早一日上廣州,要在昨天晨早跟埋爸爸&伯伯去.
昨天我五點半就起o左身,我好難相信自己可以自動自覺起身,真的好耐都未試過了!我一跳落床,就第一時間去梳洗,然後快快的食過早餐,跟爸爸出發去了.
我們二人到了火炭車站,會合埋伯伯,就一起往深圳去.過關時非常暢順呀,所以我們好快就到了深圳,接注即買火車票,上埋車,九點未夠就已經到廣州了!
到o左廣州,轉過地鐵,同家姐佢o地飲過茶就出快去拜山了.今年我們和去年一樣,坐"公車"去拜山,雖然去程時架車危險d,但在路途上給我一種比以往舒服的感覺,因為廣州的空氣改善o左.
拜完山,我們一家人食過飯,就各自找活動.大人們呢就歸家傾計,我同二家姐呢?就去了行街街和"傾心事".我o地兩姐弟一聚頭,其中實傾o既呢就係感情問題,今次家姐提醒o左我一樣好好的方法,可以增加我同阿怡之間的溝通.我覺得真的好有用,我一定會試的,真的好多謝妳呀家姐!但可惜我們今次相聚時間短,講的有限哦!我o地一路行一路傾,家姐買了她要買的東西外,還買了兩把劍送比我,我真的唔好意思要呀!因為家姐今晚就上機去澳洲讀書了,該留多個錢旁身的呢!家姐,真的多謝妳呀!!
行到五點幾,我o地非歸家不行了,因為跟注就要出街食晚飯呢!上到家姐屋企,家姐原來又準備了禮物送比我,我真的好感動呀!!家姐真的好錫我呢!!
食過晚飯,成八點了,我們非走不可啦!我真的唔捨得呀,因為只係同家姐傾得咁少時間,再加上家姐今晚就飛了,真的唔捨得咁快就要走...而亦因為知道家姐今晚就要去澳洲,所以我今次專登帶埋即影即有相機去為大家留念,讓家姐可以帶埋全家幅過去,一解思鄉之情呢!
不依不捨的別過家姐和各位,我們三人就趕去火車站,買票回深圳,但點知趕到去車站,發現只剩下尾班車的票,無計啦!照買,但佢離開車時間還有成個鐘呢!於是爸&伯就搵地方坐低傾計,而我就去了商場買手信比中心的同事.買完手信,係時候登車了,但那時候已經快十點了,所以我們昨晚回到香港屋企,已經係十二點幾了!我和爸爸已經倦到散晒呢!
幸好今早我取了假,所以可以睡到十點先起身.起身後沒什麼趕,所以就幫弟弟填好份債務表,好讓他計劃屋企的財政問題.填完表,就和弟食過午飯,跟注就上班去了.
今晚我走堂呀!因為今晚的堂是為新生介紹規矩的,我都唔洗聽的,所以唔去了!
二家姐,祝妳一路順風,學有所成,還有...有機會發展一段異地情緣呢!
文章定位：
